San Lucas 6
6
Ti jchanc'opetique ta sbulic trigo ta sc'ac'alil cuxob o'ntonal
(Mt 12.1-8; Mr 2.23-28)
1Ti ta sc'ac'alil cuxob o'ntonale, ta xanav ech'el ti Jesús ta yut ts'unubaltic. Ti yajchanc'optaque ta sbulic ech'el trigo, ta sju'beic ti sat slajesique.#Dt 23.25. 2Oy jun chib fariseoetic ti xi laj sjaq'uique:
—¿C'u cha'al jech ta xapasic c'alal mu stac' pasel jech ta sc'ac'alil cuxob o'ntonale?
3Xi laj stac' ti Jesuse:
—¿Mi mu'yuc avilojic ti oy c'usi laj spas jten ti Davide c'alal ja' o ta xvi'najic xchi'uc ti xchi'iltaque? 4Och batel ta xch'ulna ti Diose. Laj stam ti pan c'otem ta sventa ti Diose. Laj slajesic xchi'uc ti xchi'iltaque#1 S 21.1-6. c'alal ja' no'ox oy sc'oplal xu' ta slajesic paleetic ti pan taje.#Lv 24.9.
5Ti Jesuse xi laj yal xtoque:
—Ti vu'un co'ol j'elantique jbainoj ta sventainel ma' ti sc'ac'alil cuxob o'ntonale.
Ti jmoch' c'ob vinique
(Mt 12.9-14; Mr 3.1-6)
6Ti ta yan xa sc'ac'alil cuxob o'ntonale, ti Jesuse och batel ta ch'ul na, lic chanubtasvanuc. Ti bu taje, oy jun vinic pasem ta moch' ti sbats'i c'obe. 7Ti jchanubtasvanejetic yu'un ti oy c'usi tsots albil sc'oplale xchi'uc ti fariseoetique, ta spa'iic ti Jesuse yo' ta sq'uelic mi ta scolesvan ta sc'ac'alil cuxob o'ntonal yo' xu' ta stabeic ta sa'bel smul. 8Ja'uc ti Jesuse sna'oj xa ti c'u s'elan ta snopique, xi laj yalbe ti jmoch' c'ob vinique:
—Lican, va'an aba li' ta o'lole.
Ti vinique stam sba liquel.
9Ti Jesuse xi laj yalbe ya'i ti yane:
—Xi ta jac'boxuc ca'i jbeluc ac'opique: Ta sc'ac'alil cuxob o'ntonale, ¿c'usi stac' pasel? ¿Mi ja' ti c'usi leque, mi ja' ti c'usi chopole? ¿Mi ta scoltael, mi ta smilel?
10C'un to un, xjoyet sjol, laj sq'uel batel ti c'u yepal tsobolic ta stojole. Xi laj yalbe ti vinique:
—Xach'o talel ti ac'obe.
Ti vinique laj xach' batel ti sc'obe, lec xa com.
11Ja'uc ti yane, ech'em no'ox soc ti sjolique, ti xvulvunic xa liquel c'usi xu' ta spasbeic ti Jesús ta scontrainele.
Ti Jesuse ta st'uj ti lajcheb yajchanc'optaque
(Mt 10.1-4; Mr 3.13-19)
12Ti jech c'ac'al taje, ti Jesuse bat ta jun vits ta c'opojel ti'inel, sjunul ac'ubal ech' yu'un ta c'oponel Dios ti bu taje. 13C'alal sacub xa talel ti osile, laj yic' talel ti yajchanc'optaque. Laj st'uj loq'uel lajcha'vo' (12), laj yac'be yabtelic yo' ta x'ochic ta j'alc'opetic. 14Xi s'elan ti sbiique:
Ti Simone, ti Pedro ac'bat sbiine.
Ti Andrese, xchi'il ta voq'uel ti Simone.
Ti Santiagoe
Ti Juane
Ti Felipee
Ti Bartolomee
15Ti Mateoe
Ti Tomase
Ti Jacoboe, xnich'on ti Alfeoe.
Ti Simone, ti ja' tiq'uil to ox ta jvoc' cananista sbiique.
16Ti Judase, xnich'on ti Santiagoe.
Ti Judas Iscariotee, ti buch'u laj spaybe sc'oplal ti Jesuse.
Ti Jesuse ta xchanubtas epal jnaclejetic
(Mt 4.23-25)
17Ti Jesuse yalic talel ta vits xchi'uc ti yajchanc'optaque, vulic ta jun stenlejal. Ti bu taje, yepal tsobolic xa vul sta ti yajchanc'otaque, xchi'uc ti liquemic tal ta Jerusalene, ti oyic ta sjunlej yosilal ti Judae, ti liquemic tal ta ti' nab ti oyic ta Tiro xchi'uc ta Sidone, ti talemic ta ya'ibel sc'op ti Jesuse, yo' jech tal yac' sbaic ta colesel yu'un ti xchamelique. 18Ti buch'utic ta x'ilbajinatic yu'un pucuje, colic ec. 19Scotol yo'ntonuc xa ya'iic staicuc ta piquel ti Jesuse, yu'un laj yilic ta xcolesatic ta sventa ti smuc'ul stsatsal oy ta stojole.
