Romanos 15

Abïr iduñi ixtumaxi ïr soiñi jaa bïïtarï dai mai xu ïïgi ixtumaxi bhai ïrhiada aapimï

1Aatïmï ix makïdï kapaka gïr buaboidaraga gï agai xi soikïdagi go gaa ix makïdï mai kapaka buaboidaradï. Maiti gï agai xi ibuadagi aatïmï ïïgi ixtumaxi bhai ïrhiada aatïmï tudu. 2Gï agai bhaiyoma xi bïïxkatai aatïmï bhai ïrhiatudagi go gaa ibuadatai ixtumaxi ïr soiñi ïgai bïïtarï bai bamioma gubuakagi ïgai buaboidaradï. 3Daiñi, tomarhi Suxi Kristo maiti idui ïïgi ixtumaxi bhai ïrhidi ïgai. Diuxi ñokidïrï ojixi saidi Suxi Kristo aatagidi Diuxi daidi itïtïdai,

Diuxi gin oga, bïïxi odami ix makïdï gï bui ñokai gï kïïdaitai, gin kïïdai ïpï dai gïn bui ñokai, itïtïdai Suxi Kristo.

4Aatïmï gïr bïïtarï tudu ojixikami bii bïïxi go ïkidadï ojadï Diuxi xi ïgaikïdï maatïkana aatïmï naana maaxi dai ïgaikïdï kïïga abïnakiada antaadakana aatïmï. Kaxkïdï maiti gïr daadagitoi aatïmï xi gïr maitagi soi ïrhiaragai. Dai bhaiyoma bhai ïrhiarakïdï nïnïraka aatïmï maatïkatai sai Diuxi iduñimu ix dukatai gïr aagidi ïgai.

5Diuxi ïgai dai gïr maakai gubukarhigai tudu sai maiti gïr daadagitoagi aatïmï xi gïr maitagi soi ïrhiaragai dai sai bhai ïrhiarakïdï nïnïrakagi aatïmï. Dai aanï daanïi Diuxi gïn bïïtarï sai kïïga gïn abïnakiadan taadakagi aapimï bïïxkatai oiditai Suxi Kristo dai biakatai mos ïmo tïgibudagai bïïxkatai. 6Aidï gia kïïga ïmapi xadutuadamu dai oigïda ñokadamu aapimï Suxi Kristo ogadï bui, Diuxi bui tudu.

Go bhai ïrhiaragai aatagi ïr bïïxkatai bïïtarï tomaxi maiti ïr judidiukagi ïgai

7Daiñi,Suxi Kristo ka kïïgakïrï gïn tïï. Kaxkïdï abïr kïïgakïrï gïn nïijada aapimï aipakoga ïpï dai podukai xadutuada Diuxi. 8Daiñi, Suxi Kristo dibia soikïda ïrhiditai go judidiu. Bïïxi naatorhixikami bia ïgai go aaduindagai ix makïdï Diuxi aagiditadai go Abraamkaru dai Isaakaru dai Jakobokaru ïïki sai ïgai iduña agaitadai. Podukai Suxi Kristo gïr tïtïgidi sai Diuxi mai yaatagïi. 9Suxi dibia saidi odami ix makïdï maiti ïr judidiu xadutuadana Diuxi ïpï maatïkatai sai Diuxi soi gï ïrhidi gïr nïiditai. Podukai tudu ojixi Diuxi ñokidïrï. Ami ikaiti sai,

Gin kaï odami ix makïdï maiti ïr judidiu kaxkïdï oigïda ñokadamu aanï aapi Diuxi gï bui. Dai kaxkïdï ganïyimu aanï ïpï gï xadutudaitai, ikaiti go ojai.

10Dai xibhïakoga Diuxi ñokidïrï adukai ojixi ïpï sai,

Aapimï ix makïdï maiti ïr judidiu abïr taata bhai ïrhiaragai ïmadï go ïko bubaidadï ïpï Diuxi, ikaiti go ojai.

11Dai Diuxi ñokidï ikaiti ïpï sai,

Oigïda abïr ñokada Diuxi bui aapimï bïïxkatai ix makïdï maiti ïr judidiu. Ga nïyibïrai ïgai bïïtarï xadutudaitai ïgai, ikaiti go ojai.

