1 Korintios 7
7
So morabi te cheren e zinime
1Ando lil kai bichalden mange puchlen man dal si sukar te na zininpe e llene. Sukar avela te na zininpe, 2a cheres o kurvaluko avela mai sukar suako murus te avel le leki rromi, ta suako diskinia te avel la lako rrom. 3Ta o rrom morabi te perel peke samo pe rromiaia, ta e rromi samo pe rromea. 4Ni e rromi inai gazda katar pi esnaga, soke laki esnaga si lake rromeki, ni o rrom inai gazda katar pi esnaga, soke si lake rromiaki. 5Goleke, na phenen iok iek avereke, samo kana achena pe orba ande gola llivesa te na peren peke e dui ande iek than te sai molintumen, ta pala gola llivesa morabi te peren peke e dui pale ande iek than ta gia o Satanas te na cherel tumen te peren ando bilachipe.
6Sa gala orbe si so misliu man me, na sargo iek zakono kai morabi te cheren. 7Me manglema sa te aven sargo me, a o Del dia suakone llene so te cherel, iekhe iek ezgoda, avere aver ezgoda.
Aver ezgode
8Gola kai inai zinime ta e diskinie kai achile phivle, phenav lenge kai si mai sukar te na zininpe sargo me. 9A te nasti achavenpe, mai sukar avela te zininpe a na te phabon.
10A golenge kai si zinime mukau gava zakono, kai inai murno, e Gazdako si:
E rromi te na mukelpe pe rrometar. 11A iek rromi te mukelape katar po rrom, morabi te achel mukli ta te na zinilpe o te lachardol pe rromea. Isto gia o rrom, morabi te na mukelpe katar pi rromi.#Mt 5.32; 19.9; Mk 10.11-12; Lk 16.18. 12A ogole llenenge phenav gala alava kai si murne a na e Gazdake, varesavo phlal kai leki rromi ni pachal ando Gazda ta voi mangel te zivil lea, o phlal morabi te na mukelpe latar. 13A te avela iek rromi kai si zinime ta lako rrom ni pachal ando Gazda ta vou mangel te zivil laia, voi morabi te na mukelpe letar. 14Soke o rrom kai ni pachal ando Gazda achel santo cheres pi rromi kai pachal, a e rromi kai ni pachal ando Gazda achel santa cheres lako rrom kai pachal. Te na avela gia tumare chaurre avena melale, ta pala gua von si akana katar o foro santo. 15A kana o rrom kai ni pachal ando Gazda ta si zinime iekhe diskiniaia kai pachal ta mangela te mukelpe, sai cherel le, ta isto gia e diskinia kai ni pachal ando Gazda, te mangela te mukelpe katar po rrom kai pachal, sai cherel le. A te si gia, o rrom o e rromi kai pachan inai phangle te zivin lenchar soke o Del ikharda tumen te zivin ande pas. 16¿A so llane tu, rromie, kai sai bradui che rrome? ¿A so llane tu, rromea, kai sai bradui che rromia?
17Sargo te avela, suako lleno morabi te zivil gia sar o Del chinada leke, ta gia sar saia kana o Del ikharda le. Gava si so me phenav kai morabi te cheren sa e khanllira. 18O Del te ikharda vareka kai saia sirkunsidime, te na guruvel le, a te ikharela vareka kai inai sirkunsidime, te na sirkunsidilpe. 19Soke so mol si te kanda e Devle a na o sam o ni sam sirkunsidime. 20Suako lleno morabi te achel isto gia sar saia kana o Del ikharda le. 21Te sana ikhardo e Gazdatar kana sana esluga, na brigisao, a te sai cherea te mukliaren tut, mai sukar avela chuke. 22Soke ko saia esluga kana saia ikhardo, akana si iek manus kai si mukliardo te radil e Gazdake, ta isto gia, ko saia iek manus mukliardo kana saia ikhardo, akana si esluga e Kristoko. 23O Del pochinda tumen but kuch, na muken avere llenen te cheren tumen esluge. 24Goleke phlalalen, suako lleno te achel angla o Del isto gia sar saia kana ikharda le o Gazda.
25A cheres e diskinie kai inai zinime, inai man ni iek alav e Gazdatar te cheren. A mangav te phenav tumenge so misliu man, te sai pachan ande me alava, soke sem iek manus kai lia e zalba katar o Gazda te sai avel chacho. 26Me misliu man kai avela mai sukar suako manus te achel gia sar si, cheres o bilacho vreme kai zivi. 27Te si tut rromi, na mukla, a te inai tut, na rodela. 28Te zinia tut, ni chere bilachipe, ta e diskinia kai inai zinime ta zinilpe, ni voi ni cherel bilachipe. A gola kai zininpe ka avel len patnia, kai avela mange drago te na nakhen. 29Phlalalen, so mangav te phenav gale orbenchar si kai achel amen cherricha vreme. Goleke, e zinime morabi te zivin sargo kana inai zinime, 30a gola kai si zalosne morabi te zivin sargo kana si len bari veselia, a gola kai si len bari veselia morabi te zivin sargo kana si zalosne, a gola kai chinen, morabi te zivin sargo kana inai len niso, 31a gola kai barvaon pe gaia phuv morabi te aven sargo kana ni len niso gale phuviatar, soke gaia phuv kai dikha si te getolpe.
32Me voliva te na dikhav tumen brigime. Soke e llene kai inai zinime thoven sama pe ezgode e Gazdake ta te sai aven leke drago, 33a ko si zinime brigilpe katar e ezgode e phuviake ta te sai perel drago pe rromiake, 34goleke leko lio si fulado. Isto gia e diskinia kai si phivli ta i e diskinia kai inai zinime, briginpe katar e ezgode e Gazdake ta te sai peren leke drago pe sa ezgode kai cheren ta mislin. A e zinime briginpe katar e ezgode e phuviake ta te sai peren drago pe rromeke.
35Me dav gala orbe tumare lachimake, ta te sai zivin iek zivoto lacho ta te volin e Gazda mai but neko niso.
36A ko mislilape kai morabi te zinilpe e diskiniaia kai mangle leke, soke vou si ande burs e zinimake, ta te zinilape ni cherel bilachipe. 37A te si aver lleno kai mislilpe ande po lio kai le ni trubul le te zinilpe ta te na zinilape mai sukar cherel. 38Goleke, ko zinilpe cherel sukar a ko ni zinilape ios mai sukar cherel.
39Iek rromi si phangli pe po rrom so vou avela llundo, a lako rrom te merela, voi sai zinilpe kaia voi mangela, samo kai morabi te zinilpe iekhe llenea kai pachal ando Gazda. 40Me pachau kai voi avela mai veseli te na zinilpe pale. Gava si so me misliu man, ta me pachau kai i man si o Duo e Devleko.
Currently Selected:
1 Korintios 7: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
