Popular Bible Verses from Romanos 12

Share

Mu xa jechuc xanopic jech c'u cha'al ta spasic ti jnaclejetic ta banomil ti yan sjol yo'ntonique. Jeluc ti snopbenal avu'unique yo' jech ta x'ach'ub ti acuxlejalique. Jech ta xlic ava'ibeic yo'nton ti Diose, ja' ti c'usi lec ta pasele, ti c'usi xmuyubaj yo'nton yu'une, ti c'usi lec tuc' ta xile.

Ja' yu'un un, Jchi'iltac, ta sventa syail xc'uxul yo'nton ti Dios ta jtojoltique, ta jc'anboxuc vocol, cuxul ac'o abaic ta tunel jech c'u cha'al ti matanal ti c'otem ta sventa ti Diose, ti jun yutsil slequil ta xich' aq'uel ta stojole. Taje, ja' jech ta ich'el ta muc' ti Diose.

Muyubajanic ta sventa ti oy c'usi apatoj avo'ntonic ta smalaele. Oyuc yip stsatsal avo'ntonic c'alal ta xavich' avocolique. Mu me xavicta abaic ta c'opojel ti'inel.

Mu xavac' abaic ta tsalel yu'un ti c'usi chopole. Ja' lec tsalic ti c'usi chopol ta sventa ti c'usi lec ta xapasique.

Lecuc xavil abaic ta jujun tal ta sventa ti co'ol achi'il abaique. Co'oluc xavil abaic. Ich'o abaic ta muc' ta jujun tal.

J'ech'eluc c'ux xava'i abaic ta jujun tal. Jipic tenic xtoc ti c'usi chopole. Ac'beic yipal ta spasel ti leque.

Ti bu xa c'alal xu'e, ac'beic yipal yo' jun avo'ntonic ta xacuxi acotolic.

Jchi'iltac, ma'uc aventaic ta spaquel sutel ti buch'u oy c'usi chopol ta spasboxuque. Ac'beic sventain ti Diose, yu'un ja' sbainoj ta stsitsel. Yu'un xi ta xal ti ch'ul c'ope: “Oy ta coc ta jc'ob ti chapanele, vu'un ta xcac'be stojol.”

Ac'beic yipal, mu xach'ajubic. Ta sjunuluc avo'ntonic, tunanic yu'un ti Cajvaltique.

Ti jech ac'bil cabtel ta sventa slequil yo'nton ti Diose, ta xcalboxuc ava'iic acotolic ti mu'yucuc me buch'u cajal xa'i sba ti c'u s'elan ta snope. Ti jujunoxuque lequil nopic c'u yepal laj scoltaoxuc ti Dios ta sventa ti c'ot ta avo'ntonic ta xch'unele.

Mu xapacbe abaic sutel ta spasbel ti c'usi chopole. Ac'beic yipal ta spasel ti c'usi lec ta stojol scotolique.

Junuc avo'ntonic cuxianic acotolic. Ma'ucuc ti toyobba xava'i abaique. Co'ol xavac' abaic xchi'uc ti buch'u biq'uit yac'oj sbaique. Ma'ucuc ti toj ech'em bij xava'i abaique.

Xi ta xal xtoque: “Mi ta xvi'naj ti acontrae, ac'bo sve'el. Mi ta xa'i taqui ti'ile, ac'bo vo' yuch'. Ta stsajub sat avu'un ta xq'uexlal mi jech ta xapasic taje.”

C'anbeic slequilal Dios ta stojol ti buch'u ta xayilbajinique. Mu xa xabisic ta cotol chaval. Muyubajanic xchi'uc ti buch'u xmuyubajique. Jmoj oc'anic xchi'uc ti buch'u ta x'oc' x'avanique.

Coltaic me ti yu'untac Dios ti oy c'usi ta xtun yu'unique. Ich'biluc ta muc' c'otuc avu'un ti buch'u ta xasvu'lanique.

Jech c'u cha'al ti ep ta tos ti c'usi oy yu'un ti jbec'taltique, mu xco'olaj yabtelic ti jujutose. Jech ti vo'otique, ac'o mi yepal oyotic, jun no'ox c'otemotic ta stojol ti Cristoe. Junotic ta jcotoltic jech c'u cha'al ti jbec'taltic ti oy c'usi ep ta tos oy yu'une.