Zacarías 14
14
Ta xc'ot ta pasel ti ta stsalvan ta j'ech'el ti jteclum Jerusalene
1Jutuc xa sc'an sc'ac'alil ti ta xvul ta loq'uel ti Diose, c'alal ja' o ta xc'ot ta pasel ti ta xich' ch'aquel ti c'usitic scomelaltac avu'un ti oy ta atojole, jteclum Jerusalén. 2Ti jech c'ac'ale taje, ti Diose ta stsob talel scotol muc'tiquil lum yo' jech ta stsaquic ta leto ti jteclum Jerusalene. Ta xu'ninic ti jteclume, ta stsaquic ti c'usitic oy ta anae. Ta xilbajinic ti avantsilelique, ta stsaquic batel ta chuquel j'ololuc ti c'u yepal ti jteclume. Ja' xa no'ox va'al ta xcom ti yuni comelaltaque. 3Ts'acal to un, ta xvul ta loq'uel ti Dios ti ta stsac ta leto ti muc'tiquil lum taje jech c'u cha'al junuc jtsacvanej ta letovajel ti c'alal xc'ot ti sc'ac'alile. 4Ti jech c'ac'al taje, ti Diose ta stec'an lec yoc ta vits Olivo ti oy ta stuq'uil Jerusalén ti xi oy ta yeloval stuq'uil sloq'ueb c'ac'ale. Ti muc' ta stenlejal ti xi sq'ueloj batel ta stuq'uil sloq'ueb c'ac'ale xchi'uc ti xi sq'ueloj batel ta stuq'uil smaleb c'ac'al ti oy ta yoc ti vits Olivoe, ta xlic pasuc ta cha'jav. Ti o'lol jave xi xquechet no'ox batel sjavemal ta stuq'uil yolon ti yolon xocon sloq'ueb c'ac'ale. Ti o'lol jave xi xquechet no'ox batel sjavemal ta stuq'uil yolon ti yac'ol xocon sloq'ueb c'ac'ale. 5Ti bu taje ta xajatavic batel ta stenlejal yu'un ti vitse, ti ta xc'ot c'alal to ti bu sbiinoj Asal ti xi oy ta jot xchiquine. Xabitetic no'ox ta jatobal jech c'u cha'al jatavic ti amolmuc'totic ta vo'ne ta scoj ti ech' ti niquel ti c'alal ja' o yorail ochem ta ajvalilal yu'un jteclum Judá ti Uziase. Ti jech taj une, ja' o ta xvul ta loq'uel ti Ajvalil Dios cu'une ti chi'inbil talel yu'un ti yajtuneltaque.
6Ti jech yorail ta xc'ot ta pasel ti va'i s'elan taje, yu'un ch'abal sic, mi ja'uc oy ti taive. 7Stuc xa no'ox jech jun c'ac'al ta xc'ot ta pasel. Ja' no'ox xojtiquin stuc ti Diose. Yu'un ti stuque co'ol no'ox sba ta xil mi c'ac'altic manchuc mi ac'ubaltic xojobin no'ox xojobal.#Is 24.23; Ap 22.5. 8Va'i un, ti ta jteclum Jerusalene, ta xlic tucuc talel sat vo' ti jun no'ox yutsil siquete,#Ez 47.1-12; Jn 7.38; Ap 22.1-2. ti x'oquin no'ox yoc ti c'alal yorail scomil ti c'ac'ale, ti c'alal snatil ti c'ac'ale. Ti o'lol yoque ta x'oquin ech'el ti bu sbiinoj Chamem Nabe. Yu'un ti o'lol yoque ta x'oquin ech'el ti bu sbiinoj Nab Mediterráneoe. 9Ti jech c'ac'al taje, ta xlic sventain scotol banomil ti Diose. Ja' no'ox Ajvalil ti stuque. Ja' no'ox stuc biiltasbil ta banomil. 10Yu'un scotol ti c'u sjamlej ti jteclume, ta xlic joybijuc ta jun stenlej ti ta xlic batel ta Gebae, ta xc'ot c'alal to jteclum Rimón ti xi oy ta stuq'uil yolon ti yac'ol xocon sloq'ueb c'ac'al yu'un ti jteclum Jerusalene. Ja'uc ti jteclum Jerusalene, stuc tuchul ta xcom ta jun stselej. Oy buch'u ta xlic naquiicuc ti ta xlic ti bu sbiinoj ti'na yu'un ti Benjamine, ti ta xc'ot c'alal to ta ti'na ti bu sbiinoj Xuc'ave (ti ja' to ox yavil ti vo'neal ti'nae), ti ta xlic xtoc ta q'uelob osil yu'un ti Hananele, ti ta xc'ot c'alal to ti bu to ox stenobil yaceite ti ajvalile. 11Melel, yu'un ta xlic ayanuc jnaclejetic ti ta jteclum Jerusalene. Mi ja'uc xa ta xc'ot ta pasel yan velta xtoc ti ta xtub ti sc'oplale. Ta j'ech'el mi ja'uc oy c'usi xal yo'ntonic ta xnaquiic liquel ti jnaclejetic yu'une.
