Malumbo 94
94
1Ee Mzuri, We Izuwa mwenye kuihija‐lawi: We Izuwa mwenye kuihija lawi, ung’ae.
2Ukuwushije, We mchili wa masanga: uwaihie wenye mafuti sandu iwawe.
3Mzuri, mtano rini wawiwi: mtano rini wawiwi weneng’ara?
4Weketa toghoyo, weteta hena mafuti: waketi‐viwiwi wose wekuisisa.
5Wewabaabaa wandu wako, Ee Mzuri: na weurisha wasi uhodja wako.
6Wekoma ngawiani na mugheni: wekoma na tiri wesina wawee.
7Na weghamba. Mzuri tekawoneye: nete Izuwa wa Yakobo tekakusareye.
8Kusareni, unywi musina kucha ghati ya wandu: na unywi mutomode, ni rini munecha?
9Ula elihanda isikio, tekasikiaye: ula eliarehe ijiso, tekawonaye.
10Ula eloshije mbare, tekachilieye: Eye ewalosha wandu watisiwe.
11Mzuri ematisiwe makusaro ma wandu: ti nimo mahaya.
12Etasiwa mundu ula umloshije, Ee Mzuri: na umlosha ghati ya sheria lako.
13Nesa umwinge lusoghoko ghati ya misi ya wasi: mtano iwongo lineikaliforwe hena wasui‐Izuwa.
14Amu Mzuri tekawatagheye wandu wakwe: nete tekaushigheye uhodjo wakwe.
15Amu wuchili uneihundukia ngalo: wose werongeke ngoroni weneiratera.
16Niani enewuka hena lwangu wanga ya waareha‐viwiwi: niani eneimuka hena lwangu wanga ya waketi‐viwiwi?
17Mzuri asaoka lughenjo lwangu: ngoma yangu afuhi itua ghati ya kuhuja.
18Nikinaghambe, Kughu kwangu kutandarika: lusario lwako, Ee Mzuri, lunitiriche.
19Ghati ya makusaro meingi ma ndeni hangu: madindijo mako meniiseje ngoma.
20Kiikayo kya owiwi kioke na lushanganyo na We: kiareha mateshanyo hena itanawo?
21Wekuwunganya hamwe wanga ya ngoma yakwe mwenye ngalo: weichilia sakame isina kutekwa.
22Kake Mzuri eokie mnara wangu ukoiye: na Izuwa wangu ibwe la matukio langu.
23Naye eete wanga yawo owiwi wawo wenye, na enewachwa ghati ya viwiwi vyawo: Mzuri Izuwa wetu enewachwia hae.
Currently Selected:
Malumbo 94: TAVETA
Highlight
Copy
Compare
Share
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
