1 Korintios 9

Pabora aagai sïïrhikamigadï ix makïdï bia ïgai otosadïkatai ïgai Suxi Kristo

1-2Gin aaduñi, oidaga ïïmoko ix makïdï pokaiti sai aanï maiti ïr otosadï Suxi Kristo. Yaatagi gobai. Daiñi, mai tipu ïmai odami xorai gin tïanïdagi, mosïkaxi Suxi Kristo ïgai daidi ïr gin tïanïdamiga otosadïkatai aanï. Kïïga gï maatï sai aanï ïr otosadï ïgai tudu. Daiñi, aanï ïr nïijadami gïr Bhaitï Kïakamiga tudu dai aanïkïdï aatadui Diuxi sai buaboitudaiña aapimï ïpï. Aapimï tudu kïïga mamaaxidi ix namïga gin sïïrhikamiga buaboitudakai aapimï gin aatagi. Kaxkïdï kïïga maatï aapimï sai aanï ïr otosadï Suxi Kristo tomaxi jaa pokaitadagi sai maiti ïr buaboi.

Pabora maiti gataanïiña namïgadï aaduindadï bïïtarï aagaitai go bhai ïrhiaragai aatagi

3Ïïmo odami nïidiña ix dukatai aatabuayi aanï dai pokaitiña sai mai bia aanï sïïrhikami ix gïn tanïdagi soiñi. Dïï aanï aagai sai 4aanï ïmadï go Bernabé kïïga bia sïïrhikami ix gïr maakiagi aapimï soiñi ix tukïdï óídakagi aatïmï. Ojotosadï aatïmï Suxi Kristo di. 5Dai bia aatïmï go arhi baaxi sïïrhikami ix makïdï bia go gaa ojotosadï Suxi ïpï. Daiñi, go Piduru ïmadï go Suxi susukurhidï dai ïmadï go gaa ojotosadï Suxi bïïxkatai ooñiga buaboitudadami dai baida ajiopaiña ïgai aagaitai Diuxi ñokidï aipakoga. ¿Dai aanï ïmadï go Bernabé bhai ix mai bia sïïrhikami ix pobuadagi ïpï? 6Xadïrï ïr sïïrhikana tudu ix mosïkaxi aanï ïmadï go Bernabé biakagi ix gaatabuadagi dai ïïgi darasagi ixtukïdï óídakagi aatïmï. ¿Maiti ix gï agaitadai ix buiyagi aatïmï soiñi aapimïañdïrï gïn aagiditai aatïmï go aatagi? Kaxkïdï tudu ix makïdï gaatabuadagi bia sïïrhikami ix abhiadïrï aaduindadïañdïrï oidakagi. ¿Maiti ix ïr buaboi gobai? 7Dukami sandadaru aaduindadïañdïrï óídaga ïpï. Xadïrï ïïgi dasana ixtukïdï oidakagi ¿aba? ¡Cho! Go gobierno ïgai dai dadasai gobai bhaiyoma dai podukai aa namïidiña aaduindadï. Dai podukai ïpï ïmo ïsïkami uba kïï bhaiga ix ugiagi ibhiadï dai podukai aaduindadïañdïrï oidakagi. Dai ïmo nukadakami kañiñiru ïpï kïïga bhaiga ix buiyagi lïïchi bibhadï ïpï ix bhiugimukagi ïgai. Dai podukai aatïmï ïpï bia oigaragai ix gïn tanïdagi soiñi aapimï gïn aagiditai go aatagi. Gobai ïr gïr aaduindaga di dai bia aatïmï oigaragai xi gïr aaduindagaiñdïrï óídakagi ïpï.

8Dai idi ñoki maiti ïr go ïï odami tïgibudadï tudu. Asta Diuxi ïpï pokaiti sai gï agai ïmo gaatabuadami ix buiyagi maitïkidï. 9Daiñi, go Moiseskaru ojadïrï ikaiti sai,

Mïx xïxkadï ïmo turukïdï gakïrhiba agadagi gïn yooba maiti abïr dakamida bai podukai ugana lïïchi gïn yooba gaatabuadatai, po tudu oja ïgai ïïki.

Dai mai xu mosïkaxi tuturukïdï aagaitadai ïgai go ojiïrï. 10Gïr aagaitadai ïgai aatïmï ïpï di. Daiñi, xïïxkadï odami gaxikuandagi kïïga nïnïraka ïgai ix ami ïxikamiañdïrï gaugi agai. Dai ïmo gakïrhibadami tïrhigi ïpï xadïrï gakïrhibaiña ix mai buaboitudai ix abhiadïrï ugiagai ïpï. ¿Maiti ix ïr buaboi gobai?

