Romanos 1

Biaturhi Pabora go buaboitudadami Romïrï óídakami

1 Aanï ïr Pabora dai gïn otoxi idi ojai. Aanï ïr tïañikarudï Suxi Kristo. Dai Diuxi gin dáí an saidi ïr otosadïkana dai ïkobai gin busaitu ïgai ïpï an sai óídakami buitapi aagaiña go bhai ïrhiaragai aatagi ix makïdï Diuxi gïr maa. 2Ïki ka poduu aagai Diuxi ñokidï sai Diuxi gïr maaki agaitadai go bhai ïrhiaraga aatagi. Aidï abhiadïrï xi go aagadami Diuxi ñokidï utudami ojatadai Diuxi ñokidï ka poduu agaitadai gobai. 3Idi bhai ïrhiaragai aatagi aagai Suxi Kristo dai ïgai ïr Diuxi Maradï. Ïgai busai tami oidigi dama dai biakatadai ïradï go Dabidkaru. 4Diuxi Ibhïadï gubukadadïkïdï duakatu Suxi Kristo ïpamu gokiïrï xi muu dai podukai gïr maaxitu Diuxi sai gia ïr Diuxi maradï ïgai. Ïgai tudu ïr Gïr Nukadakami. 5Suxi Kristo kïï tuiga aatïmï ojotosadï gïr bïïtarï kaxkïdï gïr dáí ïgai saidi ïr ojotosadïkana aatïmï bai jaa mui odami ix makïdï maiti ïr judidiu buaboitudaiña dai ïïgidiña ïgai. Podukai gïr otoi Suxi Kristo baidi mui odami ix makïdï maiti ïr judidiu kïï xadutuadana ïgai. 6Aapimï tudu gïn báí Diuxi saidi ïr Suxi Kristo tuidadïkana aapimï. Dai xibi buaboitudakai aapimï ka uraba daraja bïïxi go gaa ix makïdï ïr buaboitudadami ïpï. 7Ïmo biatuldaragai bïïxkatai aapimï buaboitudadami Romïrï óídakami bïïtarï. Diuxi kïïgakïrï gïn oigïdai dai gïn báí mïsaidi ïr ïko bubaidadïkana. Aanï ipïrhidi saidi Diuxi ïmadï Suxi Kristo Gïr Nukadakami kïï tuigakana gïn bïïtarï bai kïïga ibhïxtakan taadakagi aapimï.

Pabora mïï nïida ïrhiditadai go buaboitudadami Romïrï

8Ïpïgioma gïn aagida in ïrhidi ansai kïïga bhai gin ïrhidi Diuxi ïmadï kaïkatai ix óídakami aipako aagai xïï kïïga buaboitudai aapimï Suxi Kristo. Dai aagidimi aanï Diuxi ansai bhai gin ïrhidi ïpï. Suxi Kristo ïgai dai bhai dui gin bïïtarï xi bhaigakagi aanï xi podukai aatagidagi Diuxi. 9Aanï bïïxi gin bhai ïrhiarakïdï ibuayi Diuxi aaduindadï aagaitai go bhai ïrhiaragai aatagi aagaitai Suxi Kristo Diuxi maradï. Dai Diuxi ïr nïijadami xi aanï mai dagitokai daanïi Diuxi gïn bïïtarï. 10Bïïxkïrï xïxkadï daanïda aanï Diuxi taanïiña aanï xi gin maakana ix dukatai gïn dibidagi amïka ix ipïldagi ïgai. 11Gïn dibida in ïrhidi dai gïn maaki in ïrhidi gubukadagai Diuxi Ibhïadïkïdï bai kïïgioma buiyagi aapimï gubukarhigai gïn ïrabiadïrï. 12Podukai aipako gïr abïnakidamu aatïmï aanï ïmadï aapimï kïïga buaboidaitai aatïmï Suxi Kristo. 13Gin aaduñi, ipïrhidi aanï xi maatïkagi aapimï sai mui imidagai gïn dibida in ïrhidiña aanï dïï mos mai kia ixtui. Gïn soiña in ïrhidi aanï xi kïïgioma buaboitudada aapimï gïn dibidakai. Pomaaxi ibuadana aanï tudu go gaa ïmadï ïpï ix makïdï maiti ïr judidiu. 14-15Bia aanï sïïrhikami xi bïïxi óídakami buitapi aituldagi go bhai ïrhiaragai aatagi. Mai xïdu tomax maaxi ñokadamikagi ïgai. Tomaxi kïïga biakagi ïgai estudio xiïpï ix mai biakagi ïgai estudio toma lachi. Tomax dukai bia aanï sïïrhikami xi aituldagi go bhai ïrhiaraga aatagi. Go maa bïïtarï tudu dibida in ïrhidi aanï ami Romïrï óídakami ïpï.

