Malumbo 73
73
MUSI 14 CHAMAGHERI
1Kididi Izuwa wedi hena Israeli: hena wala wezerre ngoro.
2Kake hena mi, maghu mangu afuhi na kuteka: mawato mangu mekundie kushereta.
3Amu niokie nikiwaneng’a wetomode: nikinawona ti wawiwi weketa nguwari.
4Amu tehenaho machungo ghati ya kifwa kyawo: kake zinya yawo iduwie.
5Teweingiawo na wasi sa waghenji: nete tewerishwa wukiwa hamwe na waghenji.
6Amu ii mafuti meoho sa luse singoni hawo: kuketa‐zinya kwawafinikira sa suke ya kudoka.
7Meso mawo mevimba hena kubanda: wevihete vikela makusaro ma ngoro.
8Wesola, na ghati ya owiwi weteta mainyalo: weteta vibaha.
9Wewika itumbu lawo wanga: lumi lwawo lwasela ghati ya masanga.
10Amu ii wandu wakwe wahunduka na uko: mbombe ja kuizua jakurwa nawo.
11Na weghamba, Nize Izuwa etisiwa: kutisiwa kuoho hakwe eikee wanga?
12Yoa, awa niwo wawiwi: nawo, wekisowoka misi yose, wenetijiwa mali.
13Kididi nazerrija ngoro yangu huwo: naoja mikono yangu ghati ya kusatekwa.
14Hemusi puti narishwa wukiwa: na kuihijwa kwangu heyawo yose.
15Kwakicha nitetie, Nineteta huwo: yoa, nawaketia kirenge irika la waana wako.
16Nikinagheshijie nize naidima kukitisiwa iki: iokie ndima mesoni hangu.
17Mtano nikinaingie na heshenete ha Izuwa: nikatwarija mwidiwiko wawo.
18Kididi uwawike na handu hesherete: uwaghusha si mtano lunyamaro.
19Nize weoshwa mrabu chwi: weliwa den’ge na maitusho.
20Sa ndoto mundu ekiidiwa kuwuka: ni huwo, Ee Mzuri, ukiwuka unedaa sanamu yawo.
21Amu ngoro yangu ishiniwe: nikasomwa vikudi.
22Nimi nitomode huwo nisitisiwa: niokie sa nyama msongorana wako.
23Kake nioho misi yose hamwe nawe: unigura mkono wangu wa kuume.
24Uneniwondja nzia hena mburi yako: ikuade uneniuhia hena kirumi.
25Niani nina wanga nde we: nete tehena masangeni nimkundie kukela we.
26Muri wangu usokea, na ngoro yangu: Izuwa niye zinya ya ngoro yangu na ngata yangu ndarasi.
27Amu, yoa, wala weoho hae kufuma hako weneteka: uwanyamara wala wose wekuarehia lushindo.
28Kake kyedi hena mi kumsongeria Izuwa; namwosha Mzuri Izuwa lumatukio lwangu: nesa niliye mburi ya ndima jose jako.
Currently Selected:
Malumbo 73: TAVETA
Highlight
Copy
Compare
Share
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
