Génesis 35
35
Ti Jacobe ta sts'uiltasat yu'un Dios ti ta Betele
1Ti Diose xi laj yalbe ti Jacobe: “Chapano aba. Bat naclan ta Betel. Ti bu taje, xameltsan jun altar bu laj yac' sba iluc ti Dios c'alal loq'uemot ta jatvil yu'un ti abanquil Esaue.”#Gn 28.11-17. 2Va'i un, ti Jacobe xi laj yalbe ya'i ti c'u yepalic ta nacleje xchi'uc scotol ti c'u yepal oy ta stojole:
—Loq'uesic scotol ti jnabel diosetic ti c'u yepal oy avu'unique. Atinanic, jeltao lec ac'u'ic. 3Batic ta ora ta Betel. Yu'un ti bu taje, ta jmeltsan jun altar ti ja' yich'obil ta muc' ti Dios laj scoltaun ti c'alal oyun ta vocole. Yu'un ja' laj xchi'inun ti bu yalel muyelune.
4Jech ti stuquique laj yac'beic ta sc'ob Jacob scotol ti jnabel diosetique xchi'uc ti taq'uinal chiquinaletic ti joc'ajtic ta xchiquinique. Jech ti Jacobe laj smuc ta yoc jpets tulan ta nopol Siquem. 5Ti c'alal loq'uic batele, scotol ti jteclumetic c'u yepal joyole, ac'batic ep xi'el yu'un ti Diose. Jech o xal mu'yuc xbat slubiic ta be ti Jacob xchi'uc ti xnich'nabe.
6Ti Jacobe xchi'uc ti c'u yepal xchi'inoj batele, c'otic ta jteclum Luz ti sbiinoj Betel xtoc ti oy ta Canaane. 7Va'i un, laj smeltsan jun altar. Ti bu taje, El-betel,#Ti sbi El-Betele, “Dios yu'un Betel”, xi ta xal smelol ti ta hebreo c'ope. laj yac'be sbi, yu'un laj yac' sba iluc Dios ta stojol c'alal ja' o loq'uem ta jatavil ta stojol ti sbanquile. 8Ti bu taje, cham xtoc ti Débora jun ants sbainoj ta sq'uelel ti Rebecae. Laj smuquic ta yoc jpets tulan ti nopol xa Betele. Ti bu taje, “Oq'uel ta yolon jpets tulan”, laj yac'be sbi ti Jacobe.
9C'alal loc' xa talel ta Padán-aram ti Jacobe, ti Diose laj yac' sba iluc ta stojol, laj xcha'ts'uiltas un. 10Va'i un, xi albat li'e:
“Jacob ti abie,
ja' no'ox un, ma'uc xa jech ta xabiin.
Avi tana li'e, ja' xa ta xlic abiin Israel.”#Gn 32.28.
Ts'acal to un, c'alal jeltabat xa sbi yu'un ti Diose, 11xi albate:
“Vu'un Diosun ti scotol xu' cu'une;
ta xcac' epajuc anich'nabtac xchi'uc anitilultac.
Ta aventa vo'ot ta xlic ayanuc muc' ta lum xchi'uc epal jteclumetic,
ta sventa ti anitilultaque, ta xlic ayanuc talel ajvaliletic.
12Yu'un ti banomil laj cac'be yich' ti Abrahame xchi'uc ti Isaaque,
ta xcac'bot avich' ec.
Ts'acal to un, ta xcac'be yich' ec ti anitilultaque.”#Gn 17.4-8.
13C'alal bat ti Dios bu laj sc'opon sbaic xchi'uc ti Jacobe, 14jech ti stuque laj stam jbej ton, laj sva'an ta ts'unel jech c'u cha'al junuc oy bu laj sc'opon sba xchi'uc ti Diose. Laj taj une, lic sq'uebbe aceite xchi'uc vino ta sba. 15Betel, laj yac'be sbi xtoc ti bu taje.#Gn 28.18-19.
Cham ti Raquele
16Ts'acal to un, loq'uic batel ti ta Betele. Nom nom to jutuc Efrata c'alal lic xc'uxul xch'ut ti Raquel yo' ta xcuxe, jal sts'uyet xchi'uc ti svocole. 17Yu'un ti c'alal xbalet xchi'uc ti svocole, xi laj yal ti jvet'ome: “Tsotsan, mu xaxi', yu'un laj avilbe xa sat jcot aquerem.” 18Va'i un, ti jech ta xa xtuch' batel ti stuque, ta jic' o'nton xa, laj to sbiiltas Ben-oní#Ti biil Benonie, “lubtsajemun xa laj jvoq'ues ti cole”, xi ta xal smelol ti ta hebreo c'ope. ti olole, ac'o mi Benjamín#Ti biil Benjamine, “ti jnich'on ti jech tsotsun toe”, xi ta xal smelol ti ta hebreo c'ope. biiltasat yu'un ti totile.
19Ja' jech c'ot ta pasel cham ti Raquele. Laj yich' muquel ta sbelel Efrata, ti Belén sbi avi tana li'e. 20Jech ti Jacobe laj sva'anbe snail smucobbail ti bu mucul ti Raquele. Va'al to avi tana li'e, yu'un ta to xac' ta na'el ja' smuquinal ti Raquele.
21Jech ti Israele stam batel sbe. C'ot slaman sba ta yeloval luchlebal q'uelob osil yu'un Edar. 22C'alal naqui o ti Israel ti bu taje, jech ti Rubene vay xchi'uc ti Bilha ti sts'acal ajnil ti stote. C'alal laj ya'i taje, toj ep soc sjol yu'un.
Xnich'nabtac ti Jacobe
(1 Cr 2.1-2)
Xnich'nabtac ti Jacobe, ja' lajcha'vo' ta scotol. 23Ti laj yil xchi'uc ti Leae, ja'ic ti Rubén ti sbanquilal nich'one, ti Simeone, ti Levie, ti Isacare, ti Judae, ti Zabulone. 24Yan ti laj yilic xchi'uc ti Raquele, ja'ic ti Josee xchi'uc ti Benjamine. 25Ti laj yilic xchi'uc ti Bilha smosov ti Raquele, ja'ic ti Dane xchi'uc ti Neftalie. 26Ti laj yilic xchi'uc ti Zilpa smosov ti Leae, ja'ic ti Gade xchi'uc ti Asere. Ja' jech yepal xnich'nab ti Jacobe, voq'uic talel ta Padán-aram.
Cham ti Isaaque
27Ti Jacobe bat sq'uel ti Isaac ti stot nacal ta Mamree, ti sbiinoj Arba jteclume. Ti yan sbi xtoque, Hebrón, ti bu naquiic ti Abrahame xchi'uc ti Isaaque.#Gn 13.18. 28C'alal cham ti Isaaque, yich'oj xa balunvinic (180) jabil. 29Yu'un bat stsob sbaic xchi'uc ti smolmuc'totac ti c'alal laj xa yil ti ch'iel c'opojele. Mucat yu'un ti xnich'nabe, ja'ic ti Esaue xchi'uc ti Jacobe.
Currently Selected:
Génesis 35: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000