Efesios 5
5
Ti c'u s'elan sc'an xcuxi ta banomil xnich'nab ti Diose
1Ti vo'oxuc xnich'naboxuc ti Dios ti c'uxubinbiloxuc yu'une, ac'beic yipal ta spasel jech c'u cha'al ti stuque. 2Oyuc xc'uxul avo'ntonic c'uxianic jech c'u cha'al laj xc'uxubinotic ti Cristoe, ti laj yac' sba ta milel ta jcojtic ti co'ol s'elan jcot uni chij ti laj yich' aq'uel ta smoton Dios ti jun yutsil slequil laj yile.#Ex 29.18; Sal 40.6.
3Ti jech yu'unoxuc xa ti Diose, j'ech'el lajuc ta alel sc'oplal avu'unic ti mulivajele, ti c'usitic yan ta soquesvane, ta yu'ninel ti c'usi oy yu'un ti yane. 4Mu xavalic ti c'usi q'uexlal sbae, ti c'usi mu'yuc smelole, ti bol c'opetique, yu'un mu'yuc c'usi xtun o ti jech taje. Ja' lec, ja' albeic slequilal yutsilal ti Diose. 5Ti buch'utic yac'ojbeic yipal ti mulivajele, ta spasel ti c'usi chopole, ta yu'ninel ya'i ti c'usi oy yu'un ti yane, (taje, co'ol s'elan ja' xrioxinoj ti c'usi meltsanbil ta c'abale), ti buch'utic jech taje, xana'ic lec ti mu xu' ta x'ochic batel ti bu ta xventainvan ti Cristoe xchi'uc ti Diose. 6Mu aq'uelojuc xavac' abaic ta lo'lael yu'un mi junuc ti buch'utic naca yesomal sjolic ti c'usitic ta xalique. Ta scoj ti jech taje, q'uelel xa talel ta stojol ti tsots tsitsel yu'un ti Diose. 7Mu xaco'oltas avo'ntonic xchi'uc ti buch'utic jech stalelic taje.
8Ta vo'ne ti vo'oxuque, oyoxuc to ox ta ic'al osil ti naca vocol xale. Avi tana li'e, oyoxuc ta saquilal osil ta sventa ti junoxuc xchi'uc ti Cajvaltique. Jech o xal un, ac'beic yipal ta spasel jech c'u cha'al ti buch'utic oy ta saquilal osile. 9Yu'un ta sventa ti oyoxuc ta saquilal osile, ta x'ayan slequilal yutsilal avo'ntonic, ti stuq'uil jol o'ntonale, ti lec ta q'uelel ti acuxlejalique. 10Ja' ac'beic yipal ta spasel ti c'usi lec ta xil ti Cajvaltique. 11Mu xacap abaic ta spasel ti c'usitic mu'yuc stuq'uil ta spasic ti buch'utic oyic ta ic'al osile. Ja' lec, ac'bo sna'ic ti mu'yuc smelol ti c'usi chopol ta spasique. 12Yu'un ti c'usi ta spasic ta mucul ti buch'utic taje, mu stac' alel, toj q'uexlal sba. 13Mi ta xavac'be sna' ti c'usitic chopol ta spasique, ta xlic ya'i sbaic, ta xlic sq'uel sbaic yo' mu staojuc ta spasic ti c'usi chopole. 14Ta sventa ti jech jamal ta xich' albele, xu' ta xlic stij yo'nton xchi'uc. Jech o xal xi ta xale:
“Julavan ti jech vayalote.
Tamo aba liquel ti jech achi'inojan ti animaetique,
tey xojobin no'ox vulel ta atojol ti Cristoe.”
