1 Korin 16

Osep Korin ina tituktuk urok mani ma tilua osep Kristen leklou

1Ma ngawai ke mani ka umawaiki umotuktuke ma umolua Ida Tapolngon ila osep ka tidong ke Jerusalem ine. Ngapalongo Yesus ila osep ka tidong ke provins Galesia ine kodong e ngawaiki ma umu blang umodue elio eriar langka tidue. 2Ke Sande kene kene umu kenmu kenmu umotuk lumu mani ka umawaiki umolua osep ine. Deka umodue mani tonari dong para ke alo ka ngauti ke umu. 3Umu tona umerere osep leklou ma tipaur lumu mani la ke Ida Tapolngon ila osep ka tidong ke Jerusalem. Deka alo ka ngauti ke umu ma ngakar pas gesa ke osep tonari ma tikalke la. 4E alo ari langka aitno lungong mter langka itau ma ngala blang deka ma tigosok ngong imala.

Pol waiki la vati osep Korin ina

5Ma ngala ngavati osep ka tidong ke provins Masedonia paide. Deka mase ngauti ngapolou ke umu. 6Langka ma ngadong sasi boto kap umu koke aurou ngaile kovok. Koke ma ngadong kap umu la lama alo ka omur epen e engen ka dagar yagos. E alo ka ngala ke armok silang ma umolua ngong ma ngala. 7Ngawaiki ma ngadong sasi boto kap umu vala kovok. Langka Ida Puda waiki ngadong tauni boto kap umu ma ngadong kap umu. 8E ngawaiki ma ngadong ke armok Efesus la lama oklou Pentikos yagos.#16.8 — Pentikos. Ke tobor kene kene osep Yuda ina tidue rogo omba ka lana ine la ke alo ka Ida Tapolngon lua isak tisongon omur Isip. Deka ke oklou iselme ina tidue rogo omba silang. Rogo ane lana ine langane. Aitno lisak itau ke inarak ngangon ka polou ke taklak. Deka tidue rogo tonari ka tikakai Ida Tapolngon angaine tito ine. 9Kesua Ida Tapolngon kar bokongon omba ke ngong. E iye waiki ngadue bokongon tonari ma ngalua osep pula ma tipolou osep Kristen. E silang blang osep pula aitno lisak soulu ke lou bokongon e tiwaiki tidangdang ngong ine.

10Langka Timoti polou ke umu deka ma umolua iye ma iye dong itau kap umu e iye ulou tarna kovok. Kesua iye due Ida Puda ila bokongon eriar langka ngadue. 11E ngawaiki supmu leklou tipul dogur ke iye kovok. E aitno lumu itau ke iye ma umolua iye ke ila langan ma iye bauluk me ke ngong blang. Ma ngapara ke alo ka iye me kap sudo leklou. 12E udo aten Apolos aitno langane. Ngawai dagar ke iye ma iye la kap sudo leklou alo ka isak kla tivati umu. E aitno itau ine dau kovok. Mase langka aitno itau ine ma iye uti la ke umu.

13E ma umaplau umu itau e umodong dagar lokono ke aitno lumu ila dagar ka la ke Ida Tapolngon. Ma umodong dagar e ma umoulou tarna lumu ke wan gesa kovok. 14Aling aling ma umu lana umu ke osep ka pula keniye. Deka elio ane ma kading lumu elio ka pula keniye ka umodue.

15Sipmi. Umeile gute Stefanas e ila osua. Tipolou osep Kristen mgo ke osep ka tidong ke provins Akaia. Ke aitno lisak tidue boko-ngon ka lua Ida Tapolngon ila osep. 16Ngawai dagar ke umu ma ume-didi osep ka langane urok elio. E osep ka tilua osep leklou e ka tidue bokongon kap isak.

17Gute Stefanas e gute For-tunatus e gute Akaikus time ke ngong e aitno lungong neser alo ka ngavati isak. Kesua umu ka pula keniye umakaranga umomo umavati ngong kovok. 18E tipolou ke ngong e tidue aitno lungong itau langka tidue aitno lumu itau blang. E ma aitno lumu itau ke osep ka langane e umoklingen urok pelengon.

19Yesus ila osep urok sios keniye ka tidong ke provins Esia tiwai “oklou itau” ke umu. Gute Akwila orwo esna Prisila tigosok Yesus ila osep ka tiduni pulu ke urok ninu tiwai “oklou itau” ke umu kesua Ida Puda dong. 20Sudo ka tidong kap imi tiwai “oklou itau” ke umu. E umu ka Yesus ila osep umawai “oklou itau” pulu e umesekan pulu.

21Ngong Pol ngasogo pele-ngon ane ke lungu. Ngawai “oklou itau” ke umu. 22Langka gute gesa lana iye ke Ida Puda kovok ma agegeng polou ke iye. E ngawaiki Ngau Puda suong me. 23Ngawaiki ma Ida Puda Yesus ila makaingan dong kap umu. 24E ngong lana ngong ke umu kesua ite Krais Yesus ila osep ite.

Currently Selected:

1 Korin 16: ANT

Highlight

Copy

Compare