Genese 38
38
Iuda i Tamara ila
1Iuda areve apoheari haitapape la hoa are Adulami haela rare Hira ve leia helari aeape. 2Iuda Kanana haela ae ve mari rare Sua eavape; are arero mai pae le laeape. 3Are ero eavi a akore epape, are akore rare Era rare itavape. 4Are aeka ero eavi ape kai akore epai rare Onana rare itavape. 5Are kai aeka ero eavi ape kai akore epai arero rare Sela rare itavape. Are arero epape hoa are ita rare Kesiba aeape.
6Kahara, Iuda areve akore koare Era v'ila mari rare Tamara laeape. 7Aka Iuda ve akore koare, Era, Iehova oropa ve heaha leipe, laelave Iehova arero huru hape. 8Aireaki Iuda Onana maeape, ave akoreapo ve uva maitava koarakive, are v'ila akoremari erakive, heroe. 9Aka Onana ore leipe, are laria koaraki akoremari va areve rare ve leivahaea va ka, laelave are akoreapo ve uva maitava koarai uavape la hoa, are elare maea ma naoae mea ve hakaitapape, are akoreapo v'ila mere epaki ave. 10Kahara, are leipe la mai Aualari Iehova ikivere au leila, laelave are arero kara huru hape. 11Laelave Iuda areve akore ve uamari maitava Tamara maria maeape: “Ava uva maitava hovea ave oa ve uvi aiai arave akore Sela ahai eapapo hovea leikilai.” Ehovea are oaoka leipe, are huhohoaha hovea hovea apaki ave. Laelave Tamara hoai are havahu ve oa ve uvi aeape.
12Aireaki hare aea, Iuda ve uva, Sua ve mari, le apape. Iuda ve ikihuru hoa karia leipe la hoa are areve mamoe kolo haelaeaki haela Timena leia pekape, are i areve loaukai Adulami haela Hira hoa haroapo ila. 13Ere Tamara maeape: “Ave vila ve oa mamoe ve maea kolo haelaeakive Timena lapekaila.” 14Are maitava la pura helauka, haro pura haro kokaukape; are elare maea kara pura kohahape. Are Timena ve la okiharo ikupa hoa ve ita rare Enaima, oki poe ve haiavape, ehovea are ovohae eavape Sela va ahai eapapo leipe, kai Iuda arero Tamara maepakive au avaraila.
15Iuda arero eavape la hoa, areve ikikekela are va harari uamari, ehovea are elare oropape le kokauka. 16Are oki poe ve leia iki arero maeape: “Ekela, ara a i hareho uavakive.” Ehovea are ore ka are areve akore ve uva maitava. Are arero maeape: “A va araro le kavale avikiarakilai, ehovea ara i uavakive ha?” 17Are kavale maeape: “Ara aro nanikosi mere, arave hiru ve, paraeakilai.” Are arero maeape: “A va araro okoare ve ihova avikiara, ara kiva lei lei a nanikosi mere kiparaeakilai ha?” 18Are maeape: “Ara le ihova aro avarakilai ha?” Are maeape: “Ave la maimari, kai ave hopa hahaki ela, kai a mai paeaki la mai kaika kara.” Kahara, are erero arero aiarape. Are arero koarai uavape. Are are v'ila ero leipe. 19La hoa, are urai ai la haro pura helauka areve maitava maea pura aeka oreaupe.
20Iuda nanikosi mere areve Adulami haela kake paraeape, ehovea areve la okoare ihova la uamari ve mai ve avakive; la hoa are arero au eavaila. 21Are la ita haela velavela leipe: “Enaima la oki poe ve lahaiavaila harari uamari lahoa aeave ha?” Ere maeape: “Maia harari uamari karia.” 22Laelave are helari ai Iuda maeape: “Ara arero au koarakue, aeka la ita haela araro kimaeape: ‘Harari uamari maia karia’.” 23Kahara, Iuda maeape: “Heroe, are la eharu au hiki aeakive, haela ela v'ila area keaki ave. A eavaki, ara ma nanikosi mere laparaeaila, aka a arero au koarakue.”
24Papare ilehoila karia leipe la hoa ere Iuda maeape: “Ave la akore ve uva maitava, Tamara, korea mai leipe; are kai leia ve ero ila leipe.” Iuda maeape: “Arero lai kihoai a veakive.” 25Ere arero lai kihoaupe la hoa, are areve vila ve oa oharo maria paraeape: “Ma eharu v'ila la haela araro lei ero leipe.” Are kai maeape: “Eavaki, ma va leita ve eharu, maimari, hopa ela, i mai kaika ila?” 26La hoa Iuda areve la eharu hihika maeape: “Ara va mai ehoe perehekai, ara va haiae iele, ehovea ara arero arave akore Sela ve uva ve au avaraila.” Kahara, are aireaki are i au uavaila.
27Kahara, areve akore epaki hoa horerape la hoa, areve eharau ureve va maraehae ila. 28Are avaha kakare lei epakive leipe la hoa, akore ai ve mai oropa kihorerape; koaraki uamari areve la mai ela ovoka hahai mari maeape: “Ma va oropa lepaila akore.” 29Aka areve mai aeka helari araeape la hoa, akore ae hoa haroapo horerape; are kai arero maeape: “A va learia lahoreraila ha? A havahu elare oki lalaila!” Laelave are arero rare Peresa rare itavape. 30Apoheari aire epape, mai ela ovoka hahape la akore; ere arero rare Sera rare itavape.
Currently Selected:
Genese 38: ORO
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
