1 Korin 3
3
Osep ka tiboko ke Ida Tapolngon ila bokongon
1Sipmi. Oglou ngakaranga ngakar pelengon ke umu langka ngakare ke osep ka tididi Ano Itau kovok. Aurou. Ngakar pelengon ke umu langka ngakare ke osep ka tididi aitno lisak oglou ina. E eknikane umu dau umodong langka agau ke Krais ila pelengon. 2Ngakar pelengon ke umu ka langka sisu e ngakaranga ngakar pelengon ka langka ngangon dagar ke umu kovok. Kesua umakaranga ke pelengon langka ngangon da-gar kovok. E eknikane umu dau umakaranga kovok. 3Kesua umu dau umedidi aitno lumu oglou ina. E elio ka oglou ina e elio ka aitno lumu soulu ke lumu saten leklou e elio ka umotuk opmu pulu dau tidong ke umu. E elio tonari ka umodue io isak elio ka aitno lumu oglou ina tidue. Elio tonari osep ka taklak ina urok elio. 4Kesua gute kene wai langane. “Ngadidi Pol.” E gute silang wai langane. “Ngadidi Apolos.” Elio tonari dau due umu e umodong langka osep taklak ina.
5Deka umeile umu itau. Apo-los iye gute sei? E ngong Pol ngong gute sei? Imorwo Ida Tapolngon ila osep bokongon ina vala. E Ida Puda kar imi kenmi kenmi limem bokongon. Limem bokongon ma due umu ma aitno lumu dagar ke Krais. 6Ngong langka ngausak londo koke wan esle e Apolos langka iye baser aki duru ine. E Ida Tapolngon vala due ngangon polou anino. 7E langane. Gute ka usak wan angaine omba kovok e gute ka baser aki duru ine angaine omba kovok blang. Aurou. Ida Tapolngon ka due ngangon polou anino vala angaine omba. 8Gute ka usak wan e gute ka baser aki duru ine isak eriar e isak orwo Ida Tapolngon ila osep bokongon ina. E isak kensak kensak ma tidue urok klingen karanga ke urok bokongon. 9Imorwo Ida Tapolngon ila osep bokongon ina. E umu langka Ida Tapolngon ila yage. E umu blang langka Ida Tapolngon ila ninu.
Ida Tapolngon ila ninu
10Ida Tapolngon ila makai-ngan due ngong e ngapolou langka gute ka ile omur lokono ke ninu ina uringen. E ngasinsin opmu ka ninu napal munu ine. E gute silang uri ninu napal munu ke opmu tonari. Io osep pula ma tikere isak itau ke elio ka tiuri ninu ine. 11Umeile Ida Tapolngon rere Yesus Krais kodong langka iye opmu ka ninu dong dagar ine. E gute gesa blang karanga sin opmu leklou ka ma iye uri ninu napal munu ine kovok. 12E alo ka osep tiuri ninu napal munu ke opmu tonari ane langka osep leklou ma tiurie ke gol e osep leklou tiurie ke silva e osep leklou tiurie ke opmu ka inarak klingen omba lokono. E osep leklou ma tiurie ke akai e osep leklou ma tiurie ke ogu e osep leklou ma tiurie ke aber. 13Mase bokongon ka osep ka pula keniye tidue ma tipolou malak ke oklou ka Ida Tapolngon ma wade osep ka pula keniye ine. Oklou tonari ma polou langka eiou e Ida Tapolngon ma tok osep ka pula keniye kensak kensak urok bokongon ine ma tile urok bokongon itau koke soulu. 14Langka gute gesa uri ninu napal munu ke opmu tonari e eiou ngen ila ninu kovok ma gute tonari due ila klingen ine. 15E langka eiou ngen gute gesa ila ninu ane langka ila bokongon ma yagos e iye due ila klingen ine kovok. E dau gute tonari yagos kovok. Iye ma dong langka gute ka itepi iye ke eiou bauluk.
Ida Tapolngon ila ninu ite
16Umeile umu Ida Tapolngon ila ninu e Ano Itau dong ke aitno lumu kovok? Aurou. Umeile ine. 17Langka gute gesa due agegeng ke Ida Tapolngon ila ninu ma Ida Tapolngon due agegeng ke iye. Kesua umu Ida Tapolngon ila ninu ka iye rere ila ninu kodong.
18Umeile umu itau lama uma-yak umu pulu. Lama gute gesa dong airavu ke umu e ila ilengen omba ke wan ka taklak ina e aitno mter langane. “Lou ilengen omba.” Io wan ka itau iye songon ilengen tonari e ma aitno kaka ine vala. Iye due langane ma iye ile itau ke ilengen ka omba lokono. 19Kesua Ida Tapolngon vati ilengen ka taklak ina langka wan adai vala. Ida Tapolngon ila pelengon wai langane.
“Osep leklou aitno lisak mter langka urok ilengen ombatno e isak tona ti-karanga tidue wan bitna bitna. E Ida Tapolngon due elio tonari ma mke isak langka aure mke ongwa gesa.”#3.19 — Emritim pelengon langane ke Testamen Oglou Ina ke Jop 5.1.
20E Ida Tapolngon ila pelengon wai blang langane.
“Ida Puda ile wan ka osep ilengen ina aitno lisak mter ine kodong. Iye ile wan ka pula keniye ka tiwaiki tidue isak wan adai vala e ma tikaranga tipolou kovok.”#3.20 — Emritim pelengon langane ke Testamen Oglou Ina ke Buk Song 94.11.
21E langane. Umosongon elio ka umakakai osep angainsak. Wan ka pula keniye tidong ma tilua umu. 22Ngong Pol e gute Apolos e gute Pita imi imodong ma imolua umu. E taklak ane e mosongon e metengen e wan ka dong eknikane e wan ka mase ma tipolou isak ka pula keniye tidong ma tilua umu blang ma umopolou dagar lokono. 23E umu Krais ila osep e Krais iye Ida Tapolngon Otno Arang.
Currently Selected:
1 Korin 3: ANT
Highlight
Copy
Compare
Share
Want to have your highlights saved across all your devices? Sign up or sign in
copyright 2003 New Tribes Mission, Sanford, FL 32771
