LUKA 6
6
1Kazu i le’de luŋa lo sabatolo‚ ku Yesu laga lu ŋeradru i melesiŋo kata‚ lotodiniki ti lepe kilo amimirindra kuweto ti kinyo kilo i pupuwazi kase kenisini a leo i nyei. 2’Bo Farisayo ku’de kilo druga piza adi‚ “Ta kondra kulia naga kukuzuna aku rugo i luŋa lo sabatolo gbandra ya?” 3Yesu druga teyitokindro ko adi‚ “Ta aku keni kulia naga ma Dawidi kondri ti lepe gbo ku mago kine‚ lepe ku ŋutulu laga kasi lepe kilo ya? 4Lepe alubo ku Ŋun kadi yu‚ druga ’dumundra i nyosu mugati naga na ’delaki ku Ŋun i koŋo yu kine‚ ’bo lepe druga tikindra ŋutulu laga ku lepeni kilo itro‚ kine mugati naga ŋutulu ku’de ani romoki nyosu kine‚ ’bo bita ka’i’ila ka’delo lo nyosu.” 5Yesu druga takindra ko adi‚ “Ŋiro lo ŋutulo laga a mata lo sabatolo.” 6Nyenaga i le’de luŋa lo sabatolo Yesu alubo i kadi naga a momorena kata yu i togo’yu, ti le’de ŋutu lu yu de, keni lo lepe lo lutate ilo aliwa. 7Katogolo ti kukuzuna kilo druga medra Yesu go go, adi ŋona lepe itotoru ŋutulo i luŋa lo sabatolo‚ ma se rumbi kulia na soyini lepe ’busa. 8’Bo Yesu adeni rambu na teiliko kasiko kilo‚ lepe druga takindra ŋutu ŋani laga ku keni a liwalo adi‚ “Pondri ku lirani nide.” Nyena ŋini lepe ku lira yu de. 9Yesu druga piza ko adi‚ “Na piza ta, kukuzuna nyadru ti kulia na’bu konani i luŋa lo sabatolo katani kugbo kulia naro, na riteni ru, kugbo na tukarakini ru ya?” 10Lepe druga medra koŋa giri, druga takindra ŋutulo adi, “Rine keni lolu ilo.” Lepe druga kondra de‚ keni lo lepelo druga totoruwe. 11Katazi kasiko kilo druga trotrori trotrori, ko druga monga kase dridriŋini adi ma se kondra Yesu adinyo. 12I nu baŋe de Yesu druga lupodru i mere ki yu i magu. Lepe druga saka wari i magu na Ŋun. 13Ku kana naga awara‚ lepe druga lungu lotodiniki kanye kilo‚ druga nyumbo mere gele konye mure kilo kasiko katani lo luŋu lepe a lososonyo kilo; 14Simona lo luŋu a Petero‚ ku Anderia, luŋase lo lepelo‚ ku Yakobo seku Yoane‚ ku Filipo seku Baritolomayo, 15ku Matayo seku Toma‚ ku Yakobo laga a ŋiro lo Alifayo, ku Simona lo luŋu a Zelote ilo‚ 16ku Yuda‚ ŋiro lo Yakobo‚ ku Yuda laga lo Kariota lo inyokindro lepe mundraralo. 17Yesu druga kiyundra kani kasi ko kugele i ka naga a ’darina kini‚ ku lotodiniki ti lepe kilo rodri ku mongoyo na ŋutulu lo ŋiyu Yudaya ku Yerusalema ku kutio ti suburi laga kasi Turo seku Sidona i lagani kilo‚ lo pondra i yinga na lepe kilo ma se ku toruweni tatuwa kase kine ’busa. 18Ŋutulu laga amoka ku yukala naro kilo druga totoruwe. 19Mongoyo na ŋutulu giri druga ga’yu ’bo’yu na lepe igbonaga teriŋina ina lupundro ku lepe i mugu yu i toruzo na koŋa giri ina. 20Yesu druga medra lotodiniki kanye kilo‚ druga takindra ko adi‚ “Koŋo na’buna ina a nasu ta laga a lemerika kilo‚ igbonaga tumata na Ŋun ina a nasuna. 21“Koŋo na’buna ina a nasu ta lo tika ku mago tinade kilo igbonaga ta ma lu iyiyimo ina. “Koŋo na’buna ina a nasu‚ ta lo gbigbiye tinade kilo‚ igbonaga ta ma lu izozonya ina. 22“Koŋo na’buna ina a nasu‚ ta laga kugbo ŋutu kilo ŋmoza ta a loro‚ kugbo tokodya ta‚ ku ’dadru ta‚ kugbo redra kari kasu kine ku kulia ti Ŋiro lo ŋutulu kine! 23Nyolanita nyola i lu luŋa de, latunita latu ku nyola ŋanina, igbonaga meteta, rope lasulo a druma i ’diko yu. ’Bo kazu merenyezi kasiko kilo akondra de ku kakeyo kilo yu itro. 24“ ’Bo dreliana ina a nasu ta laga a korineko kilo, igbonaga ta arumbi suka na teiliko kasu kilo azo ina. 25“Dreliana ina a nasu ta laga lo yimo tinade kilo, igbonaga ta ma lu ititika ku mago ina. “Dreliana ina a nasu ta laga lo zonya tinade kilo, igbonaga ta ma lu igbigbiye ku lulueto ina. 26“Dreliana ina a nasu, kugbo ŋutulu kilo giri tazu kulia naga a na’bu kasu ki‚ igbonaga merenyezi kasiko kilo kazu akondra de ku kakeyo ti ’bure kilo kini ina. 27“ ’Bo na takindra ta lo yinga kulia kine kilo de‚ Nyareta nya mero kasu kilo. Koneta ŋutulu lo ŋmoza ta kilo a lo’bu. 28’Borineta ŋutulu lo lombu ta kilo. Maketa Ŋun ku ŋutulu lo momorozu ta kilo. 29Ku le’de ŋutu laga anangu do i gbangiri‚ yoŋaki lepe le’delo itro. Ku ŋutu lo ’dumadru bongo nonu na kaŋona‚ ku gogoki lepe na kidona. 