Mihiro ya Waondo 2
2
1Musi wa Pentekote ukinafike wakaoka wose hena ngoro mwe hamwe. 2Chwii likaoka kufuma wanga ighonda sa ngungu irurume hena zinya, ikaizuja nyumba yose weokie weikee. 3Makawonwa hawo sa malumi ma moto meghawanyike, ukaikaa wanga yawo wose mwe‐mwe. 4Wose wakaizua Ngoma Mshenete, wakawoka kuteta na malumi mengi, sandu Ngoma ewaingie kuteta.
5Wakaoka wekitua Yerusalemi Wayahudi, wandu waguri‐mbea wa kufuma mbare jose si ya wanga. 6Ighonda ili likinasikiwe, matorano wakawunganyika, wakarighiwa, amu ya kusikia mundu ose weghamba kiteto kyakwe. 7Wakarighiwa wose wakaing’asiwa, wekiteta, Yoeni awa weteta siwo Wagalilaya wose? 8Nize twasikia mundu ose kiteto kyakwe ekiwoniwe, 9Waparthi na Wamedi, na Waelamiti, nawo wetue Mesopotamia, 10Uyahudi, Kappadokia, Ponto na Asia, Frugia na Pamfulia, Misri na masanga ma Libua hena Kurene, Warumi wagheni, 11Wayahudi na waongofu, Wakrete na Waarabu, twawasikia awa wekiteta hena viteto vyetu ndima mbaha jakwe Izuwa. 12Wakarighiwa wose wakaingiwa ni fole, wekiwurrana, Kindu iki nikini? 13Wengi wekisola wakaghamba, Weengee na mawa masha.
14Akaimuka Petro na wala ikumi na mwe, akawushija ighonda lakwe akateta, Wome Wayahudi na wose muikee Yerusalemi, mutisiwe ivi, musikije viteto vyangu. 15Amu awa teweengee sandu mugheshijia, amu ni saa ya katatu ya hemusi. 16Kake iki nikyo kitetiwe na mroti Yeoli,
17“Na ineoka ghati ya misi ya kuidiwika, eteta Izuwa,
Ninemimina ya Ngoma yangu wanga ya wandu wose;
Waana wenyu wa kiume na wa kiche wenerota,
Na wabwange wenyu wenewona ndoto,
Na waghosi wenyu weneota ndoto.
18Na wanga ya wazoro wangu wa kiume na wa kiche,
Misi ila ninemimina ya Ngoma yangu, nawo wenerota.
19Nineng’ola marighio ghati ya wanga,
Na maluwano ghati ya masanga si,
Sakame na moto na mruki wa moshi.
20Zano inegharuka kuoka kija,
Na mweji kuoka sakame,
Kuwoka usimeza musi wa Mzuri,
Musi ula mbaha na wa kufolesha.
21Na ineoka ose eneitanga izina la Mzuri enekijwa.”
22Unywi wome Waisraeli, sikieni viteto ivi; Yesu wa Nazareti, mundu ewondjwa hetu na Izuwa hena ndima mbaha na marighio na maluwano emaketie Izuwa hena ye ghati yenyu, sandu na unywi wenye mwatisiwa; 23ye, eking’olwa hena mburi iwikwe na kutisiwa kwakwe Izuwa, mumwuhie, na hena mikono miwiwi mukambanika, mukamkoma. 24Uu Izuwa embushie, ekijughua kuwawiwa kwa kifwa, amu teidimika agurwe nakyo. 25Amu Daudi etetie mburi yakwe,
“Nimbonie Mzuri misi yose msongorana wa wusho wangu,
Amu eoho hena mkono wa kuume wangu, nisidedemishwa.
26Hena iyo ngoro yangu ikaisejwa, lumi lwangu lukaizihirwa,
Na muri wangu pia uneikaa ghati ya luing’idaki:
27Amu touneshigha ngoma yangu ghati ya ahera,
Nete touneng’ola Mshenete wako awone kunyamarwa.
28Wanilosha nzia ya moo:
Uneniizuja na luizihirwo hena wusho wako.”
29Wome wandwetu, nisina fole nimburre mburi ya mughosi Daudi, ti efwie, na mbira yakwe ioho hetu mtano yoo. 30Amu ii ekioka mroti, na ekitisiwa ti Izuwa emrarie hena kiraro ti ghati ya kuwonwa kwa kikudi kyakwe hena muri enemwete Masihi, aikae kiikayoni hakwe, 31ekiwona iki kuwoka akutetie kuruka kwakwe Masihi, ti teshigwaye ghati ya ahera, nete muri wakwe touwonie kunyamarwa. 32Uu Yesu Izuwa embushie, na uswi wose tukiwonie. 33Amu ii ekikwejwa hena mkono wa kuume wa Izuwa, na ekiingwa ni Apa lutemiano lwa Ngoma Mshenete, ekimimina iki, mukiwona na mukisikia. 34Amu Daudi tekweaye wanga: kake eghamba mwenye,
“Mzuri akamburra Mzuri wangu, Ikaa hena mkono wangu wa kuume,
35Mtano nineikanigere maring’a mako si ya maghu mako.”
36Nyumba yose ya Israeli wakitisiwe iki nezo, ti Izuwa emwosha uu Yesu, mumbanike, na Mzuri na Masihi.
37Wekinasikie ivi wakasomwa ngoro, wakamburra Petro na Waondo waghenji, Tuketeze, wome wandwetu? 38Petro akawawurra, Chweni‐muti, mubatizwe mundu ose wenyu hena izina la Yesu Masihi hena luwushijio lwa ng’oki jenyu; na muneingwa kiingijo kya Ngoma Mshenete. 39Amu henyu nilu lutemiano, na hena waana wenyu, na hena wose weoho hae, niwo wose Mzuri Izuwa wetu eneitanga hakwe. 40Hena viteto vingiwa akang’ola mburi, akawaaghanya, ekiteta, Mukukije ghati ya irika ili litekie. 41Nawo wekiuhia kiteto kyakwe wakabatizwa; wakaongejika musi ula sa wandu maghana makumi matatu. 42Wakaikaa nezo ghati ya kuloshwa kwa waondo, na ulungano, na kubaa ibumunda, na kuomba.
43Fole ikawazia wandu wose: marighio meingi na maluwano makaketwa na waondo. 44Wose weitikija wakaoka hamwe, wakashanganya vindu vyose: 45wakatagha vila wevihete na mali yawo, wakaghawia wose sandu mundu ose eokie ekiduhuka. 46Na musi hena musi, wekiikaa nezo hena ngoro mwe ghati ya hekalu, na wekibaa ibumunda hena nyumba, wakala kidjo kyawo hena luizihirwo na ngoro yedi. 47Wekimwisisa Izuwa, na wekiizihira wandu wose. Mzuri akaongeja hawo musi hena musi wala weokie wekikijwa.
Currently Selected:
Mihiro ya Waondo 2: TAVETA
Highlight
Copy
Compare
Share
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
