Англунимос 27

О Яково хохаимас лэл пэсти дадэско бахталимос

1Кала о Исаако пхуриля тай лэстерэ якха корайле, со вов будэр на дикхэлас, вов акхардя лэ Исавос, пэстерэ барэдэрэ шавэс, и пхэндя лэсти:

— Мэрно шаво!

— Мэ сым катэ, — пхэндя о Исаво.

2О Исаако пхэндя:

— Мэ сым пхуро, тай на ганав, скаци манди ашыля тэ жував. 3Лэ теро колчяно тай о луко тай жа андэ мал, астар манди варисо ла малятар. 4Гэтосар мэрно хамос, саво мэ камав, тай ан манди тэ хав, соп мэ тэ бахталисарав тут, данглал сар тэ мэрава.

5Ай э Ревэка ашундя, сар о Исаако дэлас дума пэстерэ шавэса лэ Исавоса, тай кала о Исаво жылятар андэ мал тэ астарэл тай тэ анэл варисо ла малятар, 6э Ревэка пхэндя пэстерэ шавэсти лэ Яковости:

— Мэ ашундэм, сар теро дад пхэндя терэ пхралэсти лэ Исавости: 7«Ан варисо ла малятар астар, ан тай гэтосар манди лашо хамос, соп мэ тэ бахталисарав тут англа РАЙ, данглал сар мэ мэрава». 8Акана ашун ман мишто, мэрно шаво, тай тер кадя, сар мэ тути пхэнава. 9Жа каринг о гурто тай ан манди дуен лашэ бузнорэн, соп мэ тэ гэтосарав лашо хамос терэ дадэсти, кацаво, сар вов камэл. 10Тунче одындяр лэсти тэ хал, вов хала тай бахталисарэла тут, данглал сар тэ мэрэл.

11О Яково пхэндя ла Ревэкати, пэстеря дати:

— Мэрно пхрал о Исаво ся андэ балэндэ, ай мандэ э морчи вужы. 12Ай со, сар мэрно дад малия ман? Тай мэ теравапэ англа лэстэ хохавно тай дэла ман амрая, ай на бахталимос.

13Лэстери дэй пхэндя:

— Кодыя амрая мэк пэрэл пэр мандэ, мэрно шаво, ай ту тер кадя, сар мэ пхэнав: жа тай ан лэ бузнорэн.

14Тунче вов жыля ля лэ бузнорэн тай андя лэн пэстеря дати, ай вой гэтосардя лашо хамос, кацаво, саво камэлас лэско дад. 15Тунче э Ревэка ля майлащи йида пэстерэ барэдэрэ шавэсти лэ Исавости, сави сас лэстэ андо чер, тай вурядя лэ цыкнэ шавэс лэ Яковос. 16Ай э васта тай э вужы кор ушарадя лэ бузнорэндеря морчянца. 17Тунче вой дя пэстерэ шавэсти лэ Яковости о лашо хамос тай о марно, савэ гэтосардя. 18Вов авиля каринг о дад тай пхэнэл:

— Мэрно дад.

— Мэ катэ, — пхэндя кодыва котар. — Ту саво сан мэрнэ шавэндар?

19О Яково пхэндя дадэсти:

— Мэ сым о Исаво, теро барэдэр шаво. Мэ стердэм, сар ту пхэндян. Мангав тут, ваздэпэ, бэш тай лэ ха мэрно хамос, соп тутэ тэ авэл зор тэ бахталисарэс ман.

20О Исаако пушля лэ шавэстар:

— Мэрно шаво, сар ту кадя йито аракхлян ла?

— О РАЙ, теро Дэл, бишалдя ла манди, — пхэндя вов.

21О Исаако пхэндя лэ Яковости:

— Мэрно шаво, поджа майпашэ мандэ, соп мэ помалий тут, тэ ганав чячес, ту мэрно шаво о Исаво чи най.

22О Яково поджыля майпашэ пэстерэ дадэстэ лэ Исаакостэ, саво помалисардя лэс и пхэндя:

— О гласо — сар кай о Яково, ай э васта — сар кай о Исаво.

23Вов на гатярдя лэс, пала кода со э васта сас лэстэ андэ балэндэ, сар кай о Исаво. И вов бахталисардя лэс.

24— Чячес ту сан мэрно шаво о Исаво? — пушля о Исаако. Кодыва пхэндя:

— Эгэ, када мэ.

25Тунче о Исаако пхэндя:

— Мэрно шаво, подындяр манди майпашэ теро хамос, тай мэ хава, ай тунче бахталисарава тут.

О Яково дя лэсти тэ хал, и вов халя. Тунче андя лэсти чехыри, и вов пиля. 26Тунче лэско дад о Исаако пхэндя лэсти:

— Поджа мандэ, мэрно шаво, тай чюмидэ ман.