Go bhai ïrhiaragai aatagi kïïga bia gubukarhigai

16Mai xaïraitai aagai aanï go bhai ïrhiaragai aatagi tudu. Go bhai ïrhiaragai aatagi ïr Diuxi gubukadadï ixtukïdï kïïgakïrï bubuakïi bïïxi óídakami ix makïdï buaboitudagi. Ï ix makïdï ïpïgioma buaboitu ïr Judidiu dai xibi ix makïdï maiti ïr judidiu buaboitudaimi ïpï. 17Go bhai ïrhiaragai aatagi ïgai dai gïr tïtïgidi ix tuma dui Diuxi bïïxi odami bïïtarï bai Diuxi kïïgakïrï nïijadana bïïxi ix makïdï buaboitudai. Mos go ïï buaboidaragaikïdï kïïgakïrï bipiïyi odami Diuxi ïmadï. Podukai tudu ojixikatadai ïki Diuxi ñokidïrï.

Go ojai ikaiti,

—Go odami ix makïdï Diuxi kïïgakïrï nïidi kïïgakïrï óídaka agai buaboidatai ïgai— ikaiti ojai.

Gïpiïrï bïtïkami bïïxi oidigi dama óídakami soimaaxi ibuadatai

18Tïbagiïrï oidakami Diuxi dai mo mïkadïrï gïr tïtïgidi ïgai sai kabami bhamukui óídakami bui mos ïï soimaaxi ibuadatai ïgai. Dai gïr tïtïgidi ïpï sai ïgai daitudai gïgïbidaragai abhana bïïxi soimaaxi ibuadami. Dai go soimaaxi ibuadami ïgai mos soimaaxi buadatai sobhikïi go gaa odami ix mai maatiagi ixtumaxi ïr buaboi. 19Diuxi kïïga tïtïïgidi odami ix tuiga ïgai dïï odami modukai mai buaboituda ïrhidi kaxkïdï Diuxi daitudai gïgïbidaragai ïgai abhana.

20Daiñi, Diuxi idui bïïxi aïkatai. Dai ïki abhiadïrï kïïga maatiga maaxkana ix tuiga ïgai dai ix mai ugiatïi gubukadadï ïpï. Kïïga maatiga maaxi gobai mos nïiditai idi oidigi ix makïdï idui ïgai. Kaxkïdï odami mai bia ix tuixi ñokadagi aïkai gïgïbidaragai gïn abhana mai buaboitudakai ïgai. 21Tomaxi odami kïï maatïkana ix tuiga Diuxi bïïxkïrï mai xadutudai ïgai tomarhi mai bhai gïn ïrhidi Diuxikïdï. Bhaiyoma mos apia soimaaxi ibuayi ïgai dai sïïrhikïdï mai kïïgadukana tïgibudadï. 22Mamaatïkami gïn aagai ïïgi ïgai dïï bupuiruga ïgai bhaiyoma.

