2 Tesalonicenses 3
3
Pabora aagidi go buaboitudadami sai daanïiña ïgai Diuxi ïgai bïïtarï
1Ïpï ïmo ñoki, gïn aagida ïragai gïr susukurhi. Mïsai daanïiña aapimï Diuxi gïr bïïtarï sai otoma mui odami aipakoga óídakami kaïkana go bhai ïrhiaragai aatagi. Dai sai namïakami dukai kaïkagi ïgai dai buaboitudagi ïpïandukai idui aapimï. 2Mui óídakami mai buaboitudai tudu dai ïr soimaaxi ibuadami. Kaxkïdï abïr daanïda ïpï sai gïr nukadakana Diuxi sai mai soi gïr buidadagi ïgai ix makïdï ïr soimaaxi ibuadami. 3Kïï maatï aatïmï tudu sai tomaxi oidaga mui soimaaxi ibuadami ix makïdï soi gïr buidada ïrhidi dïï bïïxkïrï maiti gïr dagitomu Gïr Nukadakami. Kaxkïdï gï maatï ïpï sai gïn maakimu ïgai gubukarhigai dai gïn nukadakamu xïïxkadï soi gïn buidada agadagi go diabora.
4Dai kïïga maatï aatïmï sai gïn soikïi Gïr Nukadakami kaxkïdï kïïga buaboitudai aatïmï sai ibuayi aapimï bïïxi ixtumaxi gïn tïjai aatïmï. Kïïga buaboitudai aatïmï dai maatï sai tomarhi ïmo imidagai mai gajiadïrï biamu aapimï gïr ñoki ix makïdï gïn mamaatïturhi aatïmï. 5Daanïi aatïmï Diuxi sai gïn soiñana sai bïïx tasai bamioma maatïkana aapimï xïï kïïga gïr oigïdai ïgai. Dai sai ix dukai kabakami dukai kïakana Suxi aidïxi soimaaxi taata ïgai sai podukai kabakami gukana aapimï ïpï.
Pabora maa ñoki aagaitai paparïgami
6Gïr susukurhi, bia aatïmï ïmo sïïrhikami Suxi Kristoañdïrï ix makïdï ïr Gïr Nukadakami ix kaxkïdï gïn tïanïi aatïmï sai mai urapïkïiña aapimï tomarhi ïmo buaboitudami ix makïdï mai ïïgidi go ñoki ix makïdï gïn maa aatïmï baasïkioma. Sai mai urapïkïda aapimï ix makïdï mai aatabuada ïrhidi paparïgakatai tudu. Gobai gïn tïanïi aatïmï biakatai ïmo sïïrhikami ix makïdï gïr maa Suxi Kristo Gïr Nukadakami.
7Kïï maatï aapimï sai gï agai ix gïr ïpïan dukai óídakagi aapimï tudu. Daiñi, kïï nïidi aapimï sai mai paparïgakana aatïmï gïn ïmadï darakatai. 8Dai bhaiyoma bïïxkïrï aa namïidiña aatïmï xorai gïr maakiagi kuadagai. Tomarhi mai biakana aatïmï ibhïxtaragai bhaitoma kabami gaatabuadatai sai maiti gï aagadagi aapimï ix gïr maakiagi ixtukïdï óídakagi. Maiti ipïrhiditadai aatïmï ix soi gïn buadagi aapimï di. 9Kïïga biakatadai aatïmï sïïrhikami ix gïn tañiagi soiñi dïï bhaiyoma gaatabuadana aatïmï dai maitïkïiña ixtukïdï óídakagi. Kaxkïdï tudu ipïrhiditadai aatïmï ix gïr nïiditai maatïkagi aapimï ixdukatai gï agai ix oidakagi ïmoko.
10Aidïxi amïka gïn ïmadï darakatadai aatïmï ¿Mai ix tudu gïn aagidiña aatïmï sai xorai mai aatabuada ïrhiadagi sai maiti gï agai xi maakiagi soiñi ix tuma kudagi ïgai? 11Dïï kajioma aatïmï sai paparïga ïïmadutai aapimï. Maiti as aatabuayi ïgai dïï gia jaa aaduindadïrï gia tïanïdan dukai bapasai. 12Daiñi, bia aatïmï ïmo sïïrhikami ix makïdï gïr maa Suxi Kristo ix kaxkïdï tïanïi aatïmï ïgai sai mai paparïgakana dai sai kïï bhai maaxkami gaatabuadana bhaiyoma dai sai ïïgi maitïkïiña ixtuma kuadana. 13Dai aapimï ix makïdï gia kïïga aatabuayi abïr mai ojodada gïn aaduindagai dai bhaiyoma abïr apia oijada dai ibuada ixtumaxi ïr soiñi.
14Dai ix oidakagi xorai mai ïïgiada ïrhiada idi ojai dai mai aatabuayi abïr gïn tïgito nïida dai aagada xorai ïgai daidi abïr mai urapïkïda. Podukai xaïrogidamu aapimï ïgai sa bhai ïmadukai gï tïgitoagi ïgai. 15Dïï gia maiti gï agai ix ïmo gïn buidïrï kaatïkami dukai nïijada aapimï dai bhaiyoma gï agai ix maakada aapimï ñoki gïn aduñikatai ïgai.
Pabora otoxdi ïmo biatuldaragai go buaboitudadami
16Gin susukurhi, daanïi aanï Gïr Nukadakami ix makïdï gïr maakai ibhïxtaragai sai gïn ibhïxtakan taadatudagi ïgai tomax tuma daibuñagi aapimïkïdï. Daanïi aanï sai gïn soiñana ïgai bïïxi aïkatïrï tudu.
17Gin susukurhi, aagidiña aanï ïmai ix tuma dasana dai idui idi ojai dïï xibi gia tami lïïchi ïïgi gin ïkakïdï ojai aanï dai gïn otoxdi ïmo biatuldaragai. Podukai nïiditai aapimï ix dukatai ibuayi aanï ojai kïïga maatïkamu aapimï saidi ïr buaboi xi aanï gin otoxi idi ojai. 18Gin susukurhi, daanïi aanï Suxi Kristo Gïr Nukadakami sai maatï taatagi bïïxkatai aapimï xïï kïï tuiga ïgai gïn bïïtarï. Mosïkaxi.
Currently Selected:
2 Tesalonicenses 3: NTP
Highlight
Share
Compare
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida
