Kə̀fàʼ 26

Pôl dzày ìdzwə i we awò Àglipà

1Àglipà kə dzày tsə awò Pôl a we nə, “Mə nyiə̀ wô nə̀ bwòʼ kìy, dzày àyiə yiə yìy.” Pôl ə nìà fyi yə̀ àwo we, dzày tsə nə̀, 2“A mwê ìnaʼ Àglipà! Mə mə kəli iswaa yiy ani dzày ayiə yam â wò zii kwùmə̀ yə̀ nə̀ àyiə yə aghee Dzû yìy dzîy nia nəniy azoŋə̀ mìə̀. 3Mə kwu nə̀ wò kwu mà ŋwô ubyiə wə̀ aghee Dzû yìy kwu anə ayiə Kəzə̀ kwùmə̀ yə̀ nə̀ ndzòʼò bɛmə tə tə zəŋə nə̀ ghè dzàw doʼò. Kə̀lə̀ â wò, tòʼo tòŋə tsə tswuŋi kiy anə yiə yə mə dziy dzây. 4Aghee Dzû àdzə̀m kwu mà ŋwô ayiə yə mə kə muə nəniy ate anə nìsə̂. Ghu kwu soʼo nəniy ayiə yə mə kə muə ate anə bə̀d kə inaʼ kələ, nə̀ yiə yə mə kə muə tsə ate a Yèlusalèm. 5Aghû yə̀ kwu miə anə ndaŋ k-a-ghab. Ghu kwu sòʼò ŋwò nə̀ mə kə də̀ tsə̀ə wè Falàsî. Mə kə tòʼò nìy tsə ìyèmì ani na ulâŋ u Kəzə̀ anə yiə yə ghu nia soʼò nəniy. Bəə ghu də ani dzày àyiə àsoŋə̀ yìy â wò, ghu ki bɛmə nə̀ ayiə yə mə dzîy à də̀ ayiə àsoŋə̀ yìy. 6Ghu saʼa miə zii aŋwòə mə gaʼ na fòŋ anə tɛb kə Zə̀kìy kə tɛb na nəniy awò nə̀ tě nə̀ tě ə ŋgàŋ asəsə yiy. 7À yù də̀ iyiə ighè ìmòʼ naʼà tə Islàel tə̀ ìvən nə̀ nàʼà tìy ìbè kwu təŋ nəniy nə̀ tɛb kə ghè kə̀ kì bè dyòʼò kə̀soŋə̀ kìy. A mwê ìnaʼ, Àglipà, aghee Dzù yìy fə̀ kwi miə aŋwòə mə kwu imôʼ yə̀ Zə̀kìy kə tɛb na nəniy awò nə̀ tě ŋgàŋ asəsə yiy. 8À də̌ kìə̀ gha aghee Dzû ghà də wày ani bɛmə nə̀ Zə̀kìy zɛ̀mə̀ ŋwò dzwəŋə ŋwò aghû yìy anə ipfə ə? 9Miə nə̀ uwe nam wiy, mə kə mòʼo kə nə̀ mə də ani zəŋi tsə dzədlə tə̀dzə̀m tə̀ in byɛbi maʼà ìzəd i Yesù, wè inaʼi Nazalèt. 10À yù də̀ ayiə yə mə kə zəŋə tsə̂ nəniy a Yèlusalèm. Mə kə nìy kə kə̀daʼa awò ŋgəd tə aghè àlwaʼa tiy, mə zù kwi aghee Kəzə̀ zù fè na a ndàw ntsaʼ. Abu ghu wiy maʼà nəniy ghu, mə̀ bɛmə sòʼò nə̀ ghu pfə dzwàb ŋwò. 11Mə kə nyìə̀ tsə sòʼò ghu nə̀ mfə̀m mìy anə ndaw tə udzəŋə ani zəŋi tsə nə̀ ibɛmə i ghu yiy pfə ŋwô tsə azoŋə̀ Yesù. Ndzə̀m ndzə̀m fòŋ kə ŋge ŋə̀mə̀ ŋwò miə azoŋə̀ ghu. Iyiə i ghè yə̀ kə zəŋi miə mə zè dyaŋə anə nàʼà tə tətwùmə̀ ani zù kaw kwi bə̀ ghu.”