Ti muyubajele xchi'uc ti vul o'ntone
(Mt 5.1-12)
20Ti Jesuse laj sq'uelbe batel sat ti yajchanc'optaque ti xi laj yalbee:
—Yan yutsil ti me'unoxuque yu'un c'otem ta aventaic ti ventainel yu'un ti Diose.
21“Yan yutsil ti vo'oxuc oy vi'nal ta xava'iique, ta xata liquel ti jun avo'ntonique.
“Yan yutsil ti vo'oxuc ta xa'oq'uique, ts'acal to ta xlic muyubajanic.
22“Yan yutsil ti vo'oxuc c'alal contrainbiloxuque, c'alal tacbiloxuc loq'uele, c'alal ilbajinbiloxuque, c'alal chopol c'optabil abiic ta jventa ti co'ol j'elantique.#1 P 4.14. 23Mu'yucuc c'usi xana'ic, muyubajanic ta j'ech'el ti jech c'ac'al taje yu'un ta xataic muc' ta matanal ti oy ta vinajele. Jech ono'ox laj spasbeic ti laj yilbeic svocol smolmuc'totic ti jnaclejetic li'e, laj no'ox yilbajinic ti j'alc'opetique.#2 Cr 36.16; Hch 7.52.
24“¡Mu cha'beluc un, ti jc'ulejoxuque laj xa ataic ti xamuyubajique!
25“¡Mu cha'beluc un, ti vo'oxuc mu'yuc vi'nal ta xava'iic avi c'ac'al li'e, ta xlic ava'iic vi'nal!
“¡Mu cha'beluc un, ti vo'oxuc xatse'inic no'ox avi ti c'ac'ale, ta xlic oc'anic yu'un ti avocolique!
26“¡Mu cha'beluc un, ti vo'oxuc lec albil ac'oplalic avi li'e! Jech ono'ox laj spasic smolmuc'totic ti jnaclejetic li'e, lec c'opojic ta stojol ti jlo'lavanej j'alc'opetique.
Ti jcontrainvaneje sc'an c'uxubinel
(Mt 5.38-48; 7.12)
27“Mi ta xava'iic ti jc'ope, xi ta xcalboxuc ava'iique:
“C'uxubino ti avajcontraique, lecuc xavil ti buch'u xti'et sjol ta atojolique. 28C'anbeic slequil Dios ta stojol ti buch'u ta xasbisic ta cotol chavale. C'oponbeic Dios ta stojol ti buch'u ta xayilbajinoxuque. 29Mi oy buch'u ta smajbot ti jot xocon asate, ac'bo smaj ti jot xtoque. Mi oy buch'u ta spojbot batel ti ac'u'e, ac'o yich' batel ti acoton xtoque. 30Mi oy c'usi ta sc'anboxuque, ac'beic batel. Mi oy buch'u ta spojbot ti c'usi oy avu'une, mu xasa' c'op. 31Mi ta xac'an oy c'usi lec ta spasboxuc ti yane, oyuc c'usi lec xapasic ec.#Mt 7.12.
32“Mi ja' no'ox ta xac'uxubinic ti buch'u ta xc'uxubinoxuque, ¿mi yu'un lec avalojic c'usi ta xapasique? Yu'un ti jsa'muliletique c'ux ta xa'i sbaic ec. 33Mi ja' no'ox lec ta xapasic ta stojol ti buch'u lec ta spasic ta atojolique, ¿mi yu'un lec avalojic ti c'usi ta xapasique? Yu'un ti jsa'muliletique jech ta spasic ec. 34Mi ja' no'ox oy c'usi ta xavac'beic xch'amun ti buch'u ta sutesbot talele, ¿mi yu'un lec avaloj ti c'usi ta xapasique? Yu'un ti jsa'muliletique, ja' jech ta xac'be sbaic ta ch'om, yu'un smalaoj ti ta sutesbat talele. 35Ti vo'oxuque tsots sc'oplal c'uxubinic ti avajcontraique. Pasic ti c'usi leque. Ac'beic xch'amun ti c'usi xtun yu'unique, ti mu amalaojuc xa ta sutesbot talele. Mi jech ta xapasique, ja' jech yepal ta xata ti amotonique xchi'uc c'otemoxuc ta yalab xnich'nab Dios ti oy ta vinajele. Yu'un ti Diose oy yutsil slequil yo'nton ta stojol ti buch'u jsa'muliletique xchi'uc ti buch'u mu xal coliyale. 36Jechuc xc'uxul avo'ntonic jech c'u cha'al ti Jtotic Dios oy xc'uxul yo'ntone.
