Kə̀fàʼ 20

Pôl kə zù a Mèsèdonìyà nə̀ a Glǐs

1Utswə̂d wə̀ u kə fyi anə inaʼ i Efesùs, abù u tsîy ŋwò tsə nəniy, Pôl twoŋə dzəŋə na bə̀ àghù yə̀ ghu kə bɛmə Zə̀kìy, tswù yə̀ ghu nə̀ ghu təmi taw tsə anə ibɛmə i ghu, dyaŋi dzày nə̀ ghu doʼò kədzôŋ. U ŋwò zù a Mèsèdonìyà. 2Yəə ù zè nəniy a Mèsèdonìyà, u nàʼà tsìy yə̀ ntwùm ə̀ Kə̀zə̀, anə u bə̀d ùliy wiy a Mèsèdonìyà, u nyə̀ sòʼò ghu nə̀ ndə̀mə̀ ndə̀mə̀ tə itswù tìy, ŋwò zù dyaŋi a Glǐs. 3Pôl dòʼò tə̀ndzoŋə ìti a Glǐs. Yəə ù byay tsə nəniy uwe wiy ani nìy kə kəmfə̀n ù dàŋ fyi yə̀ a Silìyà, u kaw kəli fyi kə nə̀ aghee Dzû yìy khu tə̀dzələ ani wiy we. U ba kàm ŋwò zù dzwoŋi a Yèlusalèm nə̀ ù tsìy dzəd a Mèsèdonìyà. 4Pôl kə zù fwumi nə̀ Sòpatà, wa Pilùs wə̀ ù kə fyi nəniy a Bèliyà, nə̀ Àlistakùs nə̀ Sèkundùs ghu kə fyi nəniy a Tèsàlonikà. Gayòs wè Dèlbè kə zù sòʼò nə̀ we. Timotì nə̀ àghě mbwòʼ ə̀ Esìyà àbè, ghu kə twoŋə ghu nə̀ à də̌ Tàykikùs nə̀ Tòfimùs kə dzwùmì yə̀ sòʼò Pôl. 5Ghu zù ləmə yə̀ ghə̀d isəə anə inaʼ i Toyàs. 6Ghè nìy kə kəmfə̀n, ŋwò dàŋ fyi yə̀ a mbòʼò Filìpî nə̀ à tsìy tsə kə ntsukə fə inyi i bakə ghu də kə̀ kwe nəway mbùŋ ate. Anə ibàm i ntsukə ìntà, ghě kway yə̀ ghu a Toyàs, dzəŋi dòʼò nə̀ ghu awote anə məntsukə ìnsèmbe.

Pôl ə bwìy zù twoŋə zuw gwùŋì tsə aghê Kəzə̀ a Toyàs

7A ntsuk fə səsə fiy anə ivən, ghě dzəŋə dòʼò bə̀ loʼo kəmòʼ ani nyi kəba. Pôl ə dzə̀ŋì nə̀ ghu ghii zù kwùm yə̀ nə̀ fòŋ ə̀ ntsukə aŋwòə ù kə kwu ani bəd ŋwò tswutswu wə. 8Ndə̀mə̀ kàʼì tə mwi tiy kə də̀ ŋwô awote anə idzwə i ndaw idoŋ yə ghè kə dzəŋi doʼò nəniy ate. 9Wà fə̀ghàŋ ùŋəmə̀ ùlìy wìy ghu kə twoŋə we nə̀ à də̀ Yùtikùs, ù kə də̀ anə kàʼ ə̀ ndaw. Abù Pôl tsə̀ŋə̀ dzìy yə̂ kə ayiə yiy, mbwuni tiy kwi ŋwò yə̀ Yùtikùs, abù mbwuni tiy nîy ŋwò này yə̂ nəniy we, u ŋwò này fyi tswi bə̀ idoŋ anə idzwə i ndaw yə̀ ghu kə də nəniy ate,#20.9 Ndàw ì ghè yə̀ kə də̌ ndàw ì kwoʼò dyaŋə yìy, à kə də̀ adzwə ti ani kwoʼ kwùm tsə anə idzwə yə ghu kə də nəniy ate. tswi bvə̀ tsə ambvə̀dintsə. Ghu tswi bə̀ ani bù bòʼò ŋwò kə we nə̀ ù mə pfə. 10Pôl ə tswi fyi yə̀ awo, zù bvə̀ nə̀ŋì kwoʼ yə̀ azoŋə̀ Yùtikùs, myaŋi kəli tsə we anə kə̀mə̀ fə sòŋə. Ù mee a ghu nə, “Ghà kə isə yiy na dzə̀, ù kamə kə̀ pfə dzə̂!” 11Abù Pôl dzwoŋi zû anə idzwə i ndaw yə ghu kə də nəniy ate, u nìy kə, kəba, byiʼi tsə, nyi fwumi nə̀ aghù yə̀ ghu bɛmə Zə̀kìy. Pôl dzày bwuni yə̀ ayiə ghi utsuk wiy zwu nyi bə̀. Yəə u tsuk wiy zwu nyi bə̂, Pôl dyaŋi ŋwò tsə a Toyàs. 12Ghu nìy zù nə̀ Yùtikùs a ndaw we nə̀ ù də̌ ù taw wìy. Ghu kwu sòʼò kə dwiʼi anə tə fòŋ.

