Miqueas 3
3
Ta xich' vinajesbel smul ti chopol ajvaliletique
1Ts'etano achiquinic ta ya'yel ava'iic tana li'e, ajvaliletic xchi'uc banquilaletic yu'un ti Israele. ¿Mi yu'un ma'uc ac'oplalic ta xava'iic ti tsots sc'oplal ac'o ana'ic ti lequil chapanele? 2Ja'uc le'e, xcapet xa ajolic yu'un ti c'usi lec tuc' ta pasele, ja' toj c'upil xava'iic ti c'usi chopole. Stuc snuculil licajtic laj avictaic comel ti ta sbaquilic ti jteclumale. 3Ta cuxul xati'ic ti jteclumale, ti xc'alet no'ox avu'unic ta cho'bel ti snuculilique, ti naca xcho'ele, ti naca slilinbel sbaquil avu'unique, ti co'ol xa s'elan ta xavilic ja' jun beq'uet ti ta xich' tiq'uel ta bine. 4Oy bu jun c'ac'al ta xavavtaic ti Diose, c'u stu un, ti stuque mi ja'uc ta xtac'av. Ti jech c'ac'al taje, ta snac' sba ech'el ta atojolic ta scoj ti c'usi chopol laj xa apasique.
5Ti jteclumale, yan o be bu stamojic batel ta scoj ti lajemic ta lo'lael yu'un ti j'alc'opetique. “Laj sc'oplal atsaquelic ta leto” xut ti buch'u ta x'ac'bun to ta ye ta sti'e, ja'uc ti buch'u mu x'ac'bune, “Q'uelel ta atojolic ti leto xava'i xalajique” xut. Xi ta x'albatic yu'un Dios ti j'alc'opetic taje: 6“Mu'yuc xa ta xajambat aba asatic ta ac'ubaltic ta yilel ti oy c'usi ta xavilique, ti oy c'usi ta xacaj'alic ta yalel ti c'alal ic'uneb ti osile.” Tey no'ox c'alal c'ot ta tubbel sc'oplalic ti j'alc'opetic taje, ic'uneb no'ox liquel ti osil banomil ta stojolique. 7Ti j'alc'opetic taje, ti jt'unvanejetic taje, nijil chimilic ta xcomic ta q'uexlal apun. Scotolic ts'ijil ta xcomic ti c'alal mu'yuc c'usi ta xtac'batic yu'un ti Diose.
8Ja'uc ti vu'une, oy ta jtojolal xcuxlej ti Diose, yu'un ja' ta xiyac'bun jtsatsal, ti stuq'uil snopbenal cu'une, ti quipale, yo' jech xu' cu'un ta jtic'be ta satic stoyobbailic smulic ti Israele. 9Ts'etano achiquinic ta ya'yiel ava'iic tana li'e, ajvaliletic, banquilaletic yu'un ti Israele, ti xti'et ajolic yu'un ti c'usi lec ta pasele, ti ta xayanijesic ti c'usi tuc' nopbile,#Am 5.7. 10ti va'anbil avu'unic ti Jerusalén jteclum yu'un ti vits Sione#Hab 2.12. ta sventa ti spajebal mu'yuc smelol stuq'uil ta xapasique. 11Ti jchapanvanejetic yu'un ti jteclume, toj lec xa'iic stsaquel ti mich'ob-c'abale; ti paleetique ta xchanubtasvanic c'alal mi ta x'ac'batic taq'uine. Jech ti j'alc'opetic xtoque ta sc'anic taq'uin yu'un ti c'usitic xu' ta scaj'alique, ti cajal xa ye sti'ic ta xalic ti ja' coltabilic yu'un ti Diose, yu'un xi ta xalique: “Ja' chi'inbiluncutic yu'un ti Diose, mi ja'uc ti oy c'usi chopol ta xc'ot ta pasele.”
12Ja'uc tana le' une, ta acojic ta xjoybij ta jun yavil locbilal osil ti Jerusalén ti ja' jun ch'ul jteclum ti oy ta vits Sione, ti stuc xa no'ox xch'uch'ulil busul ta xcome. Ta xlic ch'iuc momoletic ta ch'ul vits yu'un ti ch'ulnae.#Jer 26.18.
Currently Selected:
Miqueas 3: TZC00
Highlight
Copy
Compare
Share
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000
