Habacuc 3
3
Sc'opojel sti'inel ti Habacuque
1Ti li'e, ja' sc'opojel sti'inel ti j'alc'op Habacuque.
2C'alal ta xca'i ti ac'oplale, Cajval, xchi'uc scotol ti c'usi laj xa apas talele,
ta xc'ot ta yut co'nton ti ta jnijan jchiman jbae.
C'otuc ta pasel avu'un avi tana li'e, ti c'usitic muc'tic ta xapase
jech c'u cha'al laj apas ta vo'nee yo' jech ta xcojtiquincutic ec.
Vinajeso ta jtojolcutic ti syail xc'uxul avo'ntone ac'o mi ilinemot to.
3Le' ta yosilal Temán ta xtal ti Diose;
le' ta vits Parán ta xtal ti Ch'ul Diose.
Ti yutsilal slequilale, q'uiil batel ta sjunlej ti vinajele;
nojem ta sjunlej banomil ti lequil c'optabil ta j'ech'ele.
4Sac jaman no'ox xojobal volibil talel;
xnoblajet no'ox xojobal ta xloc' talel ta sc'obtaque, ti ta svinajes ti jelavem ta j'ech'el smuc'ul stsatsal ti nac'al ta stojole.
5Ta xti'van ta j'ech'el ti bu ta slaman vulel ti vocole.
Mi laj une, nabal xa talel un ti lum ach'el xal oe.
6Xnicnun no'ox yu'un ti banomil ti c'alal ta sva'an sbae.
C'alal ta xilic ti muc'tiquil lumetique, ta xniquic yu'un.
Chlaj lomuc yalel yu'un ti vitsetic ti mu'yuc sc'oplal ta xtube;
chlaj jinuc yalel ti stselejaltic ti c'alal mu'yuc sc'oplal ta xtube,
ja'uc ti c'usi snopoj ta spas ti Diose, sbatel osil mu xtub.
7Ti jnaclejetic ta jteclum Cusane, laj xa quil ti u'ninbilic yu'un ti vocole;
ti jnaclejetic yu'un jteclum Madiane, jeche' xa vutsajtic yu'un ti xi'ele.
8¿Mi yu'un ilinemot xa yu'un ti uc'umetic, Cajval?
¿Mi yu'un til xa sc'ac'al avo'nton yu'un ti muc' ta nabetique?
¿Mi yu'un xavilet no'ox ta aca'tac yu'un ti va'i s'elane?
¿Mi ja' to jech xa'och ta acarreta sventa ti tsalvaneje?
9Yu'un cujul xa axach'oj ti yalcual ayolobe, ti tic'ajtic xa avu'un ti sni'taque.
Xpolet no'ox batel ti banomil ti bu ech' ti uc'um avu'une.
10Xnicnun no'ox ti vitsetic ti c'alal ta xilote;
xchajet no'ox ta xyal talel ta vinajel ti chaquilo' ti ta xvul ta banomile.
Jech xtoc ti natil nabe xpumlajet no'ox ta spas avu'un ti c'alal natic no'ox ti xva'i xcotie.
11Ti jech cuxul sts'aylajet no'ox xojobal ti sni'tac ayolobe,
ti xjaplajet no'ox xojobal ti alanzae,
mi ja'uc xvinaj xojobin ti c'ac'ale, ti ue.
12Ta sc'apemal ajol, ta xaxanilta ti banomile;
ta sc'ac'al avo'nton, ta xapech' ta teq'uel ti muc'tiquil jteclumetique.
13Jech ti vo'ot une latal ta spojel ta scoltael ti ateclumale xchi'uc ti ajvalil ti laj at'uje.
Laj xa alilinbe yaxibal sna ti jchopol-joletique;
t'axal com avu'un ti ton ti ja' sliquebal yoc ti jteclume.
14Ta syolob no'ox stuc, laj amil ti banquilal yu'unique, c'alal ti jcajlejetic ta ca' yu'une,
ti co'ol to s'elan ic' xchi'uc ya'lel ti xvoletic no'ox talele,
ti stoyoj xa sbaic xbitetic no'ox ta anile,
ti tan puc ta xbat yu'un ti buch'utic mu sna' spoj sbaique,
ti ta mucul no'ox ta stubbe ti sc'oplalique.
15Ta xaxanilta xchi'uc aca'tac ti muc' ta nab ti mu no'ox albajuc ti sjamalile, ti xvocan no'ox ti vo'e.
16Ti laj ca'i scotol ti va'i s'elan taje, li'och ta xi'el yu'un.
Xt'elt'un xa liquel ti que yu'un ti xi'ele,
mi ja'uc xa xu' stec'an sba ti cacane,
yu'un ch'abal xa yipal com ti jbec'tal jtacopal laj ca'ie.
Manchuc mi jech ti va'i s'elan taj une, ta xits'iji ta smalael ti sc'ac'alil c'alal ti Dios ta xac'be svocol ti epal soldadoetic ti ta xil ti jvocolcutique.
17Manchuc mi mu'yuc vajal ta nich ti icuxe,
manchuc mi ch'abal sat ti uvae,
manchuc mi mu xloc' sat ti olivoe,
manchuc mi mu mu'yuc c'usi ta xloc' ti ta locbil banomile,
manchuc mi ta xlaj ti chij ta scorrale,
manchuc mi ch'abal ti vacax ta svayebtaque,
18scotol ti va'i s'elan taje, ximuyubaj no'ox yu'un ti Diose;
xlaet no'ox banomil ta xca'i yu'un ti Dios ti ja' cajcoltavaneje.#Sal 25.5; 68.19-20; Lc 1.47.
19Ti Diose ta xac'bun quip,
ta xac'be yip ti cacane yo' jech xivilet no'ox ta anil jech c'u cha'al ti yaxal muc' ta te'tical chije.#2 S 22.34; Sal 18.33.
Ta xiyic'un batel ta toyol ti ja' to tey ta xic'ot ta pojele.
Currently Selected:
Habacuc 3: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000