Pôl tyi dzày yə̀ yəə ù kə bɛmə Zə̀kìy ate

(Kə̀fàʼ 9.1-19; 22.6-16)

12“Mwe ìnaʼ Àglipà, a tsuk fə̀liy fiy, mə ŋwò yə̀ ani zù a Dàmaskòs, nə̀ Mə mə ŋwa daʼa kiy awò ŋgəd tə aghè àlwaʼa yiy. 13À kə də̌ nə̀ inyi yiy tyimə kwoʼo bə̀ tsitsi a mwê ìnaʼ, mə ə kòʼ tə̀kàʼì tə mwâ fyi tswi bə̂ an-a-vələ nə̀ tə mə mwà tsìy fyi yəə inyi yiy mwâ nəniy atə, tə mwà tswi tsə azoŋə̀ mìə̀, mwà yə̀ sòʼò azoŋə̀ àghù yə̀ mə kə də dzəŋi nə̀ ghu. 14Ghədlə adzə̀m ghè ə bvwə̀ tsə ambvə̀d. Mə dyaŋi zuw dzə̀ ìlìy ì dzəŋə bə̂ â mìə̀ anə idzə̀ŋi Hiblù nə̀, ‘A Sôl, a Sôl à də̌ kìə̀ wò fyimə kyabə tsə̂ nəniy miə yə? I zəŋə dzə̀ wày ùtwab wiy awò wò ani ŋwày nə̀ ìyiə yə mə liə nə̀ i doʼo. Wò ŋwunə ŋwò yəə mbòŋ ìvələ̀ yìy nì ŋwunə nəniy â Mwe ə̀ we.’ 15Mə bəb tsə nə̀, ‘Wô də̌ ndìə̀ a mwe?’ Mwe ə̀ Mbyi ə bə̀lì kə nə̀, ‘À də̀ miə Yesù, wù wə̀ wò fyimə kyabə tsə̂ nəniy we. 16Ŋwǒ kə nyiə̀ wò təmi kə idoŋ nə ìfwe yiy. Mə bû akə̀lə̀ wò ani zəŋi tsə nə̀ wò doʼò tsə wù kə̀fàʼ wam. Wò kwu ani dzày yə̀ awò aghù yìy, ayiə yə wò kôʼ mə zəŋi nəniy, nə̀ àyiə yə mə kî dê bə̂ â wò. 17Mə ki fìy fyiə ŋwò wô anə wo kə ghě Dzû, nə̀ anə wo kə ghù yə̀ à də wày aghee Dzû. 18Mə liə nə̀ wo fwiy kə asəə ghu tə̀ ghu fyi ŋwô bə̂ a təŋə kələm, ghu bû anə asə ə̀ zwe yiy, ghu kə kâm dòʼò dzə̀ ukwə̂d u Satàn wìy, ghu bû doʼò tsə tə̀ Zə̀kìy ki saʼa muə̀ tə ghu tiy. A ki bu ghu bɛmə kə nəniy awò mìə̀, Zə̀kìy ki nîyzə̂ àyiə ghu àbɛbə yiy, ù nìy na bə̀ sòʼò ghu anə fwumi kə ghě we yə ù sày na nəniy.’ ”

