Santiago 2

Gï agai sai ïmadugan dukai nïijada aatïmï bïïxi óídakami ix gïn bipidakagi ïgai ix ïr soititigami ïpï

1Gin aaduñi Diuxi amadïrï, aapimï kïïga buaboitudai Suxi Kristo Gïr Nukadakami ix makïdï ïr Gïr Nukadakami tudu. Buaboitudai aapimï ïgai ix makïdï adaama kïï tiodi dai gubuka dai kïï tuiga tudu. Kaxkïdï maiti gï agai aapimï xi ïïmoko kïïga nïijadagi dai jaa soi dukai nïijadagi. 2Dukami xi ïmo gïn ïmpaiñdaragiana dadiagi goka kïkïïrhi dai xi ïmoko gïbidaka maaxkagi gï aadatikatai ïmo aniyu oro dai kïïga namïaka maaxkatai yukuxi dai go gïmai soitigami maaxkagi tukurakatai yukuxidï, 3xi ami dadiagi ïgai, maiti gï agai xi bamioma kïïga nïijada aapimï go ix makïdï gïbidaka maaxi. Maiti gï agai tudu xi maakiagi go kïïgadukïdioma daikarui daidi bhodïrï itïdagi go soitigami sai mos kïakana xiïpï potïdagi sai dïbïrapi daibana. 4Ix pobuidadagi aapimï aidï gia gobai itïiya ïrhidi sai mai ïmadugan dukai nïidi aapimï óídakami. Itïiya ïrhidi gobai sai soimaaxi gïn tïgibudaga tudu mai ampanïxi xadutudaitai aapimï bïïxi odami.

5Gin aaduñi, kïïga gïn oigïdai aanï. Kïïga abïr gïn tïgito kaïka ixtumaxi gïn aagidamu aanï. Gïn maakimu aanï ñoki tudu. Daiñi, Diuxi ka podukai dáí sai mui soititigami ïr buaboitudadamika agai dai podukai gïn bipidakami dukai bii agai iibhïadïrï buaboitudaitai ïgai tomaxi tami oidigi daama bhaitoma mai bia ïgai ixtumaxi. Biakamu ïgai oigaragai xi Diuxi tïanïdagi tudu. Gobai tudu ïr go bhai ïrhiaragai ix makïdï maaki agai Diuxi go odami ix makïdï oigïdai Diuxi. Ka podukai aagai ïgai tudu. 6Diuxi mai soi dukai nïidi soititigami tudu. Dïï aapimï gia soi dukai nïidi dai bamioma xadutudai aapimï ix makïdï bamioma kïïga gïn bipidaka. ¿Maiti ix ïr go gïn bipidakïdï ix makïdï soi gïn buididiña gïpiïrï gïn bupaitai dai baan gïn tutusaiña dudunukamiïrï? Go soititigami bhaitoma mai pobuayi tudu. 7¿Dai mai ix ïr go gïn bipidakami ix makïdï galnaaxi ñoki surhigiña buidïrï Suxi Kristo ix makïdï urabaka aapimï ïpï? ¿Ix tuixidï bamioma xadutudai aapimï go gïn bipidakami tudu?

8Daiñi, sïïrhikïdï kïïgadu ix kïïga ïïgiada aapimï go sïïrhikamigadï Diuxi ix makïdï ikaiti sai,

Gï agai sai oigïada aapimï jaa ïpïan ïxi ix xïïxi gïn oigïdai ïïgi aapimï.

Ix ïïgiadagi aapimï go sïïrhikami gobai aidï gia kïïga ibuayi aapimï tudu. 9Dïï gia ix mai ïmadugan dukai nïijadagi aapimï bïïxi óídakami bamioma kïïgakïrï nïiditai aapimï ïïmoko aidï gia mai kïïga ibuayi aapimï. Ka mai ïïgidi aapimï go sïïrhikami tudu pobuadatai dai go sïïrhikamiana ikaiti sai gïn ajïga gïgïbidaragai ix mai ïïgiadagi aapimï.

