Nehemías 13
13
Ti Nehemiase laj sjel ti c'u s'elan liquem yu'unic ta ba'yele
1Ti jech yorail ta vo'ne taje, ta sba ta satic scotolic, laj yich' avtael ti jpoc vun yu'un ti Moisese, ti ts'ibabil laj stabeic sc'oplal ti j'ech'el mu xu' ta scapin sbaic xchi'uc steclumal Dios ti amonitaetique xchi'uc ti moabitaetique. 2(Mu'yuc xloq'uic snupel ta be ti israeletic xchi'uc ti ve'lil uch'ubajele, ti c'ajomal no'ox laj stojic ti Balaame yo' xc'anbat ti slajel stubelique,#Nm 22.1-6. ac'o laj sjoybin ta c'uxubinel ti Dios ti chopol c'anbat ta stojolique.#Dt 23.3-5.) 3Le' une, c'alal laj ya'iic ti va'i s'elan ta xal ta jbel ti c'usi tsots albile, ta j'ech'el laj xch'aquic loq'uel ta stojol Israel scotol ti buch'utic laj scapin sts'unubalil xchi'uc ti jyanlumetique.
4Ti mu'yuc to ox c'otem ta pasel taje, ti pale Eliasibe yich'oj to ox ta sventa sq'uejlebtac ti c'usitic ta xtun ta xch'ulna ti Dios cu'uncutique. Ti jech yuts' yalal sbaic xchi'uc Tobías ti Eliasibe, 5laj yac'be xch'amun jc'ol muc' ta yut na ti bu ta xich' q'uejel ti matanaletique, ti pome, ti c'usitic jtuneletic meltsanbile, xchi'uc ti jch'ac ta jujun lajlajuneb ti trigoe, ti vinoe, xchi'uc ti aceitee, ti oy sc'oplal ta xich'ic ti levitaetique, ti jq'uejimoletique, ti jchabiej ti'naetique, xchi'uc ti patanetic ta sventa ti paleetique. 6Ti jech c'ot ta pasel taje, mu'yuc xa oyun ta Jerusalén, yu'un ta sjabilal xlajchebal xcha'vinic (32) stic'lej ta yabtel ti Artajerjes ajvalil yu'un ti Babiloniae, lisut ech'el ta stojol ti ajvalile, ti oy bu laj jc'anbe ye sti' ti ajvalil ti scoltaucun batel c'uc sjaliluque. 7Lisut ech'el ta Jerusalén un. Ja' to laj quil un chopol c'usi spasoj ti Eliasib ti lec laj ya'i ta spasbel c'usi lec ta xa'i ti Tobiase, ti och yu'un ta naclej ta jc'ol muc' ta yut na ti oy ta sts'el ochebal sti' xch'ulna ti Diose. 8Ech'em chopol laj ca'i yu'un ti va'i s'elan taje. Laj jip loq'uel scotol ti c'usitic oy yu'un ta na ti Tobiase. 9Ta jech yepal un, laj cal mantal ti yich'uc mesel tusele, ti yich'uc aq'uel ta cha'aq'uel ta yaviltac ti c'usitic meltsanbil ta sventa ti xch'ulna ti Diose, ti matanaletique, xchi'uc ti pome.
10Laj ca'i xtoc mu'yuc xa ta x'ac'batic ti c'usitic ta xtun yu'unic ti levitaetique,#Dt 12.19. ti jujun jatavic xa ech'el ta slumalic ti levitaetique, xchi'uc ti jq'uejimoletic ti sbainojic ta spasbel stoyel xi'el ti Diose. 11Va'i un, lic jvul ti j'abteletic ta scoj ti jipbil xa com yu'unic ti xch'ulna Diose. Ts'acal to un, lic jtsob ti paleetique, xchi'uc ti levitaetique. Lic cac'be sbainic ti bu ono'ox yavilic ta tunele. 12Scotol Judá lic yich'ic talel ta sq'uejobiltac ti jch'ac ta jujun lajlajuneb#Mal 3.10. c'u yepal ta xloc' ti trigoe, ti vinoe, xchi'uc ti aceitee. 13Ta jech yepal lic cac'be sbainic ti pale Selemiase, ti jts'ibajom Sadoque, xchi'uc ti jun levita ti sbiinoj Pedaiase sq'uejobiltac ti c'usitic ta xich' aq'uele. Laj jtic' ochel yajcoltaobbaic ti Hanan xnich'on ti Zacure, smom ti Mataniase, ti mu'yuc c'usi xal o'ntonal yu'unique, ti sbainojic c'ot ta xch'acbel c'usi ta xtun yu'un ti xchi'ilic ta abtele. 14¡Xichie, Ch'ul Dios: lecuc xavil ti vi s'elan laj jpase. Mu xach'ay ta avo'nton scotol ti c'usi lec laj jpas ta sventa xch'ulna ti Dios cu'une, xchi'uc ti stoyel xi'ele!