12Ja'uc ti muc'tiquil lum ti laj stsaquic ta leto ti Jerusalene, xi s'elan ta x'ac'batic tsitsel yu'un ti Diose: Cuxul to ta xlic c'a'uc ti sbec'talic ti jnaclejetic yu'une. Lopajtic no'ox liquel ti sbec' satic ta c'a'ele. Ta xc'a' ti yoq'uique. 13Ti jech yorail taje, tsots ta xlic ac'baticuc xi'el yu'un ti Diose. Va'i un, ta jujun tal ta stsacbe sba sc'obic ti ta xlic st'ajbe sbaic ta jujun tal ti co'ol no'ox svinquilel sbaique. 14Va'i ec un, ti jnaclejetic yu'un ti jteclum Judae ta xlic stsac ta leto ti jcontrainvanejetic ta jteclum Jerusalene. Ti jech mu no'ox albajuc sc'ulejalic ti yan muc'tiquil lume, ta spojbeic ti oroe, ti platae, xchi'uc ti c'u'iletic yu'unique. 15Ti c'u s'elan ti tsitsel ta xvul ta stojolic ti jnaclejetique, ja' no'ox jech cajal ta xc'ot ta stojol ti ca'etique, ti mulaetique, ti jcuch icatsil chon bolom ti sbiinoj camelloe, ti burroetique, xchi'uc ti yan chon bolometic ti oy bu vololic ta axibalna ti jcontrainvanejetique.
16Mi laj scotol ti va'i s'elan taj une, ti c'u to yepal cuxul com xtoc ti jteclumetic ti laj stsaquic ta leto ti jteclum Jerusalene, sbatel osil, jujun jabil ta xbat yich'ic ta muc' ti Ajvalil Dios ti scotol xu' yu'une xchi'uc ta spasbel sq'uinal ti Yanal Te' Axibalnae.#Lv 23.39-43. 17Ti mi oy junuc muc' ta lum li' ta banomil ti mu xbat ta yich'el ta muc' ti Ajvalil ti ja' Dios ti scotol xu' yu'un ti oy ta jteclum Jerusalene, mi ja'uc ta xyal jset'uc ti vo' ta yosil sbanomilique. 18Mi mu xbatic xtoc ti egipcioetique, ja' jech ta x'ac'batic tsitsel yu'un Dios jech c'u cha'al ta x'ac'batic ti yan muc'tiquil lumetic ti buch'utic ti mu xbatic ta spasel sq'uinal ti Yanal Te' Axibalnae. 19Jech ta xich'ic tsitsel ti muc' ta lum Egiptoe xchi'uc scotol ti yan muc'tiquil lumetic ti mu xbatic ta spasel sq'uinal ti Yanal Te' Axibalnae.
20Ti jech c'ac'al taje, ta xc'ot ta pasel ti uni campanaetic yu'un ti ca'etic ti xi ti sc'oplal ta x'albate: “Ta xc'ot ta jtunel yu'un Dios le'e.” Ja' jech xtoc ti binetic ti oy ta ch'ulnae, ta xc'ot ta jtunel jech c'u cha'al c'otem ta jtunel ti lech-lech taq'uinetic ti oy ta altare. 21Scotol ti binetic ti oy ta jteclum Jerusalene, ti oy ta jteclum Judae, ta xc'ot ta jtunel yu'un Dios ti scotol xu' yu'une. Buch'uuc no'ox ti oy c'usi ta xaq'uic ta milele, yu'un ja' ta stunesic xchi'uc ta slacanic o sbec'tal ti chon bolom ti c'usi laj yaq'uic ta milele. Ti jech c'ac'al taje, ta xc'ot ta pasel ti mu'yuc xa buch'u ta xchonilaj ta yamaq'uil xch'ulna ti Dios ti scotol xu' yu'une.
Currently Selected:
Zacarías 14: TZC00
Highlight
Copy
Compare
Share
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000
