Ukunukuo 8

Muhuri wa mufungatë

1Mwankhoo nënaa wawuunanga mühüri wa mufungatë, ng'ë ëgatua twë girunde gwa itungo në ikufë nanguu. 2Kangë nëgavoona vamalaëka avoo në vëmufungatë nëvëgëmika usonge a Muungu vëgafewa mpembe ëmufungatë. 3Malaëka agaja, ukwaatëëre mwachungu wa sahabu, agimëka usonge a ikumbëkëo ra utunchëya urumba. Mweeso agafewa urumba wingë auduye dahwa itambëëmwe nanë marombi a antu voong'e va Muungu, gunto a ikumbëkëo ra sahabu në rëusonge a itumbë ra utemi. 4Yuki ra urumba rëganatëa gunto, itambëëmwe nanë marombi a antu va Muungu, ufuma umëkhono akwe malaëka uyoo nënaa wë usonge a Muungu. 5Kangë malaëka agamuhora mwachungu, agamwijuya moto wa ikumbëkëo agamjughutëa muurëmi. Gugatëndeka irumo, ruri, ufeto nanë gëtëtëmo gafang'ë.

Ifembe

6Kangë vamalaëka avoo në vëmufungatë në vina mpembe ëmufungatë vëgaginëng'anëya ukhuva mbëru a gëhomi.

7Malaëka wa mwandyo agafemba ufëmbe wakwe. Muhangënkhano wa mbura a magwe nane moto, itambëëmwe nanë saghami, ugahunuwa gunto a ng'ë. Theluthi ëmwedu ng'ë ëgarungwëëra, theluthi ëmwedu a mëtë ëgarungwëëra, nanë mahwa oong'e në matotu ëgarungwëëra.

8Malaëka wa gavëë agafëmba ufëmbe wakwe. Gëntu mwino gëtanto gëkuu gëakie moto gëgajughutwa girambo. Thëluthi ëmwedu a irambo ëgatënda saghami, 9theluthi ëmwedu a ntundo ya gërambo ëgakuya na theluthi ëmwedu a meeri ëgaruvangwa.

10Kangë malaëka wa gatatu agafëmba ufembe wakwe. Njota nküü mwino irurë ra moto ëgagwa ufuma girunde, na ëgasima gunto a theluthi ëmwedu a mayongo nanë mërihe a majë. 11(Njota ësëë ëgutanwaa “Ulülü.”) Uvii, theluthi ëmwedu a majë ëgatendeka malülü; antu vingë vëgakuya ufuma na majë asaa, gusoko ëgakhanëkëka atenda malülü.

12Kangë malaëka wa gane agafemba ufembe wakwe. Faafo theluthi ëmwedu a yuva, a mweri nanë njota ëgatumuka; nanë weru ugayaghaya theluthi ëmwedu a weru wakwe. Theluthi ëmwedu a mumwë ëgawuria weru, viuyi viuyi theluthi ëmwedu a utiku.

13Kangë nëgararaava, nëgategheeya nümba ërumie gunto nanguu ëguhanya gwa ruri üküü, “Hehëë, hëhëë, hëhëë gwa anyauduva muurëmi itungo në vamalaëka vatatu këë vinafemba mpembe yawe.”

Currently Selected:

Ukunukuo 8: RIMRC

Highlight

Copy

Compare