Pôl ə dzày yə̀ yəə ù fàʼà nəniy ate â Yesù

19A mwê ìnaʼ, Àglipà, à yù də ighe, mə kə də kə̀ ŋwuni nəway anə yiə yə Zə̀kìy kə də̂ fyi tswi bə̂ â mìə̀ an a-vələ. 20Mə kə̂ səsə kiy kaʼ tsə ani nàʼà ntwùm ə̀ i ghè yə̀ anə inaʼ i Dàmaskòs, mə ŋwò zù a Yèlusalèm, nə̀ a mbwòʼ ə̀ i Dzùdiyà ìdzə̀m, nə̀ awò àghù yə̀ ghu də way aghee Dzû yìy, mə nàʼà nə̀ ghu kwu ani kyèmì ŋwò fyi bə̀ anə bɛb tə ghu, tə̀ ghu bɛmə kə awò Zə̀kìy, ghu ki zəŋə yə ayiə yə a dê tsə nə ghu mə kwuni ŋwò kə anə ayiə ghu àbɛbə yiy. 21A yù də sələ kə iyiə kə aghee Dzû yìy kə kwi kə nəniy miə ate nə̀ mə də a ndàw Kə̀zə̀, ghu liə sòʼò ani wiy màʼà mìə̀. 22Zə̀kìy mə kwuni fày miə ani bù kwùm zìì, à də̀ ighe mə tiy fə, mə nàʼà ntwùm ə̀ Kə̀zə̀ awò àghè àsoŋə̀ yìy nə̀ awò ŋgwòə̀ mə̀ ghù mìy. Mə bvwami nàʼà yə̀ kə àyiə yə Musîs nə̀ àghě ntwùm ə̀ Kə̀zə̀ yìy kə dzây na nəniy. 23Ghu kə dzày na nə̀ wù wə̀ Zə̀kìy sûw kyili na nəniy nə̀ ù kwu ani fii tə̀ ù pfə, nə̀ ù ki də soʼo wù ù səsə wiy ani zɛ̀mə̀ anə ipfə, ù nì bù dè bə̀ asə ə̀ zwe yiy awò àghee Dzû yìy, nə̀ àghù yə̀ ghu də way aghě Dzû yìy soʼo. 24Â Pôl ani dzày mà àyiə ə we, Festùs ə bwoʼ fyi kə kəbôŋ idoŋ nə̀, “A Pôl, wò də̌ wù ùzə̀, ŋwàʼà kiə kə̀ wò ŋge zwiʼi kəli nəniy kə zəŋə wò nə̀ wò mwaʼì.” 25Pôl ə kwuni bə̀lì kə we nə, “A Festùs, wù ùsoŋə̀ wìy! Mə mwaʼì dzə̀ wày. Mə ndzəmə̀ dzìy bə̀ ayiə soŋə̀ yə̀ a kwu nəniy utwab wiy. 26Mə kwu ŋwô nə mwê ìnaʼ, Àglipà, kwu sòʼò ŋwô àyiə yə mə dzîy, à yù də ighe mə də nè way idzwə yiy ani dzày yə̀ â we, aŋwòə ayiə ghè yə̀ kə kə̀ fyi dzə̂ an-a-nù.” 27Pôl ə dyaŋi bəb tsə awò Àglipà a we nə̀, “A mwê ìnaʼ Àglipà, wò bɛmə ŋwô ayiə yə aghee twùmə̀ Kə̀zə̀ kə twâ na nəniy ə̀? Mə kwu nə̀ wò bɛmə ŋwô ayiə ghè yə̀.” 28Àglipà ə bəb yə̀ â Pôl a we nə, “Wò mòʼò nə̀ wò də ŋwô ani zəŋi tsə nə̀ mə bɛmə kə Kə̀litò, anə kə̀mə̀ fə fə soŋə ə̀?” 29Pôl ə bə̀lì kə a we nə, “Abu soŋə fiy təbə kə ŋwô moo fə də təbə way, Igwuŋì yam awò Zə̀kìy də nə̀ wô, nə̀ aghù yə̀ ghu zwulə nəniy ayiə yə mə dzîy nyiə̀, gha kway bɛmə kə zii â Yesù, ghà dòʼò tsə yəə à də̀ miə. Mə kwuni liə dzə̀ way nə̀ ghà doʼò soʼò àghě ndàw ntsaʼ anə yəə yə mə də.” 30Abù ù dzày tsə ghii, mwê ìnaʼ Àglipà, nə̀ mwe ə mbwoʼ Festùs, nə̀ Bènîs, nə̀ àghè liy yə ghu kə də dzəŋə nə̀ ghu, ghu ghè ŋwò kə idoŋ ani ŋwò. 31Â ghu ani ŋwò, ghu kwuni dzày tsə nə̀, “Wù wə̀ kamə byɛbi dzə̂ iyiə ìliy yiy yəə ghu nə wiy maʼà we, moo yə ghu nə fê na we a ndàw ntsaʼ.” 32Àglipà mee awò Festùs a we nə, “A mə̀ kwu ani nyəli màʼà wù wə̀ abu ù kə də kə̀ bwoʼ nəway wo kiy nə̀ Kaʼisà saʼ we.”

Currently Selected:

Kə̀fàʼ 26: isu

Highlight

Compare

Copy