Filipenses 4

1Kaxkïdï maiti abïr gïn daadagitoda aapimï gin aaduñi Diuxi amadïrï xi gïn maitiagi soimaaxi. Kaxi bïïna daraka aapimï Gïr Nukadakami tudu, kaxkïdï maiti abïr gïn dagitoda. Aapimï tudu ïr gin aaduñi dai kïïgakïrï gïn oigïdai aanï dai gïn tïtïitoi aanï gïn nïida iñïrhiditai. Aapimï tudu ïr gin bhai ïrhiaraga. Aanï in bïïtarï aapimï ïr ïmo bhai ïrhiaragai maitïki duu tudu ix makïdï bhïiyi aanï gin aaduindaga bïïtarï gïn tïïgidakai aanï go bhai ïrhiaragai aatagi.

Pabora maa ñoki ïïmadutai go buaboitudadami

2Xibi bia aanï ïmo ñoki go oki Eubodia dai Síntike tïtïgidukïdï bïïtarï. Daiñi, aapimï ka bïïna daraka Gïr Nukadakami dïï bïïxkïrï gïn bupui bïtïkan duduna aapimï. Gïn daanïi aanï tudu sai bhai duna aapimï ñoki dai kïïgakïrï gïn nïijada.

3Dai aapi kïïrhi ix makïdï kïïgakïrï gin soikïiña aaduindagïrï, aapi kïï maatï xorai aapi. Ipïrhidi aanï sai soiñana aapi go Eubodia ïmadï go Síntike sai gïn oigïdada ïgai ïpamu. Ïgai bïï gokatai ïr maamaradï Diuxi tudu dai gin ïmadï gaatabuadaiña ïpï aipakoga gaaiturhitai go bhai ïrhiaragai aatagi. Uurapïkïiña ïgai go Klemente ïmadï go gaa buaboitudadami ïpï ix makïdï gin soikïiña. Ga soikïiña ix makïdï tïtiaradï ojixi go libroana xako ojixi ix makïdï bïïxkïrï bïïtarï óídaka agai. Ipïrhidi aanï sai aapi kïïrhi soiñana sai bhai buada ïgai ñoki tudu saidi gïn oigïdada ïgai ïpamu.

4Dai bïïxkatai aapimï, abïr bhai gïn ïrhiada bïïnakatai aapimï Suxi Kristo Gïr Nukadakami. Gïn aagidamu aanï ïpamu abïr bhai gïn ïrhiada aapimï. 5Dai kïïga abïr tutiaka bïïxi óídakami bui sai maatï nïijadana ïgai sai aapimï kïï tutuiga.

Gïn tïgitobïrai sai otoma dibiagai Suxi Kristo ïpamu.

6Maiti abïr buamï gïn ïrhiada tomax tuma daibuñagi dai bhaiyoma abïr bïïxkïrï daanïda Diuxi sai gïn soiñana. Dai bïïxkïrï xïïxkadï aatagada aapimï Diuxi ïmadï dai gadaanïdagi abïr bïïxkïrï bhai gï ïrhiada Diuxikïdï ïpï. 7Baidi ïgai gïn maakimu ïmo ibhïxtaragai gïn ibhïdagïrï dai gïn tïgibudagïrï buaboitudaitai aapimï Suxi Kristo. Dai gïr tïgibudaga mai ajïi ix maatïkagi xïï kïïgadu go ibhïxtaragai ix makïdï gïr maakai Diuxi.

8Ïpï ïmo ixtumaxi gïn aagida in ïrhidi aanï aapimï gïn aaduñi Diuxi amadïrï. Daiñi, gïn aagidamu aanï ixtumaxi gï agai xi tïgito ajiopadagi aapimï. Tïgitodabïrai ixtumaxi ïr buaboi tudu dai ixtumaxi ïr kïï sïïrhi dai ixtumaxi ïr buañixi dai ixtumaxi xigiamaaxi. Gïn tïtïgitodabïrai ixtumaxi ïr kïï bhai maaxkami tudu. 9Daidi buadabïrai bïïxi ixtumaxi gïn maatïturhi aanï dai gïn biturhi. Abïr ibuada tudu ixtumaxi gïn aagidiña aanï dai ix tumaxi nïidiña aapimï saidi ibuadana aanï. Gobai abïr ïïgiada dai oijada. Dai aidï gia gïn ïmadï dakamu Diuxi ix makïdï gïr maakai ibhïxtaragai.