10Daiñi, odami ix makïdï bhaitoma bïïxi aïkatai ïïgiadagi go sïïrhikami dïï gia xi mos arhi ïmo pakoga mai ïïgidi ïgai, podukai ka gïpiïrï bïïtïkami bipiïyi ïgai. Ka soimaaxi ibuadami bipiïyi ïgai buidïrï bïïxi go sïïrhikami tudu. 11Daiñi, Diuxi sïïrhikamigadïrï ikaiti sai maiti gï agai ïmoko xi ïmadï boiyagi ïmai ix makïdï maiti ïr aduñdï Dai pokaiti ïgai ïpï sai maiti gï agai ix gakodadagi ïpï. Kaxkïdï xi ïmo odami kïïga ïïgiadagi go sïïrhikami ix makïdï ikaiti sai mai ïmadï boiyagi ïgai ix makïdï maiti ïr aduñdï dïï gia gamuagi ïgai, gobai itïiya ïrhidi sai ka mai ïïgidi ïgai go sïïrhikami.

12Gin aaduñi, kïïga abïr gïn tïgitoka ix tïdagi aapimï jaa dai ix tumaxi ibuadagi ïpï. Kïï maatï aapimï sai Diuxi aagada agai ix bhai kïï dui aapimï, ix bhai kïïga ïïgidi aapimï go utudui sïïrhikami tudu. Dai go utudui sïïrhikami ïgai daidi gïr soikïi sai ka mai biakagi aatïmï ix ïïgiadagi go soimaaxkami dai taatagi mukigami. 13Diuxi aagada agai ix bhai kïïga idui aatïmï tudu. Dai gïn maakimu ïgai gïgïbidaragai ix mai soi ïlda nïijadagi aapimï jaa dai mai oigïldagi aapimï. Dïï gia ix soi ïlda nïijadagi aapimï jaa dai oigïldagi aapimï aidï gia mai biakamu aapimï ixtukïdï duduadikudagi xïïxkadï aagagi Diuxi ix bhai kïïga dui aapimï. Soi ïlda gïn nïijadamu ïgai aapimï ïpï tudu dai gïn oigïldamu.

Gï agai sai ibuadagi aatïmï ixtumaxi ïr kïïga sai podukai maatï nïijadana jaa sai kïïga buaboitudai aatïmï

14Gin aaduñi, ix pokaitadagi odami sai kïïga buaboitudai dïï gia ix maiti ibuadagi ïgai tomarhi ïmo ixtumaxi kïïgadukami aidï gia, ¿Tumaxi bïïtarï ïr soiñikana gobai? Gobai itïiya ïrhidi sai mai buaboikïdï buaboitudai ïgai tudu dai xadïrï kïïgakïrï bubuakïna ïgai ix pomaaxkagi buaboidaradï. 15-16Dai bhai ix ïr soiñikana xi ïmoko gïr aaduñi Diuxi amadïrï mai kïïga biakagi yukuxi tomarhi ixtuma ugiagi dai aapimï mai soikïdagi dai bhaiyoma mos potïdagi aapimï sai,

—Diuxi gï maakana yukuxi dai ixtuma ugiagi—.

¿Bhai ix ïr soiñikana potïkai aapimï? Xadïrï. 17Dai pomaaxi gïr buaboidaraga ïpï. Ix ïmo odami ikaitiadagi sai kïïga buaboitudai dïï gia maiti ibuadagi ïgai ixtumaxi ïr kïïga aidï gia maiti ïr soiñi go buaboidaradï.

18Daiñi, kïï bhaiga ïïmo odami ix pokaitadagi sai, kïïgakïrï bubuaki agaiña ibuadatai naana maaxi kïkïïgadukami aaduindagai. Dai jaa ikaitiña sai kïïgakïrï bubuaki agaiña mos kïïga buaboitudaitai. ¿Dai dukatai gï maatïkana ix bhai buaboikïdï buaboitudai ïgai ix maiti ibuadagi ïgai ixtumaxi kïkïïgadukami? Dïï gia aanï ikaiti sai aanï gia ibuayi ixtumaxi ïr kïïga dai podukai maaxitudai aanï jaa buidïrï sai kïïga buaboitudai aanï. Pobuayi aanï tudu.

