Ukunukuo 19

1Nënaa asaa akëra nëgatëgheeya ruri mwino ruri në üküü wa maumbë a antu vaingë girunde uguhanya, “Haleluya utyoi weru nanë nguu në yakwe Muungu witu! 2Gusoko uramui wakwe unë wa tutë na uja. Wamuramue mufumbu uyoo në müküü unë naa wauyaghaye urëmi gwa ufumbu wakwe. Wamuramue gusoko a uhunua saghami a atumami vakwe!” 3Vëgahanya, “Akuriwe Muungu! Yuki rayo rëganatëa gunto khae na khae!” 4Anyampaa avoo në vë makumi avëë na vane, nanë ntundo ëyoo në ine në mpanga vëgagwa uumbuma, vëgamukurya Muungu në wikhae gunto a itumbë ra utemi vëgahanya, “Amina! Haleluya, Akuriwe!”

Malëwa a uvire wa Mwankhoo

5Ruri ugadwëëra mwitumbë rasëë ra utemi uguhanya: “Müküri Muungu witu nyee atumami vakwe voong'e, nyoong'e nëmumukurya, anyughuu gwa aküü.” 6Kangë nëgatëgheeya ruri mwino ruri wa maumbë maküü a antu na mwino ruri wa majë mingë nanë irunkumo iküü, uguhanya, “Akuriëwe Muungu! Gusoko Müküü, Muungu witu Munya Udaho wibalëte! 7Nëguyanje na gëririsya; gumukumajue, gusoko itungo ra uvire wa Mwankhoo rajaa, na musyëda wighondanëya. 8Na wafiwe udaho wa giryëcha isaa ra gëtani në njija, në ëgufëmpëna ino!” (Isaa rasëë ra gëtani në njija në ntendo njija ya antu va Muungu.)

9Na mweeso agankhanëa, “Andëka ayaa: Bahu vasaa nëvësambëwe mu malëwa a uvire wa Mwankhoo!” Agankhanëa: “Nkhani iyii në ya tutë ya Muungu.” 10Uvii, nene nëgagwa uumbama usonge a mëghuu akwe ngufeja umükürya. Ëgweeso mweeso agankhanëa, “Reka, nene në mutumami mwino veve nanë auna vako; në vina usudanga wamwa na Yesu. Mükürye Muungu! Gusoko usudanga wamwa Yesu unë nkhoo a anyagëdaghu.”

Nyümbü në njeru nanë munya umënatëa nyümbü

11Kangë nëgaona irunde rërughuwë; na kuuko na ërëfo nyümbü ëmwedu njeru, na munya umënatëa nyumbu wayo ugutanwa “Muhuvëi na wa Tutë.” Wasuu uguramua na gekhuva gusoko a uja. 12Miho akwe ë mwino moto, na naa urëe ngaa nyingë gëtwë. Na wandëkëwe rina nënaa gutie muntu nëurëmanyie ëgweeso mweeso imwenedu. 13Naa uryëe isaa nënaa rëlovikëwe u saghami. Na rina rakwe wasuu në “Ukhani wa Muungu.” 14Majesi a girunde ëgamuhonga kunu vënatëe nyümbü njeru, na naaverëe masaa a gëtani, meru na maja. 15Itëmeo ryëghe ufuma umomo wakwe, na gwa itëmeo rasëë agavahuma ana arëme. Mweeso unë ujie gibala gwa mwaanga wa chuma na umëkhama divai gwa gife ga usëndëkëa sabibu ya ëkuurëo ëkuu ra Muungu Munya Udaho. 16Gunto a isaa rakwe, na gunto a mughuu wakwe, naa wandëkiwe rina, “Mutëmi wa Atëmi na Müküü wa Akuu.”

17Kangë nëgamwona malaëka umwedu wimëkie u yuva. Agarëa gwa ruri në üküü na uguyikhane anyonyi yoong'e nënaa irumie gunto, “Nji! Ihangwëyi itambëëmwe gwa malëwa mingë a Muungu. 18Nji mumëtaghune mëërë a atemi, a ahomi nëakuu, na antu në vina nguu, a nyümbü nanë anyauyinatëa vayo; nji mumëtaghune mëëreë a antu voong'e: në vina uhanghaaro nanë atughwa ne anyughu nanë aküü.”

19Kangë nëgarëona imwana ëroo itambëëmwe na atëmi va muurëmi na asikee vawe vihangwëye itambëëmwe gusoko vikhuve na uyoo nenaa wikhee gunto a nyumbu, itambëëmwe na ijesi rakwe. 20Imwana ëroo agakwatwa (gusoko rahumiwe), itambëëmwe na munyagëdaghu wa wegheghe nënaa ugutëndaa makura usonge akwe. (Gwa makura asaa, na waayaghaye vasaa nënaa vina mutojo wa imwana ëroo, na nënaa vëumëkurya sanamu akwe.) Imwana ëroo itambëëmwe nanë munyagëdaghu uyoo vëgajughutwa voong'e vavëë, kunu afanga ryu, mukhatë a irambo në ryakie moto wa gëbirigitë. 21Majesi awe ëgauraghwa gwa itëmëo nënaa rëdwëëre umomo wamwa uyoo nëumënatye nyümbü. Nyonyi yoong'e igikuta gwa nyama yawe.

Currently Selected:

Ukunukuo 19: RIMRC

Highlight

Copy

Compare