Efesios 2

Koidadïkana aatïmï ïkioma dïï xibi gia kïïgakïrï ïr duduakakami aatïmï bïïnakai aatïmï Suxi Kristo

1Ïkioma ïr koidadïkana gïn iibhïdaga soimaaxi buadatai aapimï. Mai ïïgidiña aapimï Diuxi kaxkïdï. 2Aidïpïrï adaimïiña aapimï go odami tïgibudadï dai ïïgidiña aapimï go diabora pobuadatai. Go diabora ïgai dai tïanïi go soimaaxi iibïdagami ix makïdï mos ïbïltapi ajiopai. Dai xibi aatabuayi ïgai iibhïadïrï odami ix makïdï mai ïïgidi Diuxi ïpï. 3Bïïxkatai aatïmï buaboitudadami pomaaxi óídakaiña ïkioma ïpï. Ïïgidiña aatïmï ïïgi gïr tïgibudaga soimaaxkïdï. Mos ibuadana aatïmï bïïxi go soimaaxkami ix makïdï bhai ïrhidiña gïr tukuga ïmadï gïr tïgibudaga ïkidadï. Ïïgi pomaaxkatadai aatïmï tudu. Ajïakamikatadai aatïmï xi gïr bui bhamukagi Diuxi dai xi taatagi aatïmï gïgïbidaragai ïmadï bïïxi go gaa óídakami.

4Dïï gia Diuxi kïïga gïr oigïdai dai soi gï ïrhi gïr nïiditai. 5Kaxkïdï tomaxi ïr koidadïkatadai gïr iibhïdaga ïkioma soimaaxi buadatai aatïmï bïïxkïrï Diuxi gïr duakaturhi Suxi Kristo ïmadï. Diuxi gia kïï tuiga tudu dai kaxkïdï kïïgakïrï gïr bubaitu ïgai. 6Diuxi gïr duakaturhi Suxi Kristo ïmadï dai tïbagiïrï gïr darai Suxi Kristo ïmadï ïpï bïïnakai aatïmï ïgai. 7Tïbagiïrï gïr darai Diuxi bai podukai gïr tïtïgidana ïgai bïïxkïrï bïïtarï xïï kabami kïï tuiga ïgai gïr bïïtarï. Gïr tïtïgidamu ïgai naana maaxi ixtumaxi kïkïïgadukami ix makïdï ïgai bia gïr bïïtarï mos bïïna darakatai aatïmï Suxi Kristo.

8Kïï tuiga Diuxi gïn bïïtarï kaxkïdï kïïgakïrï bubuaka aapimï buaboidakai. Mai kïïgakïrï bubuaka aapimï ïïgi gïn gubukarhigakïdï tudu. Ïmo oidaragai gobai ix makïdï gïr maa Diuxi bhaiyoma. 9Odami maiti ixtutuidikïi xi ïïgi kïïgakïrï gïn bubiadagi aaduindadïkïdï. Kaxkïdï mai tipuka agai xorai potïiyagi sai ïïgi gubukarhigadïkïdï kïïgakïrï busai. Mai tipukamu ixtukïdï gïdukïdï gï aagagi tomarhi ïmadutai aidï. 10Bhaiyoma Diuxi ïgai dai gïr utuduturhi bïïnakai aatïmï Suxi Kristo. Ïgai ipïrhidi xi aatïmï ibuadagi ixtumaxi ïr kïïga, kaxkïdï pomaaxi bïïtarï gïr utuduturhi ïgai. Dai ipïrhidi ïgai xi óídakagi aatïmï xibi ibuadatai go kïïgadukami aaduindagai ix makïdï ïgai ïkiaxdïrï bhai dui xi buadagi aatïmï.

Ïmo aadunumï aatïmï xibi bïïnakai Suxi Kristo

11Kaxkïdï aapimï ix makïdï maiti ïr judidiu abïr gïn tïgito ajiopada sai mai biakana aapimï urabaragai ïkioma go judidiu ïmadï. Mai circuncidadugami gïn aagaiña go judidiu aidï mai biakatai aapimï go circuncision ix dukai bia ïgai. Go circuncision ix makïdï odami ibuayi dai mos ïr gatukuga bïïtarï tudu. 12Tïgitobïrai ïpï sai aidï maiti gïn ajïakatadai xi gïn soikïdagi Suxi Kristo dai mai biakatadai aapimï urabaragai ïmadï go Israelitas. Diuxi bhai dui ñoki go Israelitas ïmadï dai aagidi saidi iduñagai naana maaxi ixtumaxi ïgai bïïtarï dïï aapimï maiti ïr gïn bïïtarïkatadai gobai. Aapimï mai biakatadai soiñi aidï dai mos óídakaiña mai maatïkatai Diuxi. 13Aidïpïrï mai uraba darakana aapimï Diuxi dïï xibi gia ka kïï miadïrï uraba óídaga aapimï. Suxi Kristo ïgai dai bhai dui gïn bïïtarï ïradïkïdï dai miadïrï gïn darai bïïnakai aapimï ïgai.