23Daiñi, Diuxi sïïrhikïdï ïr gïdukïdï dai kïï tiodi. Odami mai tïbïpi kapakarïi dïï Diuxi gia tomarhi ïmo imidagai mai mukimu. Dïï bïïxkïrï odami xadutudai uubixi bhaiyoma ix makïdï odami maaxi tomaxi odami mai tïbïpi kapakarïi. Odami maaxi uubixi xadutudai ïgai ïmadï ujurugi dai buxtaki dai kïkïixi maaxi ïpï, maiti ipïrhiditai ix xadutuadagi Diuxi. 24Kaxkïdï Diuxi dagito odami xi adaimudagi ïïgi gïn tïgibudaga saidi budana ïgai bïïxi ixtumaxi soimaaxkami ix makïdï iduña ïrhidiña ïgai. Dai odami idui naana maaxi xaïraragai maaxi gïn tukugakïdï. 25Ka maiti ipïrhi odami xi buaboitudagi ix makïdï ïr buaboi Diuxiañdïrï dai bhaiyoma bhïiyi ïgai ïmo yaatagi. Xaduturhi ïgai dai ïïgidi naana maaxi ix makïdï Diuxi idui. Maiti ipïrhi ïgai xi xadutuadagi dai ïïgiadagi Diuxi tomaxi ïgai gia bia sïïrhikami ix odami xadutuadagi bïïxkïrï bïïtarï. ¡Gobai gia ïr buaboi!

26Kaxkïdï Diuxi dagito odami xi galnaxi buadagi, ïïgi ix dukatai gïn tïgito ïgai dai iduña ïrhiditadai. Dai ïïmoko go oki dagito ixtumaxi ïr sïïrhi dai abhana boi jaa oki. ¡Maiti gï agai podukai di! 27Dai kïkïirhi ïpï pomaaxi ibuadana ïpï. Daadagito ïgai oki dai bhaiyoma biaka ïrhidiña ïmo kïïrhi. Mos kabami biaka ïrhidiña ïgai tudu. Xaïraraga gobai ix makïdï ibuadana ïgai dai ïïgi gïn abhana dáí ïgai gïgïbidaragai ibuadatai pomaaxi buirudagai.

28Odami maiti ipïrhi xi xadutuadagi Diuxi tudu. Kaxkïdï Diuxi dagito xi adaimuagi ïgai tïgibudagai ix makïdï maiti ïr sïïrhi. Dagito ïgai xi odami ibuadagi naana maaxi ix makïdï maiti agai xi ibuadagi. 29Go ïïgi soimaaxi biakana ïgai gïn iibhïdagïrï dai kaxkïdï soimaaxi ibuadana. Ïïgi gïn tïgito ajiopai odami dai soimaaxi tïgibudadï. Biaka ïrhidiña ïgai jaa buxtuidadï dai ïgamukana. Ga kodadamikana ïgai dai gïn bupui ñokaiña bhakoikatai. Yaatabogakana ïgai ïpï. Ojoidiña ïgai xi buirumadagi jaa dai xi naanakïrï ñokadagi. 30Mai kïï tutiakami aagaiña ïgai jaa dai kïdaiña Diuxi. Xigarhi dukai ñokidiña jaa bui. Gïgïrdukami gïn ïrhidiña ïïgi ïgai dai aipako gïn aagaiña ix xïïxi ïr gïgïrdukami ïpï. Mos tïgito ajiopaiña ïgai ix dukatai ibuadagi naana maaxi soimaaxkami ix makïdï mai kia nïidiña odami. Dai mai ïïgidiña ïgai gïn dïïdï. 31Maiti ipïrhidiña ïgai xi bhïiyagi tïgibudagai kïïgadukami dai maiti ibuayi ix dukatai aagaiña. Ïgai mai oigïdaiña jaa dai tomarhi mai soi gïn ïrhidiña nïiditai jaa ix makïdï soi taadakagi.

32Kïï maatï go soimaaxi buadami sai ka aagai Diuxi sai gïgïbidaragaikïdï gï agai xi koiyagi ix makïdï pomaaxi buadagi tudu. Dïï gia tomaxi kïï maatï ïgai ix kaiti Diuxi bïïxkïrï apia adaimïiña ïgai go soimaaxi dai bhai gïn ïrhidiña ïgai nïiditai jaa ix makïdï soimaaxi buadagi ïpï.

Currently Selected:

Romanos 1: NTP

Highlight

Compare

Copy