19Kïïga pokaitada antaada aapimï sai buaboitudai aapimï sai oidaga Diuxi dai sai ïmaduga ïgai. Kïïgadu aba gobai. Dïï gia aanï aagai sai asta go tïtïañikarudï go diabora kïïga buaboitudai sai oidaga Diuxi dai asta gigibukïiña ïgai ïbhïiditai. 20Kaxkïdï ix pokaitadagi aapimï sai buaboitudai aapimï Diuxi dïï gia ix maiti ibuadagi aapimï ixtumaxi ïr kïïga aidï gia mosïkaxi ibuayi aapimï ixtumaxi ibuayi go tïtïañikarudï go diabora. Buirudagai gobai tudu. Kïïga maatiga maaxi tudu sai maiti ïr soiñi gïn buaboidaraga ix mos pokaitadagi aapimï sai buaboitudai aapimï dïï gia ix maiti ibuadagi aapimï ixtumaxi ïr kïïga.

21Daiñi, gïr pipiixara Abraamkaru kïïga buañixikami bii Diuxi buitapi ibuadatai ïgai ixtumaxi ïr kïïgadukami. Go daxdakarui daama daxdi ïgai Diuxi go Isaak tudu. 22Kïïga buaboitu ïgai dai kïïga idui ïgai ixtumaxi ïr kïïga ïpï. Kïïga idui ïgai daxdakai ïgai go Isaak Diuxi dai gokïdï gï maatï sai kïïga buaboitudai ïgai ïpï. Dai Diuxi kïïga buañixikami aa go Abraamkaru podunakai ïgai. 23Podukai gï idui ixdukai ojixi Diuxi ñokidïrï tudu xako ikaiti sai,

Go Abraam buaboitu Diuxi dai Diuxi buañixikami aa go Abraam kïïga buaboidaitai ïgai, ikaiti Diuxi ñokidïrï. Dai Diuxi ikaiti saidi kïïga gïn ïïmadai ïgai ïmadï go Abraam ïmo miadïrï gïn aadunumï dukai.

24Daiñi, bïïxi gobai ix makïdï kaxi gïn ojidi aanï itïiya ïrhidi sai gï agai ix odami kïïga ibuadagi kïïga buaboitudaitai ïgai saidi podukai Diuxi buañixikami aagana ïgai. Maiti gï agai ix mosïkaxi buaboitudagi ïgai maiti ibuadatai ixtumaxi ïr kïïgadukami tudu.

25Daiñi, go oki Rahabkaru tïgidukami buañixikami bii ïpï ïïki buaboitudaitai ïgai daidi ibuadatai ixtumaxi ïr kïïgadukami ïpï. Ïgai ïr ïmo oidakamikatadai Jerikoïrï. Kïkïïrhimïrhigakatadai ïgai dïï bïïxkïrï buañixikami bii ïgai Diuxi bïïtarï. Ïmo imidagai miadïgi ïgai kïkïïrhi ix makïdï ïr ojotosadïkatadai go judidiu dai podukai maaxiturhi go Rahab sai kïïga buaboitudai Diuxi. Aidïpïrï go óídakami ami Jerikoïrï gaagaitadai go kïkïïrhi ïgai daidi koda agaitadai tudu. Dïï gia go Rahab kïïga miadïgi go kïkïïrhi ïgai dai kïïga soi saidi kïïgakïrï iimïna abhiadïrï ïmai boiyana xako mai tïïgiagi go gaa óídakami. Podui go Rahab tudu daidi gï maaxiturhi ix kïïga buañixi ïgai Diuxi bïïtarï.

26Daiñi, kïïga gï maatï sai ïmo odami tukugadï ix mai biakagi ibhïadï gobai itïiya ïrhidi saidi ïr mukiadï gobai. Dai podukai ïpï gïr buaboidaragai ix maiti ibuada aatïmï ixtumaxi ïr kïïga gobai itïiya ïrhidi sai mukiadï duu gïr buaboidaragai. Maiti ïr soiñikana gobai toma lachi tudu. Kaxkïdï gï agai sai buaboitudagi aatïmï dai gï agai ix maaxitudagi ix kïïga buaboitudai ibuadatai aatïmï ixtumaxi ïr kïïga ïpï.

Currently Selected:

Santiago 2: NTP

Highlight

Copy

Compare