Ma'uc avabtel ta xchapanbel smul yan
(Mt 7.1-5)
37“Ma'uc avabtel ta xchapanbel smul ti yane yo' mu xataic chapanel yu'un ti Diose. Ma'uc avabtel ta yac'bel stoj smul ti yane yo' mu xac' atoj amul yu'un ti Diose. Ch'ayo ta avo'nton ti smul scolo'ique. Jech ti Diose ta xch'ayboxuc amulic acolo'ic ec. 38Ac'beic ti c'usitic xtun yu'un ti yane. Jech ti Diose ta xac'boxuc ec ti c'usi ta xtun avu'unique. Ti c'usitic ta xac'boxuque, jun yutsil, tsinbil lec, xjaxet lec ti sbisole. Ti c'u s'elan ta xapasic ta stojol ti yane, ja' jech ta spas ti Dios ta atojolique.”
39Ti Jesuse xi laj sco'oltas jun c'op:
—¿Mi xu' ta xtun jun ma'sat ta yiq'uel batel yan ma'sat? Mi jeche, ¿mi mu van jmojuc ta xbajic yalel ta lom ch'en?#Mt 15.14. 40Xi s'elan oy ma' ti buch'u ta xich' chanubtasele: mu xco'olaj xchi'uc ti jchanubtasvanej yu'une.#Mt 10.24-25; Jn 13.16; 15.20. Oy bu ta xc'ot ta pasel ta stael jech c'u cha'al ti jchanubtasvanej mi cuch yu'un ti chanubtasele. 41¿C'u cha'al avac'oj asat ta sq'uelel juteb uni c'a'ep ti oy ta sat ti achi'ile, c'alal mu xavil ti oy xchumanil ta asate? 42Mi mu xava'i telel ti ts'am-te' ta asate, ¿c'u cha'al xi ta xaval ti ta xatic' aba ta yalbel ti achi'ile: ‘Ta jloq'uesbot ti juteb uni c'a'ep oy ta asate?’ Pac'taejbail no'ox ta xapas. Loq'ueso ba'yel ti ts'am-te' telel ta asate. Va'i unbi, ja' to ta xavil lec yo' xu' ta xaloq'uesbe ti uni juteb c'a'ep oy ta sat ti achi'ile.
Ti te'e ta sat no'ox ta ojtiquinel
(Mt 7.17-20; 12.34-35)
43“Mu jpetsuc lequil te'e, ta xac' chopol ti sate. Ja' jech xtoc, mu jpetsuc chopol te'e, lec ta xac' ti sate. 44Stac' ojtiquinel jujutos ti te' c'u s'elan sna' ta xac' ti sate.#Mt 12.33. Mu xu' xac' sat icux ti jpets ch'ix te'e. Ja' jech xtoc, mu xu' xac' sat uva ti jpets macome. 45Ti lequil tuq'uil vinique, lec ti c'usi ta xale, yu'un oy ta yo'nton ti c'usi leque. Ti chopol vinique, chopol ti c'usitic ta xalolane, yu'un oy ta yo'nton ti c'usi chopole. Ti c'usi ta xloq'uilan ta yeique, yu'un jech ono'ox oy ta yo'ntonic.#Mt 12.35.
Ti sliqueb cha'bej nae
(Mt 7.24-27)
46“¿C'u cha'al, ‘Cajval, Cajval’, xachiic c'alal mu'yuc ta xapasic ti c'usi ta xcale? 47Ta xcalboxuc ava'iic, xi s'elan xco'olaj ma' ti buch'u ta xtal ta jtojole, ti ta spasbun ti c'usi ta xcale: 48Co'ol s'elan jech c'u cha'al jun vinic ta smeltsan ti snae. Ba'yel nat ta sjots'be xch'enal yo' ta sliquesbe talel yoyaltac ta ba ton. C'alal noj talel ti uc'ume, tsots ech' pulatuc ta vo' ti nae, mu'yuc xvuq'uilaj yu'un, yu'un lec tsacal ta ton ti sliquebe. 49Ja'uc ti buch'u ta xa'i ti c'usi ta xcalbe, ti mu'yuc ta spas ti c'usi laj ya'ie, co'ol s'elan jech c'u cha'al jun vinic ti lic smeltsan sna ta ba lum no'oxe, ti mu'yuc laj yac'be yoyal ti chotol ta ba tone. C'alal noj talel ti uc'ume, tsots ech' puleuc ta vo' ti nae, lom yalel, lilij ta j'ech'el.”
Currently Selected:
San Lucas 6: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000