Англунимос 35

О Яково рисайвэл андо Вефилё

1О Дэл пхэндя лэ Яковости:

— Жа андо Вефилё, жув котэ тай стер котэ жэртвенико лэ Дэвлэсти, Саво сыкадилясас тути, кала ту нашлянастар терэ пхралэстэр лэ Исавостар.

2Тунче о Яково пхэндя лэ ерести тай саворэнди, ко сас лэса:

— Вишон тумэндар найчяче дэвлэн, савэ исы тумэндэ пэса, вужардёнпэ тай парувэн пэр пэстэ э йида. 3Тунче стидэнпэ андо дром, тай амэ жасатар андо Вефилё, котэ мэ стерава жэртвенико лэ Дэвлэсти, Саво дя манди зор андэ кодыва дес, кала манди сас вырыто, тай сас манца, каринг бэ мэ тэ на жав.

4Тунче вонэ отдинэ лэ Яковости сарэ дэвэлэн, савэ сас лэндэ, тай э чея андай кана, ай о Яково заганадя лэн паша тэрэбинто кашт андо Шэхемо. 5Котар вонэ жылэтар андо дром, тай э дар лэ Дэвлэсти сас пэ саворэ форуря, кадя со нико на нашэлас пала лэ Яковостерэ бэяцэ.

6О Яково тай саворэ, ко сас лэса, авилэ андо Лузо (кода жэ исы Вефилё) пэ пхув Ханаано. 7Котэ вов стердя жэртвенико тай дя алав кодылэ тханэсти Эл-Бет-Эл#35.7 Кадья пхур. евр. дума пэрэндярэлпэ сар «О Дэл лэ Вефилёско»., пала кода со котэ о Дэл сыкадиляпэ лэсти, кала вов нашэластар пэстерэ пхралэстар.

8Э Девора, сави виправардя ла Ревэка, муля тай сасли прахосарди паша дубо найдур лэ Вефилёстар. Пала кода лэсти динэ алав Аллон-Бахут#35.8 Кадья пхур. евр. дума пэрэндярэлпэ сар «ровимаско дубо»..

9Кала о Яково рисайля анда Падан-Арамо, о Дэл инке екхвар сыкадиляпэ лэсти тай бахталисардя лэс. 10О Дэл пхэндя лэсти:

— Теро алав Яково, ай адесунэ десэсар тут на лэна тэ акхарэн Яково. Теро алав авэла Израилё.

Кадя о Дэл дя лэсти алав Израилё. 11Вов пхэндя лэсти:

— Мэ сым — о Дэл Саворэзорэско. Анэн бэятонэн тай авэн майбут. Народо, бут народуря тай тхагара авэна тутар. 12Э пхув, сави Мэ дэм лэ Авраамости тай лэ Исаакости, Мэ отдава ла тути тай терэ бэятонэнди.

13Тунче о Дэл вазгляпэ лэстар котар, кай Вов дэлас дума лэса. 14О Яково стходя ворта баруно столбо пэ кодыва тхан, кай о Дэл дэлас дума лэса, тай шордя пэр лэстэ о чехыри тай о оливково вулей. 15О Яково дя алав кодылэ тханэсти, кай о Дэл дэлас дума лэса, Вефилё#35.15 Анда пхур. евр. шыб алав «Бет-Эл» пэрэндярэлпэ сар «Дэвлэско чер»..

Мэримос ла Рахиляко тай лэ Исаакоско

16Вонэ ашадэ о Вефилё тай саслэ найдур лэ Эфратастар, кала кай э Рахиль ля тэ аракхадёл шаворо, тай сас лати фартэ пхарэс. 17Вой фартэ пхарэс анэлас лэ бэятос, тай э жувли, сави дэлас лати зор, пхэндя лати:

— На дара — тутэ авэла инке екх шаво.

18Кала э Рахиль мэрэлас тай лако духо жаластар, вой дя алав лэ шавэсти Бен-Они, ай о дад дя лэсти алав Вениамино#35.18 Пхур. евр. алав «Бен-Они» пэрэндярэлпэ сар «шаво мэрня грижако», ай алав «Бин-Ямин» пэрэндярэлпэ сар «шаво лэ чячюнэ вастэско»..

19Э Рахиль муля тай сасли прахомэ па дром андо Эфрата (када исы Вифлеемо). 20Пэ кодыва тхан о Яково стходя тэ тэрдёл о баруно столбо, ай жы калэ десэстэ кодыва бар сыкавэл, кай вой сас прахомэ.

21О Израилё жыля майдур тай стхол э катуна пала Мигдал-Эдеро. 22Кала о Израилё жувэлас пэ кодыя пхув, о Рувимо сутя ластерэ дадэстеря копэльницаса-ромняса ла Валаса. О Израилё угангля пала када.

Лэ Яковостерэ шавэ

Кай о Яково сас дэшудуй шавэ.

23Ла Лиятар: о Рувимо, англуно лэ Яковоско шаво, о Симеоно, о Левиё, о Иуда, о Исахаро тай о Завулоно.

24Ла Рахилятар: о Иосифо тай о Вениамино.

25Ла Рахилятеря бутярнятар ла Валатар: о Дано тай о Нефалимо.

26Ла Лиятеря бутярнятар ла Зелфатар: о Гадо тай о Асиро.

Када сас э шавэ, савэ аракхадилэпэ кай о Яково андо Падан-Арамо.

Лэ Исаакоско мэримос

27О Яково авилятар каринг пэско дад кай о Исаако андэ Мамрэ, кай исы паша Кирьят-Арба (кода исы Хевроно), кай жувэнас о Авраамо тай о Исаако. 28О Исаако жудя шэл охтодэша бэрша. 29О Исаако ашадя о духо, муля и отжыля каринг пестерэ мулэ папуря, пхуро тай чяло жувимастар. Лэстерэ шавэ о Исаво тай о Яково прахосардэ лэс.

Currently Selected:

Англунимос 35: СРБ

Highlight

Copy

Want to have your highlights saved across all your devices? Sign up or sign in

This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/

Learn More About Библия пэ влахицко романи шыб