Romanos 12
12
Ti jch'unolajeletique yac'uc yo'ntonic ta spasel c'u s'elan lec ta xil ti Diose
1Ja' yu'un un, Jchi'iltac, ta sventa syail xc'uxul yo'nton ti Dios ta jtojoltique, ta jc'anboxuc vocol, cuxul ac'o abaic ta tunel jech c'u cha'al ti matanal ti c'otem ta sventa ti Diose, ti jun yutsil slequil ta xich' aq'uel ta stojole. Taje, ja' jech ta ich'el ta muc' ti Diose. 2Mu xa jechuc xanopic jech c'u cha'al ta spasic ti jnaclejetic ta banomil ti yan sjol yo'ntonique. Jeluc ti snopbenal avu'unique yo' jech ta x'ach'ub ti acuxlejalique. Jech ta xlic ava'ibeic yo'nton ti Diose, ja' ti c'usi lec ta pasele, ti c'usi xmuyubaj yo'nton yu'une, ti c'usi lec tuc' ta xile.
3Ti jech ac'bil cabtel ta sventa slequil yo'nton ti Diose, ta xcalboxuc ava'iic acotolic ti mu'yucuc me buch'u cajal xa'i sba ti c'u s'elan ta snope. Ti jujunoxuque lequil nopic c'u yepal laj scoltaoxuc ti Dios ta sventa ti c'ot ta avo'ntonic ta xch'unele. 4Jech c'u cha'al ti ep ta tos ti c'usi oy yu'un ti jbec'taltique, mu xco'olaj yabtelic ti jujutose. 5Jech ti vo'otique, ac'o mi yepal oyotic, jun no'ox c'otemotic ta stojol ti Cristoe. Junotic ta jcotoltic jech c'u cha'al ti jbec'taltic ti oy c'usi ep ta tos oy yu'une.#1 Co 12.12.
6Ti Diose yantic o laj yac'botic jbijiltic ta jujun tal, ja' ti c'u s'elan loc' ayan ta yo'nton ta yac'belotique. Jech un, mi ja' laj yac'botic jbijiltic ta scaj'alel ti c'usitic ta xc'ot ta pasele, caltic jech c'u cha'al c'otem ta o'ntonal ta xch'unele. 7Mi ja' laj yac'botic jbijiltic yo' ta xijtun yu'un ti yane, lecuc tuncutic ta stojolic. Mi ja' sbijil ac'bat ti ta chanubtasvaneje, ac'o yabtelan o ti chanubtasvaneje. 8Mi ja' sbijil ac'bat ti ta stsatsubtasbe yo'nton ti yane, ac'o yabtelan o ta yaq'uel yip ti o'ntonale. Mi ja' sbijil i'ac'bat ti oy c'usi ta xaq'ue, nijet chimetuc no'ox. Mi ac'bat sbijil ta yalel ti c'usi sc'an pasele, bijuc ti c'u s'elan ta xal mantale. Mi ac'bil sbijil ta scoltael ti buch'u abol sbaique, muyubajuc no'ox ta spasel.#1 Co 12.4-11.
Ti syail xc'uxul o'ntonale
9J'ech'eluc c'ux xava'i abaic ta jujun tal. Jipic tenic xtoc ti c'usi chopole. Ac'beic yipal ta spasel ti leque. 10Lecuc xavil abaic ta jujun tal ta sventa ti co'ol achi'il abaique. Co'oluc xavil abaic. Ich'o abaic ta muc' ta jujun tal.
11Ac'beic yipal, mu xach'ajubic. Ta sjunuluc avo'ntonic, tunanic yu'un ti Cajvaltique.
12Muyubajanic ta sventa ti oy c'usi apatoj avo'ntonic ta smalaele. Oyuc yip stsatsal avo'ntonic c'alal ta xavich' avocolique. Mu me xavicta abaic ta c'opojel ti'inel.
13Coltaic me ti yu'untac Dios ti oy c'usi ta xtun yu'unique. Ich'biluc ta muc' c'otuc avu'un ti buch'u ta xasvu'lanique.#Heb 13.2; 1 P 4.9.
14C'anbeic slequilal Dios ta stojol ti buch'u ta xayilbajinique.#Mt 5.44; Lc 6.28. Mu xa xabisic ta cotol chaval.
15Muyubajanic xchi'uc ti buch'u xmuyubajique. Jmoj oc'anic xchi'uc ti buch'u ta x'oc' x'avanique.
16Junuc avo'ntonic cuxianic acotolic. Ma'ucuc ti toyobba xava'i abaique. Co'ol xavac' abaic xchi'uc ti buch'u biq'uit yac'oj sbaique. Ma'ucuc ti toj ech'em bij xava'i abaique.#Pr 3.7.
17Mu xapacbe abaic sutel ta spasbel ti c'usi chopole. Ac'beic yipal ta spasel ti c'usi lec ta stojol scotolique. 18Ti bu xa c'alal xu'e, ac'beic yipal yo' jun avo'ntonic ta xacuxi acotolic. 19Jchi'iltac, ma'uc aventaic ta spaquel sutel ti buch'u oy c'usi chopol ta spasboxuque. Ac'beic sventain ti Diose, yu'un ja' sbainoj ta stsitsel. Yu'un xi ta xal ti ch'ul c'ope: “Oy ta coc ta jc'ob ti chapanele, vu'un ta xcac'be stojol.”#Dt 32.35. 20Xi ta xal xtoque: “Mi ta xvi'naj ti acontrae, ac'bo sve'el. Mi ta xa'i taqui ti'ile, ac'bo vo' yuch'. Ta stsajub sat avu'un ta xq'uexlal mi jech ta xapasic taje.”#Pr 25.21-22. 21Mu xavac' abaic ta tsalel yu'un ti c'usi chopole. Ja' lec tsalic ti c'usi chopol ta sventa ti c'usi lec ta xapasique.
Currently Selected:
Romanos 12: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000