Англунимос 6

Манушэнго вырытимос пэ пхув

1Сар ашыля майбут лэ манушэн пэ пхув, лэндэ аракхадёнаспэ э щея. 2Э шавэ лэ Дэвлэсти додикхлэ, со э щея лэ манушэнди шукарнэ, и ашыле лэн тэ лэн пала пэстэ, кажно лэлас кола, сави лэсти чялиля.

3О РАЙ пхэндя:

— Най пэ всявори время авэла Мэрно Духо андо мануш. Вов исы тила, Мэ дав лэнди 120 бэршэн о жувимос.

4Андэ кола деса ай тунче сас пэ пхув фартэ нефилимуря#6.4 Нико на ганэл, сар када тэ полэс. Пхур. евр. алав «нефилим» ашунэлпэ сар алав «нафал» (вонэ пэле тэлэ). Гындосарэнас, со када сас фартэ вуче мануша., кала э шавэ лэ Дэвлэсти лэнас пала пэстэ лэ манушэндерэ щеян и лэндэ аракхадёнас бэяцэ лэндар. Кода саслэ зоралэ тай ашундэ мурша лэ пхуранятеря времятар.

5О РАЙ дикхля, со э мануша ашыле билажавардэ, и ся лэнди гындуря цырдэнас лэн каринг о холи. 6О РАЙ тынгосардя, со стердя лэ манушэс пэ пхув, и Лэско ди пхэрдиля дукхаса. 7И пхэндя о РАЙ:

— Мэ потасавава ся лэ манушэнди порода, сави Мэ стердэм. Мэ потасавава лэ манушэн, баро и цыкно пхуяко жундимос и лэ нэбостерэн черэклян. Мэ тынгой, со стердэм лэн.

О Ноё терэл о ковчего

8Ай о Ноё аракхля тынгимос англа лэ РАЕСТИ якха.

9Акэ э дума пала Ноё тай лэстерэ родуря.

Машкара э мануша кола времяти екх о Ноё сас чячюно и бидошако, вов пхирэлас лэ Дэвлэса.

10Кай о Ноё сас трин шавэ: о Симо, Хамо тай Яфето.

11Англа лэ Дэвлэсти якха э пхув римосайля и пхэрдиля холяса. 12И о Дэл дикхэл, сар э пхув римосайля пала кода, кай саворо жундимос пэ пхув пэрэбандиле пэстерэ дрома.

13Тунче о Дэл пхэндя лэ Ноёсти:

— Миримос саворэнди, со жувэн! Пала лэндэ пхэрдиля э пхув вырытимаса. Мэ умарава лэн екхатанэ ла пхувяса.

14Стер тути ковчего анда кипарисово кашт, и стер андрэ лэстэ чера, и помакх лэс смоласа андрал и упрал. 15Акэ, сар ту лэс стерэса: о ковчего трэбуй тэ авэл 150 метруря андо лунгимос, 25 метруря андо буглимос, и 15 метруря#6.15 Пэ пхур. евр. «300 амма», «50 амма», «30 амма». Екх амма — када пашав епаш метро. андо вучимос. 16Ушарав лэс, кай тэ авэл майупрэ пэ епаш метро лэ ковчегостар. Стхов ла ригатар э вудара и стер тылуно, машкаруно и упруно этажо. 17Мэ анава пэ пхув баро паи и потасавава ся, со жувэл тэла нэбо, ся, андэ кастэ пхурдэл жувимос. Ся, со исы пэ пхув, похасайвэла. 18Ай туса Мэ терава завето, и ту зажаса андо ковчего — ту, и терэ шавэ, и тери ромни, и э ромня терэ шавэн. 19Заандяр андо ковчего саворо жундимос пай дуйжынэ, муршэс и жувляс, соп вонэ тэ ашэнпэ жундэ екхтанэ туса. 20Карик тутэ авэна, кай кадя жэ тэ ашэнпэ жундэ, по дуй саворэ породатар черэклян, саворэ породатар баро тай цыкно пхуяко жундимос. 21Лэ пэса саворо хамос, стидэ лэ екхэтанэ, соп тэ правардёс ту и вонэ.

22О Ноё стердя ся кадя, сар пхэндя лэсти о Дэл.

Currently Selected:

Англунимос 6: СРБ

Highlight

Copy

Want to have your highlights saved across all your devices? Sign up or sign in

This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/

Learn More About Библия пэ влахицко романи шыб