1 Relles 12
12
E charoina fuladol
2 Kr 10.1—11.4
1O Roboam llelo ando Sikem, soke sa o Israel avilo ando Sikem te thovel le te charoil. 2Ta kana llangla le o Jeroboam chavo katar o Nabat, kai saia ando Ejipto sar kana naslo katar o Salomon, 3bichalde llenen te ikharen le. Ta avilo o Jeroboam ta sa o foro katar o Israel te den orba e Roboamea, ta phende leke:
4Cho dad saia but zuralo amenchar. Akana cher te avel mai lokho o pharipe kai thoda pe amende cho dad, ta amen ka radi chuke.
5O Roboam phenda lenge:
Llantar, aven mande pala e trin llive.
Ta sa lleletar. 6Ondaka o charo o Roboam puchla e puranen kai radisardea leke dadeke e Salomoneke kana saia llundo, ta phenda lenge:
¿So phenen tumen kai morabi te phenav e foroke?
7A e phure phende leke:
Te avea allive sargo lengo sluga ta te de lache orbe lenge, von ka radin chuke suako drom.
8A o Roboam ni asunda len, ta puchla e chaurren kai barile lea ta kai radina leke so saia te cherel. 9Ta puchla len:
¿So phenen tumen te phenav e foroke, kai mangle mandar te lav lendar o pharipe kai thoda pe lende mo dad?
10Ta e chaurre phende leke:
Gale foroke kai mangle tutar te le o pharipe kai thoda pe lende cho dad, tu morabi te phene lenge gia:
Te saia mo dad zuralo tumenchar, me ka avav mai but neko vou. Mo nai mai minono si mai thulo neko me dadeko maskar. 11Mo dad thoda pe tumende iek baro pharipe, a me ka thovav ios pe so si thodo. Mo dad chalada tumen e bichoia, a me ka chalavav tumen e alakranenchar.
12Pala o trito llive o Jeroboam ta sa o foro kai saia lea avile kai o Roboam, isto gia sar phenda le o charo:
Aven mande pala trin llive. 13Ta o charo dia pe lende zurale, ta ni cherda so phende leke e phure. 14Ta dia orba e foroia sar phendea leke e chaurre:
Mo dad thoda pe tumende iek baro pharipe, a me ka thovav ios pe so si thodo. Mo dad chalada tumen e bichoia a me ka chalavav tumen e alakranenchar. 15Ta o charo ni asunda e foro, soke gua saia e Devletar te sai cherdol o alav e Devleko kai diaia katar o Ajias silonita e Jeroboameke, chavo e Nabateko.#1 R 11.29-39. 16Kana sa o foro dikhla kai o charo ni asunda len, phende leke gia:#2 S 20.1.
¡Inai amen niso e Davidea!
¡Ni ka la niso katar o chavo e Jeseeko!
¡Aventar chere!
¡Te arakhel o David pe familia!
Ta e llene katar o foro lleletar kai pe chera.
17A o Roboam charoisarda pe chave katar o Israel kai zivina ando Juda. 18Ondaka o charo o Roboam bichalda e Adorame te lel e love kai pochindol e phuviake. A sa o Israel chalade le e barrenchar, ta mulo. Ta o charo o Roboam sigardo, lia iek bordon ta naslo ando Jerusalem. 19Gia fuladilo o Israel katar e vicha e Davideki llik allive.
20Ta kana sa o Israel asunda kai o Jeroboam irisailo katar o Ejipto, ikharde le te avel ta thode le te charoil po Israel, ta ni iek vicha ni achili e familiaia katar o David, samo e vicha katar o Juda.
21Ta kana o Roboam avilo ando Jerusalem chidia stotina ta ojtovardes milie boñikonen katar vicha e Judaeki ta katar e vicha e Benjamineki te marenpe e Israelea, ta te iril pale e charoina kai o Roboam, chavo e Salomoneko. 22A o Del dia orba e Semaiasea, iek lleno e Devleko, ta phenda leke gia:
23Phen e Roboameke, chavo e Salomoneko charo katar o Juda, ta sa e familiake katar o Juda ta e familiake katar o Benjamin, ta sa e foroke, 24te na llan te maren tumen tumare phlalenchar e chave katar o Israel. Irin tumen chere, soke me cherdem gava.
Kana asunde so o Del phenela lenge, irisaile chere prema o alav e Devleko.
O bilachipe katar o Jeroboam
25Ondaka o Jeroboam vazdia pale o foro katar o Sikem po burdo o Efraim, ta zivisarda kote. Mapalal vazdia pale o foro katar o Penuel. 26Ta o Jeroboam mislisailo:
Akana e familia e Davideki pale ka charoil, 27te si kai e llene katar gava foro ka llan ando Jerusalem te den kurbanura e Devleke, pale ka volin e Roboame o charo katar o Juda, ta ka mundaren man ta ka irinpe kai o Roboam.
28Ta mapalal kana puchla so te cherel, cherda dui guruva sunakune, ta phenda e foroke:
But droma tumen llelen ando Jerusalem. Etale kate che dela glamno Israel, von si kai ikande tut katar o Ejipto.#Ek 32.4. 29Ta thoda iekhe ando foro Betel, ta ogole thoda le ando foro Dan. 30Ta gua saia baro bilachipe, soke o foro llala ando Betel ta ando Dan te blagosin e guruven. 31Ta i o Jeroboam vazdia chera pe burdura, ta thoda poponen katar o foro kai ni sea katar e vicha e Levieki. 32Ta phenda lenge te cheren slava ando ojtoto chon, ando desupanchto llive sar cherena le ando Juda, ta dia kurbano pe iek altar. Ta i gia cherda ando Betel, dia kurbanura e guruvenge kai vou cherda. Ta thoda poponen pe thana vazdine kai vou cherda. 33Dia kurbanura po altar kai cherda ando Betel, ando desupanchto llive katar o chon kai vou petar ikanda, ta cherda slava e chaveke katar o Israel, ta po altar phabarda o taimano.#Lv 23.33-34.
Currently Selected:
1 Relles 12: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