12Dai go Isaiaskaru ikaiti ïïki ïpï sai,

Diuxi daasamu ïmo pipiixaradï Isaí saidi ïr reykagi. Dai tïanïda agai ïgai go óídakami ix makïdï maiti ïr judidiu. Go óídakami ïgai bhai ïrhiarakïdï nïnïrakamu ix tumaxi duñagi go rey gïn bïïtarï ikaiti go Isaiaskaru.

13Diuxi ïgai dai gïr maakai gubukarhigai xi aatïmï bhai ïrhiarakïdï nïnïrakana ixtumaxi bia ïgai gïr bïïtarï. Kaxkïdï daanïi aanï sai ïgai kabami gïn bhai ïrhiatudana dai sai gïn maakana ïmo kïïgadukami ibhïxtaragai. Aidï gia Diuxi Ibhïadï gubukarhigakïdï kïïga bhai gin ïrhiadamu aapimï nïnïrakatai ixtuma kïïgadukami bia Diuxi gïn bïïtarï.

Pabora aagidi go buaboitudami ix tuixi otoxi ïgai idi ojai

14Gin susukurhi Diuxiïrï, kïï maatï aanï sai kïï tutuiga aapimï dai kïï maatï aapimï ixtumaxi ïr buaboi. Kïï bhaiga aapimï xi ïïgi gïn maakiagi ñoki aipakoga. 15Dïï mos gïn tïgitulda in ïrhidi ixtumaxi ïr buaboi kaxkïdï gïn otoxi aanï idi ojai dai ïgaikïdï kïï sïïrhi gïn maa aanï ñoki. Sïïrhikïdï kïï tuiga Diuxi gin bïïtarï dai gin maa ïmo sïïrhikami kaxkïdï gïn maa aanï ñoki. 16Gin maa ïgai sïïrhikami xi ïr pioñigadïkagi aanï Suxi Kristo tudu dai sai ibuada aanï ixtumaxi ïr soiñi óídakami bïïtarï ix makïdï maiti ïr judidiu. Ïgai buitapi aitudai aanï go bhai ïrhiaragai aatagi ix makïdï Diuxi gïr maa. Ïmo bhai buadami xadutudaragai dukai aatabuayi aanï aagaitai go bhai ïrhiaraga aatagi. Dai Diuxi buitapi tïïgida in ïrhidi go óídakami ix makïdï maiti ïr judidiu ïmo daxdaragai dukai bai ïgaikïdï bhai gï ïldana Diuxi. Diuxi Ibhïadï tudu ïgai dai ïkobai darasai odami ïmo daxdaragai dukai Diuxi bïïtarï. 17Aanï bïïna daja Suxi Kristo kaxkïdï maatï aanï sai kïïga ibuayi aanï Diuxi aaduindadï. 18Xibi mai duadimukai aagai aanï ix tumaxi dui Suxi Kristo aanïkïdï. Suxi Kristo ipïrhidi xi odami ix makïdï maiti ïr judidiu ïïgiadagi Diuxi kaxkïdï aatadui ïgai aanïkïdï. Go odami ix makïdï maiti ïr judidiu kaïkana ixtumaxi aagaiña aanï dai nïidiña ixtuma ibuadana kaxkïdï ïïgidi ïgai Diuxi. 19Suxi Kristo ïgai dai podukai aatadui saidi Diuxi Ibhïadï gubukarhigakïdï ibuadana aanï naana maaxi maaxidaragai ix makïdï ïïgi Diuxi ixtutuidikïi xi buadagi. Podukai Diuxi Ibhïadï gubukarhigakïdï kïïga aagidi aanï Diuxi ñokidï bïïxi óídakami aipakoga. Jerusalenïrï gin aaga aanï dai bïïxi aipako aiturhi aanï go bhai ïrhiaragai aatagi aagaitai go Kristo asta mïï Ilirikana ukami. 20Bïïxkïrï gaagaiña aanï ix dukatai aituldagi go bhai ïrhiaragai aatagi xako go óídakami mai kia kajiomakana xorai ïr Suxi Kristo. Ïpïan dukai aatabuayi aanï ïmo kïïsadami baaki ix makïdï mai ojoidi xi daama aatabuadagi cimientogadï ïmai. 21Podukai ibuayi aanï ix dukatai ojixi Diuxi ñokidïrï. Ami ikaiti sai,

Go odami ix makïdï tomarhi ïmo imidagai mai nïidi go Kristo kïïga maatïkamu xorai ïgai.

