1Tesalonicenses 5

Pabora aagai ix dukatai po gï duñagai xïïxkadï dibiagi Gïr Nukadakami

1-2Gïr susukurhi, kïï maatï aapimï sai tomarhi ïmadutai maatï xuduku tomarhi ix tuigako dibiagai Gïr Nukadakami. Kïï maatï aapimï tudu sai Gïr Nukadakami dibiagai xïïxkadï mai nïnïrakagi odami ïpïan dukami ïmo ïxibugami dibiagi xïïxkadï aatïmï mai nïnïraka.

3Xïxkadï karhioga dibia agadagi Gïr Nukadakami go óídakami pobïnïldamu sai mai tipu duadimudagai daidi pokaitadamu sai xioma daraka mai biakatai ixtukïdï buamï gïn ïrhiadagi. Dai aidï todian dukai gïpiïrï surhigimu ïgai dibiakai Gïr Nukadakami. Sïïrhikïdï todian dukai ayimu gïgïbidaradï tudu. Po ïxi ix xïï todian dukai kokorïi ïmo oki buapa agaitai ïmo arhi odami po ïxi todian dukai ayimu gïgïbidaradï óídakami dibiakai Gïr Nukadakami ïpï dai mai tipukamu soiñi ïgai bïïtarï.

4Gïr susukurhi, aapimï kïï maatï ixtumaxi daibuña agai. Kaxkïdï tomaxi óídakami mai nïnïraka ix dibiagi Gïr Nukadakami dai todian dukai ayimu ïgai dïï gia aapimï gï agai ix nïnïra darakagi. 5Daiñi, go soimaaxi maiti gïr tïanïi tomarhi aatïmï tomarhi aapimï ïpï. Mai tukarï dukai óídaga aatïmï tudu dai ïïgidi aatïmï bhaiyoma ixtumaxi ïr kïïga dai tasïrï dukai óídaga. 6Maiti gï agai tudu ix koximukandukai óídakagi aatïmï dai bhaiyoma nïnïasïrhigan dukai óídakagi dai kïï sïïrhi gïr tïgitokagi.

7Xïïxkadï mai maaxi oidigi tukarï aidï kokosïiña odami dai aidï nabaakorïiña ïpï tudu. 8Dïï mai podukai óídaga aatïmï. Tasïrï dukai óídaga aatïmï bhaiyoma. Kaxkïdï gï agai xi kïï sïïrhi gïr tïgitokagi aatïmï biakatai gïr buidïrï kaatïkami ix makïdï ïr go diabora. Gï agai ix apia buaboitudada aatïmï Suxi Kristo dai ix oigïdada ïgai ïmadï jaa ïpï. Gobai gïr soiñamu go diabora bui ïpïan dukai xi ïmo baiñomi nagiakarui soikïi ïmo sandaru kokodiïrï. Dai gï agai ïpï xi kïïga buaboidaitai nïnïrakagi aatïmï maatïkatai sai Suxi Kristo kïïgakïrï gïr bubiadamu. Kaxkïdï tudu gïr nïnïraragai ix makïdï bia aatïmï maatïkatai sai kïïgakïrï bubuakimu aatïmï gïr soiñamu sai mai soi gïr buidadagi go diabora. Gïr soiñamu gobai ïpïandukai xi ïmo kasko soikïi ïmo sandaru kokodiïrï.

9Daiñi, Diuxi ïkobai gïr bubaitu sai kïïgakïrï bubuakïna aatïmï buaboitudatai aatïmï Suxi Kristo dai mai xu ix ïkobai gïr bubaitu gïr maaki ïrhiditai ïmo gïgïbidaragai. 10Suxi Kristo tudu ïgai dai muu dai bhai dui sai óídakaiña aatïmï ïmadï bïïxkïrï bïïtarï. Dai ïmadï óídakamu aatïmï tudu dai mai xïdu ix ka koi aatïmï ix kia duduakakagi ïpï xïïxkadï dibiagi ïgai.

11Kaxkïdï apia abïr gïn abïnakiada aipakoga idi aatagikïdï dai abïr gïn soikïda ïpï sai bamioma gïrana gïn buaboidaragai. Kaxi pobuadana aapimï tudu dai gï agai xi apia pobuadagi.

