Deuteronomio 34
34
Cham ti Moisese, laj yich' muquel
1Ti Moisese lic batel ta sbajtical banomil yu'un Moab, bat ta vits Nebo. Muy batel ta jol vits yu'un Pisga ti oy ta yeloval Jericoe. Ti bu taje, ac'bat ech'el yil yu'un ti Diose sjunul yosilal ti Galaade, ti c'ot c'alal to yosil ti Dane. 2Ac'bat yil xtoc yosil ti Neftalie, ti Efraine, ti Manasese, scotol sbanomil ti Judá c'alal to ti muc' ta nab Mediterráneo sbie. 3Ma'uc no'ox taje, ac'bat yil ti Négueve, ti stenlejaltic Jordane, ti stenlejal Jericoe, ti ja' jteclum Xantic sbie, c'alal to jteclum Zoar xtoc. 4Va'i un, xi albat yu'un ti Diose:
“Ja' me ma' ti jteclum le' une ti laj jva'an jba ta yalel ti ta xcac'be yich' snitilultac ti Abrahame,#Gn 12.7. ti Isaaque,#Gn 26.3. ti Jacobe. Jech ono'ox oy ta co'nton ta jc'an ta xcac'bot avil ta aba ta asat ac'o mi mu xa'och batel un.”
5Ja' yu'un un, ti Moisés ti ja' yajtunel Diose, cham ta Moab banomil jech c'u cha'al laj yal ono'ox ti Diose. 6Ma'uc no'ox taje, yu'un laj yich' muquel ta stenlejal yosilal Moab ti ta yeloval Bet-peore. Mu'yuc buch'u junuc xojtiquin avi tana ti yavil ti bu laj yich' muquele. 7Yich'oj xa vacvinic jabil (120) ti c'alal chame. Staoj yav tsatsal vinic. Mu ja'uc jutebuc maquem sat ti c'alal chame.
8Ti israeletique, lajuneb xcha'vinic (30) c'ac'al sjalil laj yoq'uitaic ti Moisés ta sbajtical banomil yu'un ti Moabe. Jech sjalil c'ac'al sc'an ta yet'esel sme'inalil ta yoq'uitael ti cham ti Moisese. 9Jech ti Josué xnich'on ti Nune laj sta sbijil ta sventa ti Moisese. Yu'un ti Moisese laj scajan sc'ob ta sjol ti Josuee. Jech o xal laj xch'unic ti israeletic ti c'u s'elan ta x'albatic yu'une. Jech laj spasic ti c'u s'elan albatem yu'un Dios ti Moisese.#Gn 28.13. #Nm 27.18,23; Jos 1.16-18.
10Manchuc mi jech un, mu'yuc xa x'ayan talel j'alc'op jech c'u cha'al ma' ti Moisese ti yilojbe sba satic xchi'uc ti Dios ti c'alal ta sc'opon sbaique.#Ex 33.11; Nm 12.6-8; Dt 18.15-18; Hch 3.22-23. 11Mu'yuc xa yan j'alc'op jech c'u cha'al ti Moisese ti albat mantal yu'un ti Dios ti laj yac' iluc ti smuc'ul stsatsale, ti ch'ayal ta xc'ot o'ntonal yu'un ti laj spas ta stojol ti faraone, ti ta stojol ti yaj'opisialtaque, xchi'uc ta stojol scotol ti slumale. 12Mu'yuc buch'u yan ti jech xco'olaj to smuc'tiquil stsatsal yip ta yaq'uel iluc ti c'usitic xu' ta spas ta sba ta sat scotol ti israeletique.
Currently Selected:
Deuteronomio 34: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000