11Dai pomaaxi aatïmïkïdï ïpï aanï ïmadï Bernabé tudu. Aatïmï ïr gaïsadami dukai gïn aagiditai aatïmï Diuxi ñokidï. Gïn mamaakaiña aatïmï soiñi gïn ibhïdaga bïïtarï tudu. Kaxkïdï ¿Dukatai maiti ïr sïïrhikana xi aadïrï gïr maakimudai aapimï soiñi gïr tukuga bïïtarï? 12Jaa aagadami Diuxi ñokidï as bia sïïrhikami ix gïn tanïdagi soiñi dai aanï poiñïrhidi sai aanï ïmadï go Bernabé bia bamioma sïïrhikami ix bhai ïgai. Dïï tomaxi bia aatïmï sïïrhikami bïïxkïrï maiti gïn táí aatïmï soiñi. Tadu mai buaboitu aapimï go bhai ïrhiaragai aatagi aagaitai aatïmï Suxi Kristo. Maiti ipïrhidi aatïmï xi sobhidagi go bhai ïrhiaragai aatagi sai ibuadana gobai soiñi aapimïkïdï tudu kaxkïdï maiti gïn táí aatïmï soiñi.

13Daiñi, kïïga maatï aapimï sai go aatabuadami ix makïdï go gïï kiupiana aatabuayi kuadana daxdaragaiñdïrï ix makïdï odami buapaiña ami kiupiana. Dai ïïmoko ix makïdï go daxdakaruïrï aatabuadana asta kuadana lïïlïchi go daxdaragai ix makïdï daxdakaruïrï dadasaiña ïgai. 14Dai Diuxi podukai aagai ïpï sai ïpïan dukai ix go aatabuadami kiupiïrï bia sïïrhikami ix buiyagi kuadagai sai podukai ïpï xorai ïr aagadami go bhai ïrhiaragai aatagi sai bia sïïrhikami ix go buaboitudadami soikïdagi sai biakana ixtukïdï oidakagi. 15Kïïga biakatadai aanï oigaragai xi gïn tanïdagi soiñi tudu dïï bïïxkïrï maiti gatáí aanï. Dai xibi mai xu ix ipïrhidi aanï ix gin maakiagi aapimï ixtumaxi dai gïn aagidi idi ñoki. Kaxkïdï kïïga bia aanï oigaragai ix pokaitadagi sai mai tanïi aanï tomarhi ïmo imidagai. Xadïrï bhai aagana aanï ix gïn tanïdagi ixtumaxi tudu. Xioma bhai aaga antaada aanï ix mukiagi di.

16Gobai tudu ïr go sïïrhikami ix makïdï gin maa Diuxi ix aipakoga aituldada aanï go bhai ïrhiaragai aatagi. Dai bia aanï ix oijadagi go aaduindagai ix makïdï gin maa ïgai. Kaxkïdï mai bhaiga aanï ix potïiyagi sai aanï ïr ïmo gïdukami gïn aituldakai go aatagi. Bia aanï ix aagagi go aatagi tudu. Kaxkïdï tudu ix mai aagagi aanï gin aiyimudai gïgïbidaragai. 17Kaxkïdï tudu tomaxi maiti ipïrhiadagi aanï ix aagagi go bhai ïrhiaragai aatagi tomax dukai bia aanï sïïrhikami ix aagagi dai mai tipu maitïki gin bïïtarï. Dïï gia ix ïïgi gin bhai ïrhiaragakïdï aagagi aanï aidï gia kïïga buyiña aanï maitïki. 18Gïn aagidamu aanï ixtumaxi go maitïki ix makïdï buyiña aanï. Daiñi, xïïxkadï mai taanïitai aagada aanï go bhai ïrhiaragai aatagi gobai ïr ïmo gïdukami bhai ïrhiaragai gin bïïtarï dai go bhai ïrhiaragai ïr gin maitïki. Kaxkïdï tomaxi kïïga bia aanï oigaragai ix gïn tanïdagi soiñi gïn aagidakai go aatagi aanï maiti ipïrhidi ix gataanïdagi.

