2 Thessalonia 2
2
Amua ve ekeki oharo haeae uku
1Apavara e, ela ero here leiro, elaviilave Amua Iesu Keriso ve kihoreraki oharo v'ila, elaviila are i hareho korukaiavahaeaki la hoa ve oharo v'ila. 2Eve oropa la kekela aheke haerapa v'arekaea; ehovea ove, aka oharo aea, aka ela ve paraeape oharo hovea, e va horahora v'arekaea, ehovea Keriso ve hare va maea maea la. 3Haela ero amuraea v'arekaea — Are va oropa kihorera va ka — haela ve hihilauki hoa oropa — aeva mai heaha haela hihika oropa leikilai, havoavaki akore va la. 4Are va pelaea leivila, are Aualari ve iri haela iele, are Aualari ve morapaeaki eharu oaria hahari leivila — are Aualari ve Hehe Uvi haiavavila, elare maea Aualari ve maea hovea hovea leivila. 5E ikikekela va ka ha? Ara e i hareho aeape la hoa ara ma eharu ero kileavahaeape. 6E v'ore are va kihorera va ka, ehovea la, ehovea areve ikivere iele hoa are hihika vavavakilai. 7Ehovea pupu haure leiki mai ma hoa muruhari horova leivila — aka hereavaki haela me aeave: Are v'aiai areve hereavaki hoa. 8La hoa pupu haure leiki haela hihika leikilai, Amua Iesu Keriso arero ape ve mahuvu v'ila harilai. Are areve ekeki hoa la haela ve horova naoae naoae leikilai. 9La pupu haure leiki haela va hihika leikilai iele, ehovea Satan ve horova areve aheke i ihova i ikihorahora leiki horova oaria ila; 10Aeva hehepo i mai haeae oaria ila, ehovea apihaeaki haela ere va apihaeaki iele, ehovea erero ovokake avaraki la O iele ere ikivere au laila: 11Laelave Aualari erero horova ve au amuraeavila, ehovea ere opore oharo iki kelavalula. 12O iele, iki au kelavaila la haela kai mai heaha ikivere leivahaeape la haela Aualari heheavakilai.
Thank you oharo i ivaiva ila
13Ela va mea oaria Aualari e v'ila thank you oharo arive, heroe, Amua ve ikivere iele apavara, ehovea Aualari oropa hoa ero lei ovokake leikive ikivere leipe, ehovea ove eve iki ureve veveroro leivahaeai o iele kelavape. 14Are ero elave iroro v'ila itavape ehovea ma; laria, e va elaviilave Amua Iesu Keriso ve mekakure koarakilai, 15Laelave, apavara e, e va aheke apeaki; ero kileavahaeape la pupu kiva auhohi leivahaeaki, e oharo v'ila aka elave hohoa v'ila ore leivahaeape la pupu.
16Elaviilave Amua Iesu Keriso kai ikiheroe meru v'ila elaro ikiheheroe lei hakakaeape la Oa Aualari, eve iki ureve lei aheke leivahaeaki, ikiheroe meru la okiharo ve, 17are ero iki ureve hakakeakilai, oharo veveke i horova veveke ila la okiharo ve.
Published by the British and Foreign Bible Society 1963-1972