Dai go odami ix makïdï tomarhi ïmo imidagai mai kajiomatadai kïïga maatï kaïkamu aatagidï, ikaiti go ojai.

22Kaxkïdï gïn dibida in ïrhidiña aanï tudu dïï gia gin aaduindaga maiti gin daadagitoiña.

Go Pabora mïï dibida ïrhidi go Romïrï óídakami

23Ka mui umigi abhiadïrï gïn dibida ïrhidiña aanï tudu. Dai xibi ka bïïxi naato aanï gin aaduindagai tami oidigïrï xako aatabuadana aanï. Ka bïïxi aipako aiturhi aanï Diuxi ñokidï tami tudu. 24Kaxkïdï xibi gia Romïrï sïïrhi daibuña in ïrhidi aanï dai gïn dibida in ïrhidi. Dai abhiadïrï imia in ïrhidi Españamu. Gin urhiñda iñagai gïn ïmadï lachi dai bhodïrï ipïrhidi aanï xi gin maakiagi aapimï soiñi xi oijada aanï gin imidagai Españamajakoga.

25Dïï xibi kia mïï bhïidaka iñagai soiñi go buaboitudadami Jerusalenïrï óídakami bïïtarï. 26Go buaboitudadami ix makïdï maiti ïr judidiu dai ix makïdï Masedoniïrï dai Akayïrï óídaga otosda ïrhidi soiñi go Jerusalenïrï buaboitudadami tudu. Soiña ïrhidi ïgai ix makïdï ïr soititigami tudu dai kïïga ïmpagi soiñi ïgai bïïtarï. 27Bïïxi bhai ïrhiaradïkïdï ipïrhi ïgai xi otosdagi go soiñi tudu. Dai tomax dukai biakatadai ïgai sïïrhikami xi soiñagi go buaboitudadami Jerusalenïrï, go ix makïdï ïr judidiu tudu. Ïkioma go buaboitudadami judidiu kïïga soi ix makïdï maiti ïr judidiu maakakai ïmo gïdukami soiñi Diuxiañdïrï. Otoxi ïgai xorai maatïtuldagi Diuxi ñokidï tudu. Kaxkïdï xibi ïr sïïrhi xi gobai ix makïdï maiti ïr judidiu otosdagi ïmo soiñi ïïgi gïn buxtuidagañdïrï go Jerusalenïrï óídakami bïïtarï.

28Gobai tudu ïr go soiñi ix makïdï mïï Jerusalenïrï bhïidaka iñagai go buaboitudadami kia. Dai bhodïrï bhïimu aanï boi Españamajakoga. Romïrï sïïrhi imimu aanï dai aidï gïn dibidamu aanï ami Romïrï. 29Dai kïï maatï aanï sai mïï gïn dibiakai aanï sai Suxi Kristo kïï tuigakamu gin bïïtarï dai gin maakimu gubukarhigai saidi gï bhidakagi aanï ïmo kïïgadukami bhai ïrhiaragai aapimï gïn bïïtarï ïpï.

30Gin susukurhi Diuxiïrï, bïïxkatai aatïmï kïïga buaboitudai Suxi Kristo dai Diuxi ibhïadï gïr maa gubukarhigai xi kïïga gïr oigïdada aatïmï aipakoga. Kaxkïdï gïn daanïi aanï xibi xi gin soiñana aapimï gin aaduindagïrï daanïitai Diuxi gin bïïtarï. 31Daanïdabïrai gin bïïtarï tudu sai maiti gin bhïiyagi go Judeïrï óídakami ix makïdï mai buaboitudai. Dai sai bhai gïn ïrhiadana go buaboitudadami Jerusalenana tïïgidakai aanï go soiñi ix makïdï bhïidaka iñagai. 32Bai podukai bhai gin ïrhiadagi aanï dai gin ibhïxtagi lachi gïn ïmadï dakatai ix ipïrhiadagi Diuxi. 33Diuxi ïgai dai gamaakai ibhïxtaragai dai aanï daanïi xibi sai gïn ïmadï dakana ïgai. ¡Sai po gï duna bïïxi gobai tudu!

Currently Selected:

Romanos 15: NTP

Highlight

Compare

Copy