15Laj quil ti jech yorail taje, ti ta Judae oy buch'utic ta st'usic ta teq'uel uva sventa ta smeltsanic vino ti c'alal ja' o sc'ac'alil ti cuxob o'ntonale. Laj quil ti oy buch'utic syomojic ta q'uechel ti jujuchuc trigoe, ti ta xac'beic ech'el xcuch burro ti vinoe, ti jujuvoj uvae, ti sat icuxe, xchi'uc scotol ti c'usiuc no'ox icatsil ti ta xich'ic batel ta Jerusalene.#Ex 20.8-10; Dt 5.12-14; Jer 17.21-22. Va'i un, laj jvulic ta scoj ti ta xchon sbolomalic ti jech c'ac'al taje. 16Taje, oy jlom jnaclejetic liquemic talel ta jteclum Tiroe, ti sbolomalinojic xchonel choye, xchi'uc c'usiuc no'ox yan sbolomalic ta xchonbeic ti judaetic ta Jerusalén sc'ac'alil ti cuxob o'ntonale. 17Va'i un, xichi laj calbe ya'i ti laj jvul ti banquilaletic jnaclejetic yu'un ti Judae:
—¿Mi ma'uc xa ono'ox mulil ta xava'iic ti vi s'elan ta xapasic ti mu xavaq'uic ta venta sc'ac'alil ti cuxob o'ntonale? 18Ti vi s'elan le'e, mu xa yanuc ti jech ono'ox laj spasic ti atot ame'ic laj ech'icuc ta vo'nee. Jech o xal le' une, ti Diose laj slaman talel ta jtojoltic ti ep ta tos vocole, xchi'uc ta stojol ti jteclum li'e. ¿Mi yu'un ta xac'an ava'iic ti x'ech' to ta xasoquesbeic yo'nton ti Dios ta scontrainelic ti Israel ta scoj ti mu xavaq'uic ta venta sc'ac'alil ti cuxob o'ntonale?
19Va'i un, ta jech yepal laj cal mantal c'alal ta xa x'och talel ac'ubal sventa xa sc'ac'alil cuxob o'ntonale, yich'uc maquel ti ti'naetic yu'un ti Jerusalene, ti bajaluc o c'alal ta sta sc'ac'alil ti cuxob o'ntonale. Laj jva'anan xtoc cajtuneltac ta ti'naetic yo' jech ti sc'ac'alil cuxob o'ntonale mu x'och batel ti icatsiletic yu'unique. 20Ti jbolomajeletique xchi'uc ti jchonolajeletic ti c'usitic no'ox ta xchonique, ep ta coj ech' yu'unic ti ac'ubaltic ta spat jteclum Jerusalene. 21Ja'uc ti vu'une, ep ti c'usi laj calolanbee. Laj jvulic ya'iic ti mu x'ech' yu'unic ti ac'ubal ta spat ti moque. Mi staoj yav mu xa'ibeic xchiquinale, laj calbe ya'iic ti ta jtiq'uic ya'iic ta chuquel. Mi ja'uc oy xa bu talic ti c'alal sc'ac'alil cuxob o'ntonal une. 22Ts'acal to une, laj calbeic ya'iic ti levitaetique, ti spocuc stusuc sbaique, ti baticuc ta chabiel ti ti'naetique yo' jech mu soquesbeic sc'oplal ti cuxob o'ntonale. ¡Xichie: Ch'ul Dios, mu xatic' ta avo'nton ti jech laj spas li'e! ¡C'uxubinun jech c'u cha'al oy sts'iquemal xcuchemal avu'une!
23Laj quil xtoc ti yorail taje, oy jlom judaetic yic'ojic jyanlum antsetic ti liquemic talel ta Asdode, ta Amone, xchi'uc ta Moabe. 24Ti jlom xnich'nabique, sc'op xa Asdod ta xlo'ilajic xchi'uc sc'opojel jyanlumetic ti mu ja'uc mu xa sna'ic xc'opojic ta sc'op ti judaetique. 25Laj jvulilanic ya'iic. Laj jbisic ta cotol chaval. Oy jlom laj jtsac ta majel, laj jnitbe ya'i ta sjolic. Laj jsuj ti yalicuc ta stojol Dios ti mu xic' sbaic xchi'uc jyanlum ti squerem stsebique, mi ja'uc ti stuquic eque.#Ex 34.11-16; Dt 7.1-5. Xi to laj calbeic xtoque: 26“¡Ja' jech laj sta smul Salomón ajvalil yu'un ti Israel ma' le' une! Mu'yuc xc'ot jech junuc ajvalil laj ech'uc ta epal muc'tiquil lum ti c'uxubinbil yu'un Dios#2 S 12.24-25. ti va'anat ta ajvalil yu'un scotol Israele. Ac'o mi jech taje, laj sta smul ta scoj ti jyanlum antsetique.#1 R 11.1-8. 27Le' une, ma'uc ma' ti ts'icbil no'ox ta xc'ot ti x'ech' to xjelav ta xasa' amulic ta stojol Dios ta yiq'uel ti jyanlum antsetique.”
28Ti jun ta scotol xnich'nab ti Joiadae, xnich'on ti banquilal pale Eliasibe, sni' xtoc ti Sanbalat#Neh 4.1. ti horonitae, jatav loq'uel cu'un ta jtojol. 29Xichie: “Ch'ul Dios, vuleso ta avo'nton c'u s'elan laj soques sc'oplal ta paleale, xchi'uc ti trate achapanoj ta stojol ti paleetique xchi'uc ti levitaetique.”
30J'ech'el ch'acal c'otic ti jyanlumetic cu'une. Laj jchapan lec stunelic ti paleetique, xchi'uc ti levitaetique, jujunic sq'uelicuc ti yabtelique, 31ti sc'ac'al ta xaq'uic ti si'e, xchi'uc ti ta xich' aq'uel ti sba sat ts'unubale. ¡Xichie: Ch'ul Dios, mu xach'ayun ta avo'nton!
Currently Selected:
Nehemías 13: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000