Nahúm 3
3
1Mu xa ono'ox cha'bel un, jmal-ch'ich' jteclum,
ti me'inem xa xava'i ti jutc'ope, ti ilbajinvaneje,
ti mu'yuc spajebal avu'un ti ati'vanejale.
2Xvinaj to sts'itlajet ti nucule, xvinaj to xchac'lajet scarosal ti carretae.
Spajeb xa no'ox xlomet yech'omal svoy ti ca'etique, xluchumaj no'ox ti carreta ti jochbil batele.
3Ti ca'etique ubulic no'ox ta cholej ti cajajtic yajvale.
Xvinaj to xjaplajet xojobal ti espadae, ti lanzae, mu no'ox albajuc yepal ti yayijem comique.
Busul no'ox ta j'ech'el ti animaetique.
Yantic no'ox x'epaj ta j'ech'el ti animaetique, ti stsuculin xa yoc xchi'uquic ti jnaclejetique.
4Scotol ti va'i s'elan taje, ja' ta scoj ti epaj xa ta j'ech'el soquesvan ti jchonbail mulivajel ta lume,
ti stuc xa no'ox jech ti yutsil ta q'uelele, ti ja' xa jun cuxul me' j'ac'-chamele.
Oy slo'laob yo' ta xu'ninbe yo'nton ti jteclume xchi'uc ti muc'tiquil lumetique.
5Mu lo'iluc no'ox ti xi ta xal ti Dios ti scotol xu' yu'une:
“Xi s'elan jchapanoj jba ta scontrainelote.
Ta asat to me lich'il ta xc'ot cu'un ta jvalc'un ti ac'u'e,
yo' jech cuxul t'anal ta xasq'uelic ti muc'tiquil lumetique, ti ta sta satic ti bu q'uexlal abae.
6Ja' jech xtoc ta jip talel ic'obal ta atojol yo' jech mu lecuc ta q'uelel ta xacom yu'un,
ta jpas ta atojol ti ta xac'ot ta jun j'ac'-elove.
7Scotol ti buch'u ta xilote, xi ta xalic ti jatavic xa batele:
‘Laj xa ti jteclum Ninivee.
¿Mi oy to la buch'u ta xc'uxubaj yo'nton yu'un?
¿Bu ta tael ti oy buch'u ta xpatbun yo'ntone?’
8¿Mi yu'un x'ech' to alequilal ti vo'ote, ti ja' mu sta ti jteclum Tebas ti oy ta ti' uc'um Niloe, ti joyobtabil ta uc'ume, ti ja' spojobbail ta xa'ie, ti ja' c'otem ta smoc yu'un ti vo'e? 9Ti jteclum Etiopíae, ti jteclum Egiptoe, spajebal xa o ti nac'obbail laj ya'ie. Ti jteclum Fute, ti libioetique, jun sjol yo'ntonic xchi'uc. 10Manchuc mi jech, yu'un ti jteclum Tebase, bec'bil loc' ta sbanomilic. Ti ololetic yu'unique, naca st'usel yu'unic ta lum ta xuc'av calleetic. Ta yorail laj yich' q'uelel ti buch'utic ti banquilal yu'unique. Ja' jech xtoc ti banquilal jpojvanejetic yu'unique, laj yich'ic chuquel ta carina.
11Ta xayacubtasat ec, jteclum Nínive, ti mu xa stac' a'yeluc ta xava'i ti ta xanac' abae, ti xasa'ilan xa apojel ta stojol ti avajcontrae. 12Scotol ti nac'obbail avu'une, co'ol s'elan jech c'u cha'al ti jtec' icux ti lec xcuchoj sat ti unin toe, ti tiq'uil ta xc'ot ta ye ti buch'u ta slilin yalele. 13Ti avajsoldadotaque, co'ol s'elanic jvol antsetic. Jamal xa sti'tac ti ochebal jteclum ti ta x'ochic batel ti jcontrainvanejetique. Lilij xa ta c'oc' ti yavialtaque. 14Chapano ava'al ta yuch'el yo' jech ta xcuch avu'un ti volibilote. Ac'bo yip ti anac'obbaile. Tic'o aba ta svots'el ti ach'ele. Tsaco smolteil xtoc ti latriyoe. 15Ti bu taje, ta xavich' chiq'uel ta c'oc'. Xjaylajet no'ox liquel ti espadae, ti co'ol s'elan ti c'ulube, ja' to ti c'uxi latsuts yu'un ta j'ech'ele. Esomajanic quic jech c'u cha'al ti muc'tic c'ulube; esomajanic quic jech c'u cha'al ti bilixetique. 16Ti jbolomajeletic avu'une, mu no'ox albajuc yepal ta j'ech'el, ja' mu sta ti c'analetic ti oy ta vinajele. (Ja' no'ox un, co'ol a'elan jech c'u cha'al ti c'ulube ti ta xpoch loq'uel c'alal ta xq'uex ti snuculile, va'i un, ta xvil batel.) 17Ti jchabivanejetic avu'une, jun yepalic ta jmec, co'ol s'elan jech c'u cha'al ti c'ulube. Xi s'elan oyic ti buch'utic sbainojic ta sq'uelel ti avajsoldadotaque: co'ol s'elanic jech c'u cha'al ti c'usiuc no'ox chanul ti ic'uneb ta xcom yu'un ti osile. C'alal yacal ta xac' ti sique, vololic xa ta yi'bel na. C'alal mi loc' xa talel ti c'ac'ale, ta xbat, mu'yuc buch'u sna' bu batic.
18Mu xa ono'ox cha'bel un, jteclum Asiria, ti pajal xa no'ox sjolic ta vayel ti banquilaletic avu'une. Yu'un ti avaj'opisialtaque ya'binoj xa sba telel ta xcux yo'nton. Ti avajsoldadotaque tan puc ta vitstic, ja' jech xtoc mi ja'uc oy buch'u ta stsob. 19Yu'un mu'yuc xpoxil ti sc'a'emal ayayijemalique. Scotolic ti buch'utic ta xa'iic ti avocole, smaj xa sc'obic ta muyubajel, ja'uc le' une, ¿mi yu'un la mu'yuc buch'u ta xich' svocol yu'un ti c'usitic mu'yuc stsutseb ti c'usitic chopol laj apase?
Currently Selected:
Nahúm 3: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000