Pôl ə ŋwò tsə a Toyàs zù a Mìletùs

13Pôl kə zəŋi kə fòŋə̀ we ani bwìy zù anə inaʼi Asòs. Ghè ə kwuni nìy kə kəmfə̀n, ŋwò yə̀ isəə anə lòʼo kə ghè kə kwu nəniy ani zù nìy we ate anə yiə ù kə dzây na nəniy â ghə̀d aŋwòə ù kə kwuni bwìy anə awù. 14Abù Pôl kway bə̂ nəniy ghə̀d a Asòs, ghě kwe kə we anə kəmfə̀n ŋwò zù a Mìtìlîn. 15Ghè ə ŋwò tsə an-a-mfə̀n a Mìtìlîn zù a Kiyòs. Abù tswutswu wə̀, ghè zù kwùm tsə a Samòs. Tsuk fiy tsìy fəli tsə, ghè ə bù kwùm tsə a Mìletùs. 16Pôl ə kòʼ tsə nə̀ idzwabə̀ ŋwò awò ìghe ani nìy kə kəmfə̀n tə̀ ghe tsîy yə̂ dzəd a Efesùs aŋwòə ù kə liə dzə̀ way nə̀ ghè fə̀d ìkwe a mbwòʼ ə̀ Esìyà. Ù liə ani zə̀àŋì zù kwùm tsə a Yèlusalèm anə Inyi i ntsuk fə Zwàykə̀zwekiy kə fyi tswi bə̀ ate.

Pôl ə dzày yə̀ â ŋgəd tə dzəŋə k-a-zə̀ a Efesùs nə̀ ghu doʼò kədzôŋ

17Yəə Pôl də nəniy a Mìletùs, u twum tsə wù lìy wìy, nə̀ ù zù twoŋə nyiə̀ bə̀ we nə̀ ŋgəd t-a-dzəŋə kə ndàw Kə̀zə̀ a Efesùs, ghu bû kway bə̂ we. 18Abù ghu bû nəniy, Pôl ə dzày tsə a ghu nə, “Ghà kwu ŋwô ayiə yə àdzə̀m mə kə̀ zəŋi, kwu sòʼo ndzòʼò ìmùə̀ yə̀ mə kə muə nəniy ntsuk indzə̀m ani kaʼ ŋwò bə̀ anə tsuk fə səsə fə mə kə bû nəniy fə a mbwòʼ ə̀ Esìyà. 19Mə kə fàʼ fàʼ kə Mwe ə̀ mbyi nə̀ mə bvamə tsə ùwee, nə̀ nsə miy an-a-tuw. Mə maa ŋge kwù fòŋ anə ntswə̀d mə̀ aghee Dzû kə kaw nəniy azoŋə̀ mìə̀. 20Ghà kwu ŋwô nə̀ mə kə kə̀ nasə dzə̂ iyiə ìliy yiy i kə də ani fày ghà anə sòŋə fə mə kə niʼà nəniy ntwùm ə̀ Kə̀zə̀, tyi dè sòʼò ghà nə̀ àyiə an-a-ne nə̀ a ndaw təli. 21Mə dzày sòʼò awò àghè ə Dzû nə̀ àghù yə̀ ghu kə̀ də wày aghee Dzû nə̀ ghu kyèmì ŋwô kə anə ayiə ghu àbɛbə yiy, ghu bû â Zə̀kìy, ghu kəli soʼò ibɛmə â Mwe ə̀ mbyi ə̀ ŋgàŋ, Yesù Kə̀litò. 22Nyiə, mə bôʼ kwu dzə̀ way fyiə kə kə kî fyiə nə̀ mìə̀ a Yèlusalèm. Mə kwu kə ani zuw yə̀ â Zwàykə̀zwekiy. 23Zwàykə̀zwekiy mə dzày â mìə̀ nə̀ ghu kî kwe miə a ndàw ntsaʼ, mə kôʼ soʼò ùtswə̀d anə nàʼà tə̀dzə̀m mə kî zê nəniy awote a Yèlusalèm. 24Mə kwuni nia dzə̀ wày isə yiy anə ayiə yə a kî fyiə nə̀ miə, a ki buu mə də dzə ani mày fàʼ kə̀ Mwe ə̀ mbyi Yesù kə nyiə̀ naa nəniy â mìə̀ nə̀ mə fâʼ. Fàʼ kə ghà kə̀ də̀ â mìə̀ ani nàʼà ntwùm ì dzòŋə̀ yə̀ kwùmə̀ yə̀ nə̀ fòŋ ìdzòŋə̀ yə̀ Zə̀kìy dê nəniy awò àghù yìy.