Pabora gamaa aatagi dai aagidi ix dukatai gï agai ix óídakagi go buaboitudadami

12Gïr susukurhi, sïïrhikïdï gï agai ix namïakami dukai nïijada aapimï gïn bhaitï gukakamiga ix makïdï kabami aatabuayi gïn soikïitai. Gïn mamaatïtuldiadami ïgai tudu dai gïn maakai ïgai ñoki sai mai soimaaxi ibuadagi aapimï. 13Kabami aatabuayi ïgai gïn soikïitai. Kaxkïdï abïr kïïga xadutuada ïgai dai oigïdada. Daidi abïr maiti gïn bupui ñokada aapimï ïpï.

14Gïr susukurhi, ix makïdï gïn urapïkïi dai paparïga abïr maakada ñoki. Daidi ix makïdï duduadikui abïr abïnakidada. Dai ix makïdï mai gupuka buaboidaradï abïr soikïda. Ïgai bïïxkatai gï agai xi mai dagitokai soiñagi aapimï dai mai ojodadagi.

15Daidi abïr mai soi buidadagi xorai soi gïn buidadagi ïpï. Bhaiyoma abïr ibuada ixtumaxi ïr soiñikagi ïgai bïïtarï tomaxi maiti ïr buaboitudadamikagi ïgai ix ïr buaboitudadamikagi ïpï.

16Dai abïr bïïxkïrï bhai gïn ïrhiada. 17Daidi abïr aatagada Diuxi ïmadï bïïxkïrï. 18Bïïna daraka aapimï Suxi Kristo xi kaxkïdï Diuxi ipïrhidi xi bïïxi aïkatïrï aagada aapimï xïï bhai gïn ïrhidi Diuxikïdï.

19Maiti abïr sobhikïda Diuxi Ibhïgadï xïïxkadï gïn saagida gaatabuadagi ïgai. 20Dukami xïïxkadï po kaitiadagi ïmadutai sai Diuxi tïïgi ïmo ñoki abïr mai otoma gajiadïrï bia ñokidï. 21Abïr kïïga gïn tïgito kaïkagi ñokidï bhaiyoma as bhai Diuxiañdïrï ñokai. Dai ix kïï buañixikagi go ñoki abïr ïïgiada 22dïï gia ix soi maaxkagi aidï gia abïr mai ïïgiada gobai.

23Gïr susukurhi, daanïi aatïmï Diuxi sai gïn soiñana sai go ïïgi Diuxi bïïtarï óídakaiña aapimï. Diuxi tudu ïgai dai gïr maakai ibhïxtaragai. Daanïi aatïmï ïgai sai gïn nukadakana sai maiti gïn sarabidana soimaaxkami tomarhi gïn ibhïdagïrï tomarhi gïn tïgibudagïrï tomarhi gïn tukugïrï. Daanïi aatïmï sai kïï buañixikami gïn biakana ïgai tudu asta xïïxkadï ïpamu dibiagi Suxi Kristo Gïr Nukadakami. Podukai mai tipukamu ixtukïdï gïpiïrï gïn bupadagi ixtumaxi dibiakai ïgai. 24Pomaaxi bïïtarï gïn báí Diuxi tudu sai buañixikami gïn biagi ïgai. Dai kïïga maatï aatïmï sai buañixikami gïn biamu ïgai. Ka podukai aagai ïgai tudu ix kaxkïdï pobï gï duñimu gobai. Mai yaataboga ïgai di.

25Gïr susukurhi, daanïdabïrai Diuxi gïr bïïtarï.

26Dai kïïga abïr gïn biaturhiada gïn oigïdatai aipakoga.

27Aanï ïr Pabora dai gïn ojidi idi ojai dai gïn tïanïi aanï gubukadadïkïdï Suxi Kristo sai nïnïidiña aapimï idi ojai bïïxi go buaboitudadami ïmadï sai kaïkana ïgai ix kaiti.

28Gin susukurhi, ipïrhidi aanï sai maatï taatagi aapimï xïï kïï tuiga Suxi Kristo gïn ïmadï. Mosïkaxi.

Gin susukurhi, aagidiña aanï ïmai ix tuma dasana dai idui idi ojai dïï xibi gia tami lïïchi ïïgi gin ïkakïdï ojai aanï dai gïn otoxdi ïmo biatuldaragai.

Currently Selected:

1Tesalonicenses 5: NTP

Highlight

Compare

Copy