Apokalipsis 15

Go Juan oja ïmo ñoki aagaitai ix dukatai gï ugiti agai go gïgïbidaradï óídakami

1Dai bhodïrï tïïtïkiïrï dukai tïï aanï ïpï ïmo gïdukami maaxidaragai tïbagiana dai mai tïtïgaitadai aanï ixtumaxi gin tïgitoagi nïiditai. Tïï aanï kubarakami Diuxi tïtïañikarudï ix makïdï bhïkati go kubarakami gïgïbidaragai ixtukïdï gï kugaida agai oidigi daama óídakami gïgïbidaradï. Xïxkadï ka dïgabuñagi bïïxi gobai ka dodorhi bimu bhamudadï Diuxi dai ka mai surhigi agai bamioma gïgïbidaragai óídakami abhana.

2Gïn aagidamu aanï ix maaxi ami tïbagiana. Ami tïï aanï ïmo gïï bidrio maaxkami ixtumaxi kaparakami. Ïpïamaaxi ïmo gïï sudagi. Dai ami go bidrio ïrana mïjïda maaxi táí. Dai ami go gïï kaparakami bidrio daama gukatadai mui odami dai Diuxi maatadai ïgai arpas xi gaiibagi ïgai. Ïgai ïr go odami ix makïdï maiti gïn dagitokatadai ix gïn tïpaltudagi tïtiaradïkïdï go gïï kïixi dai tomarhi numerogadïkïdï. Maitïtadai ïgai go gïï kïixi bui tudu. 3Dai xibi ganïyitadai ïgai nïidadï go Moiseskaru ix makïdï ïr Diuxi pioñigadïkatadai. Dai ganïyi ïgai go Arhi Kañiru nïidadï ïpï.

Dai nïidadï ikaiti sai,

—Gia gubuakami dukai dai xigian dukai aatabuayi aapi Diuxi

Aapi ïgai dai adaama gatïanïi dai adaama ïr gubuakïdï

Sïïrhi aatabuayi aapi gatïanïitai aapi bïïxi go oidigi daama óídakami

4Gïr Nukadakami, bïïxi óídakami xagïdutuadamu dai aagamu xïïxi ïr gïdukami aapi

Mosïkaxi aapi ïkobai daja soimaaxkamiañdïrï tudu

Dai bïïxi óídakami gï xadutuadamu, maaxitudakai aapi saidi ïr sïïrhi bïïxi ixtumaxi ibuadagi aapi— ikaiti nïidadï.

5Dai bhodïrï tïï aanï Diuxi kiupaigadï ix makïdï tïbagiana kïïka. Dai ïrana go kiupai nïidi aanï xi kupiokiñitadai go tukabigadï ix makïdï bïïxi adaama ïr xadutudikïdï. 6Daidi abhai kiupiañdïrï bubuaka go kubarakami Diuxi tïtïañikarudï ix makïdï bia sïïrhikami xi kubarakamioko gïgïbituldagi óídakami. Gïn aadaka ïgai yukuxi totoakami kïï buañixikami. Dai taagidïrï bupuraka ïgai oro giburai.

7Daidi ïmadutai go maakoba duduakakami ixtumaxi ix makïdï Diuxi sonoana guka maa kubarakami oro ajasokorhi go Diuxi tïtïañikarudï. Maa ïgai ïïmo asokorhi ïïmoko. Dai go ajasokorhi susudaga gïgïbidaragai ix makïdï surhiga agai Diuxi oidigi daama bhamukatai dai gïgïbitulda agai óídakami. Susudaga gobai bhamudadï Diuxi ix makïdï bïïxkïrï oidaga tudu. 8Dai aidïxi bui go Diuxi tïtïañikarudï go ajasokorhi bai kabami kubhuxitu ami kiupiïrï. Dai gobai gï maaxidi xi Diuxi ïr gubuakami. Dai ka maiti ixtui tomarhi ïmadutai ix bakiagi ami asta xïïxkadï ka bïïxi naato surhi go Diuxi tïtïañikaru go kubarakami gïgïbidaragai ix makïdï ami ajasokorhiïrï imïi.

Currently Selected:

Apokalipsis 15: NTP

Highlight

Copy

Compare