Hechos 22

1—Aapimï kïkïrhiodami dai bïïxi aapimï gin aaduñi, kaïkabïrai, aanï mai bia ixtukïdï gïpiïrï gin bupadagi aapimï— itïtïdai Pabora Hebreokïdï.

2Daidi go odami mos kaïkai ix Hebreokïdï ñokai ïgai, ka kïïgioma dodorhi bii. Daidi Pabora itïtïdai aidï,

3—Daiñi— itïtïdai, —Aanï ïr judiu. Tarso kiikiïrï busaikami aanï, Cilicia oidigïrï. Dai tanai Jerusalenïrï gïrakami aanï. Go ojadami Gamaliel ïgai dai gin maatïturhi dai gin maatïturhi ïgai bïïxi go sïïrhikami ix makïdï gïr biturhi gïr aaduñi ïki. Aanï bïïxi gin ibhïdagakïdï ïïgida in ïrhidiña Diuxi ïpïandukai ix dukatai ïïgida ïrhidi aapimï Diuxi xibi ïpï. 4Aanï ïïkioma kabami soi buadana bïïxi go ix makïdï buaboitudai Suxi Kristo. Dai kodaiña aanï ïïmoko dai jaa buyiña aanï dai bupuraiña kadenakïdï dai maamaixapaiña bïïxi modukai kïkïïrhi ïmadï oki. 5Go kïïrhi bhaitï kïakami dadaxdadami judidiu ïmadï bïïxi go gaa bhaitï gukakami kiupiïrï kïïga maatï dai gïn aagida antaada gobai sai kïïga buaboi aagai aanï. Ïgai tudu gin maa baasïkioma ïmo ojixikami xi tïïgidana aanï gïr aaduñi judidiu Damaskoïrï óídakami. Ïgai ojixikamiïrï gin maatadai ïgai oigaragai ansai imïna Damaskoana dai ansai gaagana buaboitudadami ami. Dai aanï poduña in agaitadai tudu. Buapa in agaitadai aanï go buaboitudadami tanai Jerusalenïrï dai dudunukami buidïrï tutusa in agaitadai sai ïgai maakana gïgïbidaragai.

6Dai aidïxi ka Damaskamu imïdamikatadai aanï dai karhioga ayitadai aanï parï daanduko ïxi bai todian dukai gin xikorhi bïpïdorhian dui ïmo gïï kudagi tïbagiañdïrï. 7Antai dïbïrapi gïi aanï dai kaï aanï ïmo ñoki bai pobai in tïtïdai,

—Saulo, Saulo, ¿Tui pïxi aidï gin buidïrï kaatïkami aapi dai soi gin buayi? —ikaiti go ñoki.

8—¿Borï aapi tïanïdami?— itïtïdai aanï aidï.

Daidi go tïbagiañdïrï ñoki ikaiti,

—Aanï ïr Suxi go Nasaretañdïrï oidakïdï— ikaiti. —Dai soi gin buayi aapi—.

9Dai go kïkïïrhi ix makïdï gin ïmadï iimïitadai tïï go kudagi ïpï dïï mai kaï go ix makïdï gin ñokiditadai.

10Daidi aanï itïtïdai aidï go ix makïdï gin ñokidi,

—Tïanïdami, ¿Tumaxi ipïrhidi aapi xi iduña aanï?—

Daidi Gïr Nukadakami gin tïtïdai aidï,

—Kïkibañi dai imi Damaskamu xi ami ïmo kïïrhi gï aagidamu pïx tuma duñagi— gin tïtïdai.

11Daidi kïkiba aanï ïpamu dïï ka xatuitadai gin nïadaga go kudagikïdï xi gin aaduñi biakatadai xi gin nobiana gin bhïkatikagi Damaskoana ukami. 12Dai ami oidakatadai ïmo kïïrhi Ananias tïgidukami. Ïgai kïïga ïïgidi kaïkana Diuxi ñokidï dai go judidiu Damaskïrï óídakïdï sïïrhikïdï kïïga ñokaiña ïgai bïïtarï.

13Daidi go Ananias mïï dibia xako dajatadai aanï daidi gin tïtïdai aidï,

—Gin aduñi Saulo, ka bhaiga aapi ix nïadagi ïpamu— gin tïtïdai.

Mos potïi ïgai antai otoma nïnïaba aanï ïpamu dai tïï aanï go Ananias xi gin aatagiditadai. 14Dai ïgai pobai gin tïtïdai ïpï,

—Diuxi ix makïdï aatïmï judidiu xadutudaiña ïïki abhiadïrï kaxi ïkobai gï busaitu aapi Saulo pai aapi maatïkana Diuxi tïgibudadï. Ïkobai gï busaitu ïpï pïsai nïijadana aapi gïr Bhaitï Kïakamiga, go ix makïdï kïï buañixi ibhïadï tudu. Dai ïkobai gï busaitu Diuxi pïsai aapi Saulo kaïkagi ixtumaxi gï aagiadagi ïgai ïpï—. 15Dai Ananias gin tïtïdai ïpï, —Daiñi— gin tïtïdai, —Diuxi ipïrhidi sai aatagaiña aapi buitapi bïïxi go óídakami ixtumaxi ñoki kaï aapi dai ixtumaxi tïï ïpï— ikaiti. 16—Xibi maitï agai xi nïnïrakagi aapi bamioma. Mos buaboitudaitai aagida aapi Gïr Nukadakami bai ïgai oigïldana gï soimaaxkamiga, daidi otoma gï bakuanada aidï— gin tïtïdai go Ananias.