30Tiki ŋutulu giri lo magu kapa konuni kilo. Ku ŋutu lo ’dumadru kapazi kolu kilo‚ ku buburu ko ’do. 31Be naga ma ta nyadri adi ti ŋutu kilo kone kasuni ina‚ koneta de kasikoni itro. 32“Ku ta nyadru ŋutulu lo nyadru ta kilo‚ ta irumbi pura naga inyo ya? Katoronya kilo nyadru ŋutulu lo nyadru ko kilo. 33’Bo ku ta lo kondra a lo’bu ku ŋutulu lo kondra ta a lo’bu kilo‚ ta irumbi pura naga inyo ya? Ŋutulu loro kilo kondra de ’do. 34’Bo ku ta lo tikindra mori i ŋutulu lo rami ta adi ta iku rumbi kasiko yu ’do kilo‚ ta irumbi pura naga inyo ya? ’Bo katoronya kilo tikindra katoronya ku’de kilo moriye kine adi ma ko teyitokindri se zozo. 35’Bo nyareta nya mero kasu kilo‚ koneta a na’bu‚ tikindrita mori‚ ti ta ani rambu adi iteteyitoki ta. Kuwade rope lasulo igbo’da a druma‚ ’bo ta igbo’da a ŋazi ti Ŋun laga Ki koru ilo‚ igbonaga lepe ilo gbo ku teili lo’bu ku ŋutulu laga ’ba iyete ku laga a loro kiloni ina. 36Gbo’dita ku ediyo be naga ma Monye lasulo gbo’dini ku ediyo ina. 37“Ku ŋeŋerita kulia‚ ka’bi ta ku ŋeraki kulia. Ku ŋeŋerakita ŋutulu kulia na tiga ko‚ ka’bi ta ku ŋeraki kulia na tiga ta. ’Dineta torozi ma torozi kasu kine ’di’diya ’do. 38Tikindrita, ma lu ititiki ta‚ ’bo more laga a lo’bulo, ku aruda zore kuwa dodoŋa‚ yeyeŋa piya piya ko itiki ta kasu kidoni‚ igbonaga imomoroki ta beti naga ma ta modyinina.” 39Lepe druga takindra ko kulia na guguma adi‚ “Ka’dolani lo kuwe laga ku konye a mudumudu ilo roromoki ’dolakindra mudumudu le’de kuwe ya? Ko mure katru aka ’do’dooro i drilina kata yuni ya? 40Lotodinikita le’de aku rodru katogoloni lonyelo, ’bo ŋutu gele gele kugbo atogolo a lo’bu lepe igbo’da beti katogoloni lonyelo. 41Do medra korodoti naga ku luŋosu i koyitanina ayu‚ ti do ani bonga kedini laga konu koyitani ilo gbandra ya? 42Kuwagi do roromoki takindra luŋosu adidinyo adi‚ ‘Luŋase‚ ti na ’dumara korodoti naga konu koyitanina kaŋo‚’ ti do lepe ku mugu aku medra kedini laga konu koyitani ilo ya? Do a lo toŋulupa, ’dotoro kedini laga konu koyitani ilo a nze‚ mo do buloni medra soso i ’dotodru na korodoti naga ku luŋosu i koyitanina. 43“Kedini laga a lo’bulo ani rada konye loro‚ ’bo kedini laga a lorolo ani rada konye lo’bu. 44Kedinilo dena ku konye kanye lepe kilo. Konye ti koligi kilo ani iya i kedini laga ku kakuwa i mugu, ’bo konye ti zabibu kilo ani iya i puruti i mugu. 45Ŋutu laga a lo’bulo tolupundro kulia naga a na’bu ti tokorine na’bu naga kanye teili yu kine, ’bo ŋutu laga a lorolo tolupundro naga a naro ti tokorine naro naga kanye kine, igbonaga kulia naga ma kutuna tazi kine ŋiyu ku kulia na zore i teili yu kine. 46“Ta lungu na a ‘Mata! Mata!’ ti ta ani kondra kulia naga ma na takindri ta kine gbandra ya? 47Ŋutu gele gele lo pondra kuweni‚ i yinga na kulia kuwe kine‚ i kondra na ko itro ilo‚ na ikpekpekindra ta adi lepe gbo beti inyo. 48Lepe gbo beti Ŋutu lo ’dugo kadi‚ lepe druga ’bokadru ka yu a nagulu koru, druga ’delakindra mukona i lele ki. ’Bo kugbo karelo laga azore, ku lorolo laga atulundro i kadi muguni ku teriŋi, aku romoki dodonga kadina tro, igbonaga a’duko a na’bu ina. 49’Bo kugbo ŋutu laga lo yinga kulia, ’bo ti ani kondra ko, lepe gbo beti ŋutu laga lo ’dugo kadi i sinyaki ki ’ba muko. Kugbo lorolo laga atulundro i kadi muguni‚ kadina druga ’du’duki wuleŋa gele‚ ’bo karaki na lepena a druma.”
Currently Selected:
LUKA 6: KNT77
Highlight
Share
Copy
Want to have your highlights saved across all your devices? Sign up or sign in
Kakwa New Testament © Bible Society of Uganda, 1974, 1977.