Англунимос 28

1О Исаако акхардя лэ Яковос, бахталисардя лэс тай пхэндя лэсти:

— На лэ пала пэстэ ханаанеянка. 2Грабисав жатар андо Падан-Арамо, каринг о Бетуило, теря дако дад. Тай лэ котэ пэсти ромня лэ Лаваностерэ щеян, кай теря дако пхрал. 3Тэ бахталисар тут о Дэл Саворэзорэско тай тэ стерэл тэ авэн тутэ бут бэяцэ, соп тэ жан тутар бут народуря. 4Тэ дэл Вов тути тай терэ бэятонэнди лэ Авраамостери бахталимос, тай тэ залэс ту э пхув, пэ сави екхатар жувэс, э пхув, сави о Дэл дя лэ Авраамости.

5Тунче о Исаако отмэкля лэ Яковос, ай кодыва жылятар андо Падан-Арамо, каринг о Лавано, лэ Бетуилоско шаво, ай о Бетуило о арамеё, пхрал ла Ревэкако, сави сас дэй лэ Яковости тай лэ Исавости.

6О Исаво угангля, со о Исаако бахталисардя лэ Яковос тай бишалдя лэс андо Падан-Арамо, соп тэ лэл котар пэсти ромня, тай со вов бахталисардя лэс, пхэндя лэсти: «На лэ ханаанеянка», 7тай со о Яково кангля пэстерэ дадэс тай ла да и жыля андо Падан-Арамо. 8Тунче о Исаво поля, сар на чялёнас лэ Исаакости, лэстерэ дадэсти, э ханаанеянкэ. 9Вов жал каринг о Измаило тай лэл пэсти инке екха ромня, ла Махалата, сави сас пхэй лэ Невайотости ай щей лэ Измаилостери, о шаво лэ Авраамоско.

Андо суно о Дэл дэл дума лэ Яковоса

10О Яково ашадя э Вирсавия тай жылятар андо Харано. 11Кала вов дожыля варисавэ тханэстэ, ашыляпэ тэ рятярэл, пала кода со о кхам бэшля. Вов ля екх бар, стходя лэс пэсти тэла шэро и пэля тэ совэл. 12Лэсти дикхляпэ суно: вов дикхэл лесница, сави тэрдёлас пэ пхув, а о вэрхо лако дорэсэлас жы каринг о нэбо, тай э янголуря лэ Дэвлэстерэ ваздэнаспэ упрэ тай змэкэнаспэ тэлэ пар латэ. 13Упрэ понадэ латэ тэрдёлас о РАЙ тай дэлас дума:

— Мэ сым о РАЙ, Дэл терэ дадэско лэ Авраамоско тай Дэл лэ Исаакоско. Э пхув, пэ сави ту екхатар пашлёс, Мэ дава тути тай терэ бэятонэнди. 14Терэ бэятонэн авэла кадя бут, сар о прахо ла пхуяко, тай тутар авэна бэяцэ пэ саворэ ла люматерэ рига. Ту и терэ бэяцэ авэна бахталимаса важ всаворэ народуря пэ пхув. 15Мэ сым туса тай авава тут тэ фирисарав, каринг ту на жаса, тай рисарава тут кардэ пэ кадыя пхув. Мэ на ашавава тут тай стерава ся, со пхэндэм тути.

16Кала о Яково просутяпэ, вов гындосарэлас: «Чячес, пэ када тхан о РАЙ, ай мэ на ганавас». 17Лэсти сас дар, и вов пхэндя:

— Сар даравэл кадыва тхан! Чячимаса, катэ о чер лэ Дэвлэско, тай када — э вудара лэ нэбости.

18Кати кай о дес, о Яково ущиля, ля о бар, саво сас лэстэ тэла шэро, стходя лэс ворта и шутя пэр лэстэ о вулей. 19Вов дя алав кодылэ тханэсти Вефиль#28.19 Анда пхур. евр. шыб алав «Бет-Эл» пэрэндярэлпэ сар «Дэвлэско чер»., ай данглал кода форо акхарэласпэ Лузо. 20Тунче о Яково солахая и пхэндя:

— Сар о Дэл авэла манца тай фирисарэла андэ кадыва дром, тай дэла о марно тэ хав тай э йида пэ пхикэ, 21кадя со мэ рисайвава тай лава тэ жував лошаса андо чер мэрнэ дадэско, тунче о РАЙ авэла мэрнэ Дэвлэса, 22тай кадыва бар, саво мэ стходэм ворта, авэла лэ Дэвлэско чер, тай саворэстар, со Ту дэса манди, мэ дава Тути дэшто котор.

Currently Selected:

Англунимос 28: СРБ

Highlight

Copy

Want to have your highlights saved across all your devices? Sign up or sign in

This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/

Learn More About Библия пэ влахицко романи шыб