14Suxi Kristo ïgai dai bhai dui gïr bïïtarï xi ka mai tipukana buidïrï kaatïkaragai saidi xibi ïr ïmo aadunumïkana go judidiu ïmadï ix makïdï maiti ïr judidiu. 15Suxi Kristo bhai dui mukukai kuruxiana saidi ïr ïmo aadunumïkana go judidiu ïmadï ix makïdï maiti ïr judidiu mos buaboidakai ïgai. Mukukai ïgai ugiturhi go sïïrhikami ix makïdï go judidiu biakatadai xi ïïgiadagi. Go sïïrhikami ïgai dai ïjïkobaiturhi go judidiu ïmadï ix makïdï maiti ïr judidiu tudu. Kaxkïdï mukukai bhai dui Suxi sai go judidiu ïmadï ix makïdï maiti ïr judidiu gïn oigïadagi aipakoga.

16Suxi Kristo bhai dui Diuxi ïmadï aidï go judidiu bïïtarï dai ix makïdï maiti ïr judidiu bïïtarï ïpï. Kaxkïdï ïr ïmo aadunumï aatïmï xibi. Suxi Kristokïdï ugidagai go buidïrï bïïtïkaragai mukukai ïgai kuruxiana.

17 Ïgai dibia dai odami buitapi aiturhi go bhai ïrhiaragai ñoki ix makïdï ibhïxtakan taadatudai iibhïadï odami. Idi bhai ïrhiaragai ñokikïdï bïïxi óídakami bhaiga ix biakagi urabaragai Diuxi ïmadï. Mai xudu tomaxi mïkaxi darakagi Diuxiañdïrï mai judiukatai ïgai dai mai xudu ïpï xi ïr judiukagi dai miadïrï dukai darakagi Diuxi.

18Tomax dukai, xi ïr judiukagi aatïmï xi maiti ïr judiukagi ïpï, tomax dukai Suxi Kristo gïr maa baakigai xi urabana aatïmï gïr Oga. Xibi Diuxi Ibhïadïkïdï bhaiga aatïmï xi aatagiadagi ïgai tudu. 19Kaxkïdï xibi Diuxi ka mai xibhïadïrï óídakami dukai gïn nïidi, aapimï ix makïdï maiti ïr judidiu. Xibi kïïga bia aapimï ïïmadaragai ïmadï Diuxi. Ïmo gïn aadunumï dukai aapimï ïmadï ix makïdï Diuxi ïko bubaitu, ïmadï go judidiu tudu. Xibi kaxi ïr Diuxi aaduñdï aapimï.

20Dai aatïmï aaduñdï Diuxi ïr Diuxi kiidï dukai ix makïdï gï kïïsatu ïmo kïï kabakami simiento daama. Suxi Kristo ojotosadï ïmadï go aagadami Diuxi ñokidï ïr go simiento dukai xako daama guka aatïmï. Dai Suxi Kristo ïr go kïïgadukïdioma odai dukai ix makïdï baaki xixodïrï daja. Ïgaiñdïrï tudu daagïkan guka aatïmï ix makïdï ïr Diuxi kiidï. 21Aatïmï ïr ojodai dukai ixtukïdï duñixi Diuxi kiidï. Dai Suxi Kristo ïgai dai kïï bhai dukai gïr darasai Diuxi kiidïrï. Podukai aatïmïkïdï gï kïïsaimi ïmo kiupai kïï buañixikami Diuxi bïïtarï. 22Dai xibi aapimï ix makïdï maiti ïr judidiu bïïna daraka Suxi Kristo ïpï. Xibi aapimï ojodai dukai gïn darasaka Diuxi kiidïrï ïpï. Podukai aatïmï bïïxkatai ïr tutuidadï Diuxi kiidï dukai xako oidaga ïgai gïr ïrana dakatai Diuxi Ibhïadï.

Currently Selected:

Efesios 2: NTP

Highlight

Compare

Copy