15Ja' yu'un chae, q'uelo abaic lec c'u a'elanic ta x'ech' avu'unic ti jujun c'ac'ale. Oyuc abijilic. Mu me teyuc no'ox xach'ayetic. 16Tunesic lec ti jujun c'ac'al ta x'ech'e,#Col 4.5. yu'un ti jujun c'ac'ale, naca vocol sq'ueloj talel. 17Mu xapasic pojol chac'al ti mu xava'ibeic ti xchiquinale. Ja' ac'beic yipal ta ya'yiel c'usi ta sc'an ti Diose. 18Mu xayacubic, yu'un ti yacubele mu'yuc xa tuq'uil melolil yu'un. Ja' lec, ventainbiluc avo'ntonic yu'un ti Ch'ul Espíritue. 19Ta sventauc ti sc'op Diose, ta sventa ti q'uejimoletique, tsatsubtasbo aba avo'ntonic ta jujun tal. Ta sjunuluc avo'ntonic, muyubtaic ta sq'uejintael ti Cajvaltique. 20C'usiuc no'ox ta xc'ot ta atojolique, colaval, utic ti Dios ta sventa ti Cajvaltic Jesuse.#Col 3.16-17.
Xcuxlejal ti jujuchop jch'unolajeletique
21Ich'o abaic ta muc' ta jujun tal ta sventa ti xana' xaxi'taic ti Diose.
22Antsetic ti vo'oxuc nupul ts'acaloxuque,#Col 3.18; 1 P 3.1. ich'ic ta muc' ti amalalique jech c'u cha'al ta xavich'ic ta muc' ti Cajvaltique. 23Yu'un ti jun vinic nupul ts'acale, sbainoj ti snup xchi'ile jech c'u cha'al ti jch'unolajeletic bainbilic yu'un ti Cristoe. Ti jch'unolajeletique, ja' Jcoltavanej yu'un ti Cristoe, xchi'uc yich'ojbeic ti sbec'tal stacopale. 24Jech c'u cha'al ti jch'unolajeletic ta xich'ic ta muc' ti Cristoe, ja' jech ac'o yich'ic ta muc' snup xchi'ilic ti antsetique.
25Viniquetic ti vo'oxuc nupul ts'acaloxuque, c'uxubino ti avajnilique#Col 3.19; 1 P 3.7. jech c'u cha'al ti Cristo ta xc'uxubin ti jch'unolajeletique, yu'un laj yac' sba ta milel ta sventaic. 26Jech laj spas ti Cristoe yo' jech ta xc'otic ta yu'untac Dios c'alal pocbil tusbil c'otic yu'un ti sc'ope. 27Jech laj spas ti Cristoe yo' jech mu'yuc c'usi quechel macal yu'unic, mi jutebuc xchopolalic, mi jutebuc oy c'usi soquem yu'unic, jun yutsil, jun slequil scotol ti jch'unolajeletic ta xc'ot sva'an sba yu'un ta stojol ti Diose.#2 Co 11.2; Ap 21.2,9. 28Ti jun vinic ti buch'u nupul ts'acale, ja' jech ac'o xc'uxubin ti snup xchi'il jech c'u cha'al ta xc'uxubin ti sbec'tal stacopal stuque. Yu'un ti buch'u ta xc'uxubin ti snup xchi'ile, ja' ta xc'uxubin sba.stuc. 29Yu'un mu'yuc buch'u junucal xti'et sjol yu'un ti sbec'tal stacopal stuque, ja' no'ox ta xc'uxubin, ta smalq'uin. Ja' jech ta spas ti Cristo ta stojol ti jch'unolajeletique. 30Yu'un c'otemotic ta sbec'tal stacopal ti Cristoe. 31Yu'un xi ta xal ti ch'ul c'ope: “Jech o xal ti vinique ta scomtsan ti stot sme'ique yo' ta xnupij sts'aquij xchi'uc ti yajnile. Ti xchibalique ta xc'otic ta jun.”#Gn 2.24. 32Ti va'i s'elan taj une, toj chucul ta a'yibel ti smelole. Ta xcal ti vu'une, ja' sc'oplal ti Cristo xchi'uc ti jch'unolajeletique. 33Jech un cha'e, ta jujun tal ti vo'oxuc vinicoxuque, c'uxubino ti anup achi'ile jech c'u cha'al ta xac'uxubin aba atuquique. Ti ants ti buch'u nupul ts'acale, ac'o yich' ta muc' ti smalale.
Currently Selected:
Efesios 5: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000