Kolosenses 4

1Dai aapimï ix makïdï ïr ga amu abïr kïï sïïrhi buidada gïn pipioñiga ïpï maatïkatai sai aapimï bia gïn Amu tïbagiana ïpï.

Go Pabora aagidi go buaboitudadami sai mai dagitokai daanïda ïgai Diuxi

2Gin aaduñi, gï agai xi mai dagitokai dai kïïga nïnïasïrhigan dukai daanïda aapimï Diuxi bhai gïn ïrhiditai ïgai buidïrï. 3Daanïdabïrai gïr bïïtarï tudu sai mai dagitoagi ïgai tomarhi ïmo ixtumaxi ix gïr sobhidagi ix aagiada aatïmï Diuxi ñokidï aipakoga. Sai aagiada aatïmï go aatagi aagaitai Suxi Kristo tudu. Gobai ïr go aatagi ix makïdï ïxtokikana ïkioma ix makïdï gïr tïtïgidi Diuxi utudami. Gobai tudu aagaiña aanï dai gokïdï gin maixatu aanï xibi. 4Daanïdabïrai Diuxi tudu sai kïïga aagiadagi aanï go ñoki ix dukatai gï agai sai podukai maatï kaïkana odami ix tumaxi aagiada aanï.

5Kïïga abïr gïn tïgito nïijada ix dukatai ibuayi aapimï buidïrï go óídakami ix makïdï mai kia buaboitudai. Xibi kia bia aapimï oigaragai xi ibuadagi ixtumaxi ïr soiñi ïgai bïïtarï tudu dai kaxkïdï abïr kabami gïn aaga dai mai dagito ix mos dïgabuskïdagi tasai. 6Kïïga abïr bhai dukai aatagada odami sai podukai kïï yoobikan kaitiadagi gïn aatagi. Dai podukai kïïga maatïkamu aapimï ix dukatai aa noraidagi ix makïdï gïn tïkakagi ixtumaxi gïn buaboidaragakïdï.

Go Pabora otoxdi ïmo biatuldaragai go buaboitudadami

7Gin aaduñi, go Tikiko ïgai dai gïn bhïidakamu idi ojai. Ïgai kïï mai dagitokai aatabuayi Suxi Kristo aaduindadïrï pioñigadïkatai ïgai dai kïïga oigïdai aatïmï. Ïmo pioñigadï ïgai Suxi tudu ïpïan dukai aatïmï. Ïgai kïïga gïn aagidamu ix dukatai daja aanï tami. 8Pomaaxi bïïtarï aagidi aanï sai gamo imïna tudu. Aagidi aanï go Tikiko sai gïn aagidana ïgai ix tumaxi po gï buimi aatïmïkïdï sai podukai gïn abïnakidana ïgai.

9Go Onesimo oijadamu ïpï. Ïgai ïr ïmo gïr aduñi Diuxi amadïrï ïpï ix makïdï gïn urabakana amïka dai ix makïdï kïïga oigïdai aatïmï. Kïïga kabakana ïgai buaboidaradï. Dai ïgai ïmadï go Tikiko tudu gïn aagidamu bïïxi ixtumaxi po gï buimi tanai.

10Diuxkïdï gïn biaturhi go Aristarko. Ïgai tanai maixapi ïpï gin ïmadï. Dai go Markos gïn otoxdi ïmo biatuldaragai ïpï. Ïgai ïr sukurhidï go Bernabé. Kaxi gïn otoxdi aanï ñoki baasïki sai kïïga miadïgidagi aapimï go Markos tudu xïïxkadï gïn dibidagi ïgai. 11Dai go Suxi ix makïdï Justo aagaiña aatïmï, ïgai gïn otoxdi ïmo biatuldaragai ïpï.

Gin aaduñi, muidu go judidiu ix makïdï buaboitudai dïï mosïkaxi go Aristarko dai go Markos dai go Suxi Justo ïgai dai gin ïmadï gaatabuayi tanai. Agia kïïga ïr ïmo bhai ïrhiaragai gin bïïtarï gin soikïitai ïgai. Gin soikïi ïgai aipakoga aiturhitai aatïmï go bhai ïrhiaragai ñoki ix makïdï aagai ixdukatai tïanïi Diuxi.

12Diuxikïdï gïn biaturhi go Epafro ïpï. Ïgai ïr ïmo pioñigadï Suxi ïpï dai gïn urapïkïiña ïgai amïka ïpï. Ïgai bïïxi ibhïgadïkïdï gïn daanturhiña sai kïïga kaban gukakana aapimï gïn buaboidaraga. Dai gïn daanturhi ïgai ïpï sai kïïga biakana aapimï ibhïxtaragai kïïga maatïkatai aapimï bïïxi ixtumaxi ipïrhidi Diuxi saidi ibuada aapimï. 13Kïïga nïidiña aanï xïï kabami buamï gï ïrhidi go Epafro aapimï gïn bïïtarï tudu dai bïïtarï go buaboitudadami Laodisiïrï dai Heriopoliïrï ïpï.

14Go Lukas gïn biaturhi ïpï. Ïgai tudu ïgai daidi ïr go duduadadami ix makïdï kïïga oigïdai aatïmï. Dai go Demas gïn biaturhi ïpï.

15Diuxkïdï abïr biatulda go buaboitudadami amïka Laodisiana. Daidi abïr biatulda go Nimfa ïpï ïmadï bïïxi go buaboitudadami ix makïdï gïn ïmpaidiña ami kiidïrï ïpï.

16Aapimï buaboitudadami ami Kolosiïrï abïr nïñiada ix kaiti idi ojai dai ka nïidakai aapimï abïr daibunda mïï go buaboitudadami ix makïdï gïn ïmapidi Laodisiana. Dai amïka Laodisiañdïrï gïn ayi agai ïpï ïmai ojai ïpï. Gobai abïr nïñiada ix kaiti ïpï.

17Aagidabïrai go Arkipo sai kïïga ibuada go aaduindagai ix makïdï maa Gïr Nukadakami ïpï.

18Xibi tami gïn ojidi aanï ïpï ïmo biatuldaragai ïïgi gin nobikïdï#4:18 Go Pabora aagiditadai ïmai ixtuma ojai dasagi dai podukai idui idi ojai. Dïï gia tami kugïrï go ojai ïïgi nobidïkïdï oja ïgai ïmo biatuldaragai sai podukai go buaboitudadami Kolosiïrï kïïga maatïkana saidi ïr buaboi sai Pabora ïgai dai otoxdi go ojai. .

Aanï ïr Pabora dai gïn ojidi tudu.

Daanïdabïrai Diuxi gin bïïtarï maixapikatai aanï tanai.

Gin aaduñi, ipïrhidi aanï sai kïïga maatï taatana aapimï xïï kïï tuiga Diuxi gïn bïïtarï.

Mosïkaxi

Currently Selected:

Kolosenses 4: NTP

Highlight

Compare

Copy