O Gagagapalag 14

1Naŋ me ge tamaike a Ikonium, irara me kalo tuwale ilo ima siwo tuwale nora Israel, wa me vava; wa o sul we qoqo, ira Israel wa ira ta Grekia, me nomtup apena. 2Pa ira Israel gate nomtup me ge lakosa nalolora tagvanua, wa me ge si neira a lolotatas o retatasiu. 3O manigiu o ine irarua me toga maul aia, we wawaŋ alo i Lord, wa ni me gaganag we tur ape vavae ni me sogov ti, we vasoal ma si a ge o vaglala wa o vasasa ŋaŋ mun napanenrara. 4Pa o sul talo laqlaqe vanua ilone me vugwora; wa o tuaniu me pul amera Israel, wa tuaniu amera sala. 5Wa ira tagvanua wa ira Israel mulaŋ tara liwoa gorora me qeteg rowo saratuwale ivunanrara, si a gege anumag rara, wa si a patuŋ rara. 6Wa irara me gilala apena, qara toa ilo laqlaqe vanua ŋaŋ ta Lukaonia, o Lustra wa o Derbe, wa ilo vanua we toga waliog. 7Wa irarua me gaganag o lea we wia aia.

8Wa isei a Lustra we pute, naraŋona me mawurawura, o qurus alo toqan ravevena ran ma, wa ni gate mule kelkel ilo tea. 9I gene iloke me tiŋqoro i Paul we vavava; wa ni me sagaragia, ti ilo o nomtup amaia we tira ape we ge esua. 10Ti vava eleele wa, Tavaraka taniniga mun naraŋoma; naŋ ti roworaka, ti mule kelkel. 11Wa o sul nol me ilo o sava i Paul me ge, we la kalo naliŋara, we vava ta Lukaonia wa, Ra god me tarape tanun me siwo ma sur inina. 12Wa neira me log i Barnabas si Dis, wa i Paul si Hermes, ape qeteg vavae amaia. 13Wa i oloolo anan Dis we toga ape nago vanua ti la ma o kau mereata ŋaŋ wa o makomako ŋaŋ ape mategeara, wa ineia wa o sul we maros we oloolo. 14Pa ira sala, i Paul tana i Barnabas, me roŋotag apena, we gape sare norar o siopa, we wal lue ilo vatitne sul, we awoawo, 15we vet wa, Ragai, kamiu we ge o ike ape sava? Ikara mulaŋ o tanun, o matevui tuwale tama namatevumiu, wa we maŋasag o lea we wia mun kamiu, si kamiu a vusiag kel nan o gene worawora iloke sur God i esu, ni me tiŋ o tuka, wa o tano, wa o lama, wa o ronronotar ŋaŋ alolora. 16Wa alo taraŋ tanun me paso veta ni me ukeg o veve sul nol neira mule matapura alo matesalara. 17Panava ni gate tivtag kelua si nipea gaganag luea, pa ti gagapalag we wia, ti le ma vunana mun kamiu o wena, wa o vulesinaga; we ge ura natoqamiu vag o sinaga wa o qaraqara apena. 18Wa mantagai tie si rara a gatgatogoro matila o sul mun o vavae tamaike, wa oloolo mun rara.

19Pa o tuan tanun tamaira Israel me mule ma nan o Antiokia wa o Ikonium, me pes lai o sul; wa ineira me patuŋ paso i Paul, me rave luea nan o laqlaqe vanua, we nonom si ni me mate veta. 20Panava ira tiŋqoro me sasalev waliogia, pa ti tavaraka, ti mule pata ilo laqlaqe vanua; wa tavala maran irarua tana i Barnabas me rowolue, me mule i Derbe. 21Wa rarua me gaganag paso o lea we wia alo laqlaqe vanua ilone, wa me ge tiŋqoro tuaniu we qoqo, qara vusiag kel i Lustra, wa i Ikonium, wa i Antiokia; 22we varagai naatara tiŋqoro, wa we vet maremare mun neira, si neira a tira netenete alo liŋe nomtup; wa si alo roŋovivtig we qoqo inina te mule pata ilo marana non God. 23Wa irara me vono paso o tuan tamatua val loglue, wa me tataro mun o garagara mamasa, qara sueg neira mun i Lord, neira me nomtupua veta. 24Wa me mule raveaglue Pisidia, irarua qara niŋa a Pamphulia. 25Wa me gaganag o vavae a Perga qara siwo i Atalia. 26Wa irarua me gamo nan aia i Antiokia, me ukeg rarua ti we tuai aia mun o sogov mon God ape o gagapalag ilone qara ge paso ilokenake. 27Naŋ me niŋa aia, irarua me suware tuwale ma o loglue, qara gaganag tasovule o gene ŋaŋ God me ge ti mun rarua; wa apen i Lord me waka veta o mate nomtup mun o sul ŋaŋ we sea. 28Wa irarua me toga vagamaul amera tiŋqoro.

Currently Selected:

O Gagagapalag 14: MOTA

Highlight

Copy