Proverbios 1
1
Tsots c'ot sc'oplal ti oy xi x'ale ti c'ope
1Xi s'elan yaloj sc'optac ti Salomone,#1 R 4.32; Pr 10.1; 25.1. ajvalil ta Israel, xnich'on ti Davide,
2ti xi oy sc'oplal ta xac' ta na'el une:
ti c'u s'elan ta tael ti bijilile,#Stg 1.5; 3.13-17. ti chanubtasele,
ti coltavanej ta yaq'uel sna'el smelol c'opetic ti naca oy smeloltaque,
3ta stael ti chanubtasele, ti bijubtasele,
ta ya'yibel ti xchiquinale, ti tuq'uilale, xchi'uc ta sco'oltasel ti c'ope,
4ta svulesbel xch'ulel ti queremetic ti ya'binoj no'ox sbaique,
ta yojtiquinel sbaic, ta snopilanel ti c'u s'elan oyique.
5Ti buch'u xjoybij no'ox sjol xchi'uc ti sbijile, ta sts'etan lec xchiquin ta ya'yiel,
jech ta stailan batel ti sbijile, ta xlic yojtiquin sba ti c'u s'elan oye,
6ta ya'yibel slo'il ya'yej ti c'usitic ta xalic ti buch'utic oy sbijilique,
ti c'opetic ta xalique, ti c'usitic ta sco'oltasique, xchi'uc ta st'unel ti c'opetique.
7Ti bijilil ta xlic ayanuque, ja' ti ta xich' xi'tael ti Diose;#Job 28.28; Sal 111.10; Pr 9.10; 15.33.
ti buch'utic pimunebe ta sjip ta sten ti bijubtasel ta xich'ique xchi'uc ti chanubtasele.
Stojobtasel ti querem viniquetique
8Cuni nich'on, ich'o ta muc' ti c'u s'elan ta xchanubtasot ti atote,
mu xajip ta apat ta axocon ti chanubtasel yu'un ti ame'e.
9Xi s'elan c'otem ta alequilal ti alac' aba xac'ot o xchi'uque:
avuil ti jun yutsile, mi mo'oje, c'otem ta sronail ajol.#Pr 6.20-21.
10Mi ta slo'laot ya'i ti jsa'muliletique,
ma'ucuc ti lec xa xava'ie, cuni nich'on.#Sal 1.1.
11Xu' nan ti xi ta xayalbeique: “La' chi'inuncutic ta sva'anel junuc pets' ta yilal co'ntontic,
ta smilel junuc ti buch'u ta x'ech' ti ch'abal smule.
12Xchexel jcuxul-ti'tic ya'iic ti buch'utic oy stuq'uilique
jech c'u cha'al xchexel ta xbat ta ch'en ti ta lajebale.
13Ta jtatic ep ta tos c'ulejal unbi,
ti nojuc ta yut jnatic scotol ti c'usi elc'anbile.
14Nabano aba ta jtojolcutic ec,
ta jventacutic ti oy c'usi lec ta xata ti co'ol ta jch'acbe jbatic ti c'usi ta jtatique.”
15Cuni nich'on, ma'uc ti lec xa xava'i xchi'inele,
ch'aco aba loq'uel ti yan be stamojique.
16Sujoj sbaic ta spasel ti chopole,
batem yo'ntonic ta smalel ti ch'ich'e.#Is 59.7; Ro 3.15.
17Altic no'ox ma' ti va'al xa pets'
c'alal xa'ibeic lec yic'al ec ti mutetique.
18Ti viniquetic taje, ta xtun ta yuni jol stuquic ti spets' ta sva'anique.
19Xi s'elan ta xc'ot ta tsutsel ma' ti sbic'tal o'ntonile:
sbic'tal no'ox yuni o'nton, xac' o sjol sbaquil xchi'uc un.
Iq'uel ta ya'yiel ti bijilile
20Ti bijilile xvinaj lec ta a'yiel yu'unic ta calleetic, ta bebeetic ti bu no'ox yalel muyelique.
21Xi s'elan oy ta ye ta sti' ti bu xloc' x'och ta naetique,
ti bu vololic ti oy c'usi tsots ta snopic ti jteclume:#Pr 8.1-3.
22“Querem viniquetic ti yan avuni jolique, xchi'uc ti xach'i o xava'iic ti labanvaneje xchi'uc ti avuni pimubelique,
¿bu to ora ta xavictaic ti me'inem ta xava'iic ti labanvanej ti yac'oj ajolic yu'une,
ti mu'yuc stu avu'unic ti c'usi lec ta na'ele?
23Ts'etano ani' achiquinic ta ya'yiel ti c'u s'elan ta jtojobtasoxuque,
yo' jech ventainbil ta xac'ot yu'un ti jbijile,
ti ta xlic abtejuc ti sbijil jol ta atojole.
24Laj jtaoxuc ta iq'uel, tsacalot lec ta venta ti ta xatale,
le' une, mu'yuc xavaq'uicun ta venta.
25C'ajomal no'ox chopol laj ava'iic ti chanubtasel cu'une;
mu'yuc stu c'ot avu'unic ti tojobtasele.
26C'alal ta xc'ot ta atojolic ti vocole, ta xlic tse'incun;
ta xlic labanvancun c'alal xacham o xa ta xava'iic yu'un ti xi'ele,
27C'alal ta xvul ta atojolic ti sibtasele, ti c'usiuc no'ox c'opale,
ti mu x'ech' xnel ta xava'iique, ti ilbajinele,
ti jech ta xvul ta atojolic jech c'u cha'al ti sutub ic' ti ta slilin scotole.
28“Ti jech c'ac'al taje, xc'opoj xti'inic xa ta jtojol, mu'yuc ta jtac'beic;
xisa'ilanicun xa, mu xistaic ta sa'el.
29Yu'un bajbil yu'unic ti bijilile,
mu xc'ot ta yo'ntonic ta yich'el ta muc' ti Diose.
30Mu xc'ot ta yo'ntonic ti bijubtasel cu'une,
yu'un laj sbajic ti tojobtasel cu'une.
31Ta xich' svocol ta stojel ti c'u s'elan loc' ta sa'el yu'unique;
lamal ta xc'ot ta sbaic ti xchopolal yo'ntonique.
32Ti buch'u mu stuc'ulan sbae ta smil sba xchi'uc ti mu'yuc lec snopobil yu'une;
ti buch'utic bolineb yo'ntonique ta smil sba stuc ta scoj ti mu stuc'ulan sbae.
33Ti buch'u ta sts'etan sni' xchiquine mu'yuc no'ox c'usi sna' ta xcuxi,
mi ja'uc ta xvul ta stojol jtosuc ti c'usitic xi'bal sbae.”
Currently Selected:
Proverbios 1: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000