Pabora ïr pioñigadï dukai bïïxi óídakami

19Maiti gin aa namïidiña odami gin aaduindagai tudu ix kaxkïdï mai tipu xorai gin tïanïdagi. Dïï tomaxi mai tipu xorai gin tïanïdagi aanï ïïgi bhai aa ix ïmo pioñi dukai gaatabuadagi soiña iñïrhiditai bïïxi óídakami sai buaboitudaiña. 20-21Gïn aagidamu aanï ix maaxi gobai. Daiñi, xïïxkadï gasaagida dakagi aanï gin aaduñi judidiu ibuadana aanï ixdukai ïgai ibuayi kïïga ïïgiditai go Moiseskaru sïïrhikamigadï sa bhai podukai buaboitudaiña ïgai gin aatagi. Dai xïïxkadï gasaagida dakagi aanï ix makïdï maiti ïr judidiu ix makïdï mai bia go Moises sïïrhikamigadï aidï gia ïmo mai judiu dukai ibuayi aanï sa bhai ïgai gin buaboitudaiña gin aatagi ïpï. Kaxkïdï tudu go ix makïdï maiti ïr judidiu mai bia sïïrhikami ix ïïgiadagi go Moiseskaru sïïrhikamigadï. Ibuayi aanï ixdukai ïgai ibuayi soiña iñïrhiditai sai buaboitudaiña ix makïdï ïmadï dakagi aanï ix ïr judidiukagi ix maiti ïr judidiukagi ïpï. Dïï gobai mai tïiya ïrhidi sai mai ïïgidiña aanï Diuxi sïïrhikamigadï. Kïïga ïïgidiña aanï ïïgiditai aanï Suxi Kristo.

22Ipïrhidi aanï ix bïïxi óídakami kïïga buaboitudagi Suxi Kristo tudu. Dai kaxkïdï xïxkadï ïmadï dakagi aanï odami ix makïdï daidarxikami aagai naana maaxi mai kabakatai buaboidaradï aanï ïmo mai kabakami buaboitudadami dukai oidakaiña ïpï maiti ibuadatai ixtumaxi daidarxikami aagai ïgai ïpï. Pobuayi aanï gaagaitai ix dukatai soiñagi sai kïïga buaboitudaiña ïgai Suxi Kristo. 23Bïïxi gobai ibuayi aanï ipïrhiditai sai aipakoga aïna go bhai ïrhiaragai aatagi. Dai pobuayi aanï biaka iñïrhiditai urabaragai mui buaboitudadami ïmadï ïpï buyitai aatïmï go bhai ïrhiaragai ix makïdï bia Diuxi gïr bïïtarï.

24Gin aaduñi, kïïga maatï aapimï sai xïïxkadï bopiagi odami ïmo mïrhikaruana muidutai bopoyiña dïï mosïkaxi ïmaduga ix makïdï gamaitïkïi. Gï agai tudu ix kabami gï aajagi ix makïdï gamaitï agadagi. Podukai tudu abïr óídaka aapimï. Kabami abïr gïn aaga ibuadatai ixtumaxi bhai ïrhidi Diuxi sai podukai buyiña aapimï go maitïki. 25Daiñi, kïï maatï aapimï sai xorai bui kïkiba agadagi jaa ïmo tïtïïbiïrï bia ix kabami aaduintuldagi tukugadï tomaxi soi taadakagi gobai. Pobuayi tïtïïbïdami tudu gamaitia ïrhiditai ixtumaxi tomaxi maitïkidï mai tïbïpi kabaka agai. Dïï aatïmï gïr maitïki ix makïdï gïr maakimu Diuxi gia bïïxkïrï bïïtarï kabaka agai.

26Ïmo gïdukami abïnakidaragai gobai gin bïïtarï tudu maatïkatai sai bïïxkïrï bïïtarï kabaka agai gin maitïkiga. Kaxkïdï kïï sïïrhi dukai oidaga aanï ibuadatai mosïkaxi ixtumaxi bhai ïrhidi Diuxi. Ïpïandukai oidaga aanï ïmo mïradami ix makïdï sïïrhi mïrhikarui kugadïamakoga mïraiña, mai kuga mïraitai dukai tudu. Dai ïpïan dukai ibuayi aanï ïmo kokoadami ïpï ix makïdï kïï sïïrhi surhigai kapixaradï dai mai xu ix mos aipako gakapixaiña ïgai ïbïltapi dukai. 27Kïïga aagidiña aanï jaa ix dukatai óídakana sai bhïna go maitïki. Dai kaxkïdï kabami aaduinturhiña aanï gin tukuga dai soimaaxi taatamiturhiña sai gin ïïgiada gobai. Tadu gïpiïrï gïi aanï maiti ibuadatai ixdukatai aagidiña aanï jaa dai ka mai bhïiyagi aanï go maitïki.

Currently Selected:

1 Korintios 9: NTP

Highlight

Compare

Copy