17Daidi Pabora oi gï aatagi dudunukamiïrï kïakatai daidi ikaiti, —Bhodïrï dibia aanï ïpamu tanai Jerusalenïrï dai jii aanï go kiupiamu dai ami tïïtïkiïrï dukai 18tïï aanï Suxi Gïr Nukadakami. Baidi ïgai gin tïtïdai,

—Obaidañi dai busai tabhiadïrï Jerusalenañdïrï— gin tïtïdai. —Kaxkïdï tudu go óídakami tanai mai buaboida kaïka agai gï aatagi gin aagaitai aapi— gin tïtïdai.

19Antai itïtïdai aanï aidï,

—Gin Nukadakami kïïga maatï tami óídakami xi aanï bapakïiña aipakoga kikiupiïrï dai buyiña ix makïdï gï buaboitudai dai gatïjai aanï gïikarsaragai ïpï gï buaboitudaitai ïgai— antïtïdai. 20—Dai aidïxi gï muatu go Tibañi aanï ami dajatadai ïpï. Ïgai ïr ñokadamikatadai aapi bïïtarï dai aanï bhai aa sai gï muatudagi dai asta nukada aanï bapasaradï ix makïdï gamua— antïtïdai.

21Daidi Gïr Nukadakami pobai gin tïtïdai,

—Imiñi aapi tabhiadïrï. Gï otosa iñagai mïkaxi xako óídaga go ix makïdï maiti ïr judidiu,

pobai in tïtïdai Gïr Nukadakami tudu— itïtïdai Pabora.

22Kïïga kaïkatadai go odami Pabora ñokidï ami ukami dïï aidïxi kaï ïgai xi pokaititadai Pabora sai Diuxi otosa agaitadai maigobai mïkaxi xako óídaga go ix makïdï maiti ïr judidiu aidï ijiña ïgai daidi ikaitimi,

—Muabïrai tudu— ikaitimi. —Maiti agai xi nïijada aatïmï ïpamu tanai oidigi daama— ikaitimi odami.

23Daidi apia gïïgïrï xixokimi ïgai dai maigobai susurhigai baapasaradï dai tïkabi daitudaimi dïbïrai ïpï mosïï kabami bhakoikai. 24Daidi go komandante gatïjai gï sandadaru sai kuartelïrï baasana ïgai go Pabora dai sai ami gïikarsana ikixanaikïdï bai ñokada ïgai dai aagana ix tuixidï gï bui bhaakoitadai odami.

Pabora podukai aagai saidi ïr ïmo romano ïgai

25Dïï gia aidïxi ka burakatadai ïgai dai ka gïikarsa agaitadai saidi go Pabora ñokidi ïmo sonoïrï kïakamigadï go komandante ix makïdï ami kïakatadai daidi itïtïdai aidï,

—¿Bia mïxi aapimï sïïrhikami ix in gïikarsagi podukai? Aanï ïr romano tudu dai mai kia baan gin kïi aapimï dudunukamiïrï ïpï xi ïgai aagagi ix bhai ïr soimaaxi buadami aanï ix cho ïpï— itïtïdai Pabora.

26Daidi mos kaïkai go sonoïrï kïakami ix kaititadai Pabora bai otoma aagidi ïgai go komandante daidi itïtïdai,

—Idi kïïrhi asïr ïmo romano— itïtïdai. Gï agai xi Kïïga gï tïgito nïida tudu pïx tuma duña agai ïgaikïdï— itïtïdai.

27Daidi go komandante mïï dibia xako dakatadai Pabora daidi itïtïdai,

—¿Buaboi xi ïr ïmo romano aapi?— itïtïdai.

—Ïjï— itïtïdai Pabora.

28Daidi go komandante potïtïdai aidï,

—Aanï gia mui gaanamïki tuminxi dai gin romanutu— itïtïdai.

Dai Pabora aa noragi daidi itïtïdai aidï,

—Aanï gia romano busai oidigi daama— itïtïdai.

29Daidi go ix makïdï gïikarsa agaitadai go Pabora otoma maigobai gukiba dai dagito kaïkai xi ïr ïmo romano ïgai. Daidi go komandante máí ïpï ix ka butadai ïgai ïmo romano kadenakïdï dai duadimu.

Dudunukamiïrï gï kïsatu go Pabora

30Bhodïrï xadiko go komandante kïïga maatïka ïrhiditadai ix tuixidï bhakoitadai go judidiu Pabora bui. Daidi upai kadena ixtukïdï burhidikatadai Pabora. Bhodïrï gatïjai saidi gïn ïmpaidana go dadaxdadami judidiu ïmadï kïkïrhiodami bhaitï gukakïdï. Bhodïrï gamo baidaja ïgai go Pabora dai baan kïi buitapi ïgai ïmpaiñdaragïrï.

Currently Selected:

Hechos 22: NTP

Highlight

Compare

Copy