27Вов поджыля тай чюмидя лэс. О Исаако гатярдя о фано лэстерэ гадэстар тай бахталисардя лэс, пхэндя:

— О-о, о фано мэрнэ шавэско — сар о фано ла малятар, сави бахталисардя о РАЙ.

28Мэк дэл тути о Дэл лэ нэбостар э дросын

тай о барвалимос, саво дэл э пхув

бут марно тай тэрно чехыри.

29Тэ авэн тутэ копэля э народуря,

тай тэ тэлён вонэ тути.

Ав раеса пэ терэ пхрала,

тай тэ тэлён англа тутэ э шавэ теря дати.

Кодыва, ко дэла амрая тут,

тэ авэл дино амрая,

ай ко бахталисарэла тут,

тэ авэл бахталисардо.

30О Исаако парашыля тэ бахталисарэл, тай кати о Яково жылятар пэстерэ дадэстар, сар авилятар лэско пхрал о Исаво па астаримос. 31Вов гэтосардя лашо хамос тай андя пэсти дадэсти. Вов пхэндя лэсти:

— Дадэ, мангав тут, ваздэпэ, бэш тай лэ ха мэрно хамос, ай тунче бахталисарэса ман.

32О Исаако, лэско дад, пушля:

— Ко ту сан?

— Мэ сым теро шаво, — пхэндя вов, — теро англуно, о Исаво.

33О Исаако ся заздрая тай пхэнэл:

— Ко сас кодыва авэр, саво астардя ла малятар тай андя манди хамос? Мэ халэм лэс англа кода, сар ту тэ авэс, тай бахталисардя лэс. Вов акана тай авэла бахталисардо!

34Кала о Исаво ашундя кадыя дума, кыркэс заровля, зацыписардя тай пхэндя пэсти дадэсти:

— Бахталисар и ман, и ман, дадэ!

35Ай кодыва пхэндя:

— Теро пхрал авиля лэ хохаимаса тай отля тутар э бахталимос.

36О Исаво пхэндя:

— Чячимаса, лэс кочя и акхарэн Яковоса#27.36 Пхур. евр. алав «Яков» (акев — пятка) пхэнэлпэ сар евр. алав «якав» (хутилдя пала пятка; хухадя диляримаса).? Вов дувар хохадя ман: заля мэрно англунимо тхан, ай акана тай мэрни бахталимос!

Тай пушля:

— Дадэ, на ашыляпэ тутэ и важ мандэ бахталимос?

37О Исаако пхэндя лэ Исавости:

— Мэ стердэм лэс хулаеса тутэ, тай саворэн лэстерэн пхралэн отдэм лэсти андэ копэля, тай бахталисардэм лэс марнэса тай тэрнэ чехыреса. Со ж мэ терава акана важ тутэ, мэрно шаво?

38О Исаво пхэндя пэсти дадэсти:

— Тутэ со, кати екх бахталимос, дад? Бахталисар и ман, мэрно дад!

Тай фартэ маладя тэ ровэл. 39Лэско дад о Исаако пхэндя лэсти:

— Авэла о жувимос теро

дур лэ барвалимастар, саво дэл э пхув,

дур лэ нэбэснона дросынатар упрал.

40Ту лэса тэ жувэс ла шурятар

тай авэса копэли терэ пхралэсти.

Ай авэла время, кала ту ваздэсапэ,

тай ту исшоса лэско гамо пэстар пай кор.

О Яково нашэлтар каринг о Лавано андо Харано

41О Исаво ритярэлас холи по Яково пала э бахталимос, сави дя лэсти лэско дад, тай вов пхэндя екхжэно пэсти: «Йито авэла время, кала лэна тэ ровэн пала мэримос лэ дадэско. Тунче мэ умарава мэрнэ пхралэс лэ Яковос».

42Лэ Ревэкати пэрэдинэ э дума, со пхэндя лако барэдэр шаво о Исаво, тай вой бишалдя пала цыкно шаво, пала Яково, тай пхэндя лэсти:

— Теро пхрал о Исаво стходя гындо тэ умарэл тут. 43Мэрно шаво, акана стер кадя, сар мэ пхэнава: майито наштар андо Харано каринг мэрно пхрал, кай о Лавано. 44Пожув лэстэ сави-то время, жы кай на улэлпэ э холи терэ пхралэсти. 45Кала э холи терэ пхралэсти улэлапэ тай вов бистрэла кода, со лэсти тердян, тунче мэ бишалава тэ пхэнэн тути, со авиля время тэ рисайвэс черэ. Пала со мэ тэ хасарав тумэн лэ дуен андэ екх дес?

46Тунче э Ревэка пхэндя лэ Исаакости:

— Мэ найлошали лэ жувимасти пала кала хетеянкэ. Сар и о Яково лэла пэсти ромня хетеянка, сар кадыла, тунче пала со манди тэ жував?

Currently Selected:

Англунимос 27: СРБ

Highlight

Copy

Want to have your highlights saved across all your devices? Sign up or sign in

This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/

Learn More About Библия пэ влахицко романи шыб