Go Pabora maa ïmo Diuxi atanamïidaragai go Filipoana óídakami go soiñikïdï ix makïdï otoxditadai ïgai

10Gin aaduñi, bhai gin ïrhidi aanï Gïr Nukadakamikïdï. Kïïga mamaaxidi aapimï ïpamu sai gin tïtïitoi aapimï tudu gin otosdakai aapimï go soiñi. Kaxkïdï bhai gin ïrhidi aanï Diuxi ïmadï. Kïïga gin tïtïitoiña aapimï baasïkioma tudu dïï mai biakana aapimï ix dukatai gin otosdagi soiñi sai podukai gin maaxitudagi aapimï xïïxi gin tïtïitoi.

11Dai nïiditai idi ojai maiti gï agai xi pobïnïrhiada aapimï sai gin biïga ixtumaxi kia. Kïïga maatï aanï ixdukatai bhai gin ïrhiadagi tomaxi maaxi oidakagi aanï tudu. 12Daiñi, ïïmo imidagai mai biakana aanï ixtumaxi bhaitoma dai ïïmo imidagai kïïga biakana aanï. Ka máí aanï ixdukatai oidakagi tomax dukai tudu. Tomax bhiugimukagi aanï ix kïïga taxkoñikagi ïpï, tomax kïïga biakagi ixtukïdï oidakagi ix soitigamikagi ïpï. 13Tomax dukai Suxi Kristo ïgai dai gin mamaakai go gubukarhigai. Dai ïgaikïdï ixtutuidikïi aanï tomax tuma daibuñagi. 14Dïï gia bïïxkïrï kïïga idui aapimï gin otosdakai soiñi xibi soimaaxi taatakatai aanï.

15Aapimï Filipoana óídakami, aidïxi tukamïrï gïn aiturhi aanï go bhai ïrhiaragai aatagi gin mamaakaiña aapimï soiñi. Dai gokiïrï aidïxi jii aanï abhiadïrï Masedoniañdïrï oidigi gin otosdiña aapimï soiñi ïpï saidi aituldana aanï go bhai ïrhiaragai aatagi maigobioma. Dai mosïkaxi aapimï buaboitudadami ix makïdï ami Filipoana gïn ïmpaidiña gin soikïiña podukai. Mai tipukatadai jaa xorai gin soikïiña podukai. 16Asta aidïxi dakatadai aanï Tesalonikïrï gin otosdiña aapimï soiñi ïpï ïïmo imidagai.

17Gin aaduñi, mai xu xi ipïrhidi aanï xi gin maakiagi aapimï ïmo oidaragai dai gïn ojidi. Bhaiyoma ipïrhidi aanï sai gïn maakana Diuxi gïïpi bamioma maitïki mos ïï kïï tutiakatai aapimï gin bïïtarï.

18Xibi ka bia aanï go oidaragai ix makïdï gin otoxdi aapimï go Epafrodito ïmadï. Kïïga ayi gobai bïïtarï ixtumaxi tïgitokatadai aanï dai asta bhaibitu. Gobai ix makïdï gin otoxdi aapimï ïr ïmo daxdaragai kïï xigian ubadami duu gin Diuxiga bïïtarï dai kïïga bhai gï ïrhidi ïgai gokïdï.

19Daiñi, gin Diuxiga buxtuidadï bïïxi adaama ïr kïkïïgadukïdï dai gobai mai ugiatïi. Dai abhiadïrï buxtuidadïañdïrï gïn maakimu ïgai bïïxi ixtumaxi tïgitokagi aapimï bïïna darakatai aapimï Suxi Kristo. 20Agia gï agai xi bïïxkïrï bïïtarï mai ugutai aagaiña aatïmï xïïxi ïr gïdukami Diuxi. Sai pogïduna gobai tudu.

Pabora otoxdi ïmo kugatïrï biatuldaragai go buaboitudadami Filipoïrï óídakami

21Diuxkïdï biaturhi aanï bïïxi go odami ix makïdï ïr ïko bubaidadï Diuxi ami. Dai bïïxkatai go buaboitudadami ix makïdï tami daraka gin ïmadï gïn otoxdi ïmo biatuldaragai aapimï ïpï.

22Diuxkïdï gïn biaturhi gin aaduñi Diuxi amadïrï bïïxi xïïki tami gin ïmadï daraka ïpï. Dai go aatabuadami kiidïrï go gïï dunukami César ïgai dai bamioma gin aagidi sai gïn otosdagi aanï ïmo biatuldaragai.

23Ipïrhidi aanï sai Suxi Kristo Gïr Nukadakami gïn maatïtuldana gïn iibhïdagïrï sai maatïkana aapimï xïï kïï tuiga ïgai gïn bïïtarï.

Mosïkaxi.

Currently Selected:

Filipenses 4: NTP

Highlight

Compare

Copy