25Mə mə bwìy zù anə ndə̀mə̀ tə̀lòʼo, nàʼà yə̀ ntwùm ə̀ Kə̀zə̀ â ghà kwùmə̀ yə̀ nə̀ àyiə yə Zə̀kìy saʼa nəniy aghe we yiy ate. Mə kwu nyiə, nə̀ wù lìy wày dzə anə uzə ghii ù nì kàmə̀ kòʼò fwulə miə. 26Mə fə̂ dzìy bə̀ â ghà zii nə̀ abu wù lìy pfə nəniy anə uzə ghii nə̀ ù kamə kə̀ bɛmə nəway â Zə̀kìy, wo kam kiy way ate 27aŋwòə Mə mə dzày mà ayiə yə àdzə̀m Zə̀kìy byay na nəniy. 28Ghà si yemə tsə anə iwè nəli nə̀ azoŋə̀ àghù yə̀ Zwàykə̀zwekiy nyiə̀ naa â ghà nə̀ ghà yemì ate.Ghà kwu ani yèmì tsə anə dzəŋə kə aghee Kəzə̀ yəə à də nə̀ nə̀ àbàʼàtə̀ndzù nə̀ yemə̀ nəniy anə təndzù. Zə̀kìy kə zwe ghu anə kàŋ tə Wà we. 29Mə kwu ŋwô nə̀ a ki buu mə ŋwô yə̂ nəniy, aghê àliy yiy kî bè yəə à də̌ ùnyàkhìy anə uzə u təndzù ani bù kwi ghà. Ghu kî kwi ŋwô gha àliy. 30Aghû ghii aliy yiy ki bû nə̀ ì guw yiy ani kwi ŋwò fòŋ tə ghù yə̀ ghu dzwumə̀ nəniy Mwe ə̀ mbyi. 31Ghà yɛmì! Mòʼo tsə nənà ayiə yə mə kə tsəŋə̀ tswû gha ate nə̀ ntsukə tiy nə̀ ntsə̀ tìy anə ŋə̀mə̀ tə̀ ìti mə doʼò fyi nəniy nə̀ ghà, nə̀ nsə miy an-a-tuw.

32Mə kwe nia yə̀ ghà nyiə anə wo k-a-zə̀, tə̀ ù kyìŋì ghà. Ghà si moʼo yə ntwumə̀ fòŋ ə̀ Kə̀zə̀ ì dzòŋə̀ yə̀! Ntwum yə̀ də̀ ani fày ghà, kwu sòʼò kə daʼa ani zəŋi tsə nə̀ ghà si taw dzwabə, ì də̀ sòʼò ani nyə̀ ghà nə̀ lwì kə̀ Zə̀kìy kwu nəniy awò àghè ə we àdzə̀m. 33Mə kamə kə̀ kəli kôʼ dzəə fòŋ ani nìy ukhiy u wû lìy nə̀ à wày u wam wiy, moo ndzwu tə wû lìy. 34Ghà kwu ŋwô nə̀ mə kə fàʼà nə̀ àwo yamə ani kəli ufyiə wə mə kə liə nə̀ ùfyiə wə afwu yamə kə kwu ani kəli. 35Anə ayiə yə àdzə̀m mə kə zəŋi, mə kə dè bə̀ dzəd yə ghà kwu ani fàʼ ate ani fày àghù yə̀ ghu dzaŋə̀ nəniy. Ghà si myiŋə tsə ayiə yə Mwe ə̀ Mbyi Yesù kə dzay nəniy nə̀, ‘Wù kyilə ndə̀mə̀ ùlwì abu ù nyìə̀ nəniy tsìy fyi abu ù nìy nəniy.’ ”

36Abù ù dzày tsə ayiə yə, u nyaʼa tswi tsə nə̀ ghu adzə̀m, gwùŋì tsə. 37Ghu dìy àdzə̀m a sòŋə fə ghu kə myaŋi kəli we, dzìy yə̀ sòʼò a we nə̀ ù bwìy kədzôŋ. 38Ghu kə ŋge mwe aŋwòə Pôl kə dzày tsə nə̀ ghu nî kàm kòʼ kòʼ fwuli way we. Ghu dyaŋi zù nə̀ Pôl akə̀lə̀ kəmfə̀n.

Currently Selected:

Kə̀fàʼ 20: isu

Highlight

Compare

Copy