Kə̀fàʼ 12

Helòd ə kaw bə̀ àghě ndàw Kə̀zə̀ nə̀ ùtswə̀d wìy

1Anə sòŋə fə Helòd kə də nəniy dòŋ kìy anə inaʼ i Palìstân, u kaʼ tsə ani kaw utswə̂d nə̀ àghě ndàw Kə̀zə̀ yìy. 2U tsày tsə kəlâŋ nə̀ sǔgôʼ tə we tiy zû wiy Dzɛ̂m anə kwaab, Dzɛ̂m wə̀ ù kə də nəniy azə̀ ə̀ Dzwan. 3Yəə Helòd kə kôʼ tsə nəniy nə̀ ayiə yə ghe zəŋi nəniy a dzwâbə̀ ŋwò anə fòŋ tə ghě Dzû, u dzày nə̀ ghu kwi soʼò Pità. Ghu kwi kə Pità anə sòŋə fə inyi fə ghu kə nyiə nəniy bakə ghu də kə̀ kwe nəway mbùŋ ate. 4Abù ghu kwi kə nəniy Pità, ghu nìy zù fè na yə̀ we a ndàw ntsaʼ. Sǔgôʼ tìy bè kyìŋə̀ we soŋə inkyàʼì nə̀ ghu bê àkyaʼi akyàʼì. Helòd kə liə nə̀ abu ghu nyi mâ kə inyi i ŋkàmə̀tâzaʼà mìy, ghe ki nîy fyi bə̂ Pità anə kəne tə̀ ghu saʼ wiy we. 5Anə yiə yə Pità kə də nəniy a ndàw ntsaʼ, aghê ndàw Kə̀zə̀ ə tsə̀ŋ kwu kə ani gwùŋì awò Zə̀kìy anə tuw kə we.

Tsə̀ndii bù nìy ŋwò fyi Pità a ndàw ntsaʼ

6Ani bwuni zwu bə̀ anə tsuk fə Helòd kə kwu nəniy ani nìy fyi bə̀ Pità ate ghu sàʼ wiy maʼà we, nə̀ ntsukə tə ghè tə̀, ghu kə kwù tsə Pità anə təntsaʼ ibè, ghu nə̀ŋì na tsə we a mbvə̀dintsə anə uzə u tə sǔgôʼ ibè, sǔgôʼ tə̀li tiy təmi dòʼò ìbè anə ufə̀b u mbà u ndàw ntsaʼ. 7Tsə̀ndii ə Mwe ə̀ mbyi bù fyi kə awote. Kaʼì tìy mwày nyi yə̀ awote a ndàw ntsaʼ. Tsə̀ndii yə sə̀kì tsə Pità anə iwam, dyaŋi dzày tsə we nə̀, “Zə̀àŋi ŋwǒ kə idoŋ!” Ntsaʼ tə dyaŋi zè tswaʼi ŋwò tsə anə ikwe i Pità. 8Tsə̀ndii Mwe ə̀ mbyi yə̀ dzày tsə â Pità nə̀, “Fad kə kwə̂ fyiə̀ fìy wò dzəŋì kə gûw tiə̀ tìy.” Pità ə bvwami fàʼ sòʼò ighəd yəə tsə̀ndii yə̀ dzày. Tsə̀ndii yə̀ kàm dzày tsə awe nə̀, “Dzə̀ŋi kə sàŋ yiə̀ wò dzwùmì fyi bə̂ mìə̀.” 9Pità ə ŋwò tsə a ndàw ntsaʼ, dzwùmì fyi yə̀ tsə̀ndii yə abee. Pità kə ba kwu dzə̀ way nə̀ ayiə yə a fyiə nəniy àdzə̀m də̀ ayiə̀ àsoŋə̀ yìy. U kwuni mòʼò kə nə̀ Zə̀kìy dê we nə̀ àyiə yiy anə udzɛ̀mə̀. 10Ghu tsìy ŋwò fyi yə̀ loʼo kə səsə kə sǔgôʼ tə kə kyiŋə we ate a ndàw ntsaʼ, bù tsìy kə sòʼò tə̀liy tə. Yəə ghu bû kwùm tsə nəniy anə ufə̀b u mbà wə̀ ghu kə zəŋi na nəniy anə ufyiə ùtsəə wiy, ufə̂b u mbà u ghè wə̀ ə màŋ fwi fyi yə̀ nə̀ noŋə̀ ù ghe wiy, ghu tsìy fyi ŋwò yə̀. Abù ghu sî tswi yə̂ nəniy anə dzəd, tsə̀ndii wə saŋ ŋwò tsə.

11Pità ə bù kəli fyi kə ayiə yə a kə fyi nəniy. U dzày tsə nə̀, “Ìsoŋə̀ yìy, Mə mə kəli nyiə nə̀ Mwe ə̀ mbyi mə twum bə̀ ə tsə̀ndii ə we nə̀ ì bù bii fyi miə anə wo kə Helòd nə̀ anə ayiə yə àdzə̀m aghê Dzû yìy kə môʼ na nəniy ani zəŋi nə̀ mìə̀.”

12Abù Pità bù kəli fyi kə ayiə yə̀ fyiə nəniy, u ŋwò zù a ndàw Mə̀li wə ù kə də nəniy zə̂ Dzwan. Izəd i we ìliy yiy kə də̀ nəniy nə̀ à də̌ Mâk. A də̌ ghi nə̀ aghee Kəzə̀ yìy mə dzəŋə dòʼò a ndàw ì ghè yə̀ ghu gwùŋə̀ nəniy. 13Pità ə zù bwoʼ nyi yə̀ ùfə̀b ubà u ghè wə̀, wè kə̀fàʼ ùyəŋi ùlìy wìy izəd yiy kə twoŋə nə̀ à də̌ Lodà, u bù bəb tsə nə̀ à də̌ ndiə, Pità ə bə̀lì kə nə̀ à də̀ ighe. 14Abù wìyəŋi wə̀ zuw kəli tsə nəniy dzə̀ Pità, u ŋge dwiʼi. U nyəŋ nyi dzwoŋi yə̀ a ndaw, nə̀ ù kə̀ fwiy nəway bâʼ kìy anə ufə̀b u mbà, zù nàʼà yə̀ awò aghù yìy nə̀ Pità təmi dòʼò fə̀ abee anə ufə̀b u mbà. 15Aghû yə̀ mee a we nə “Wò mwàʼì ŋwò.” U kwuni tsə̀ŋ kwu kə ani dzày aghu nə ghe ndzəmə̀ dzìy ŋwò. Aghû yə̀ dzày yə̀ a we nə̀, “À də̌ tsə̀ndii ə we.”

16Pità ə tsə̀ŋ kwu kə ani bwoʼ kəbâʼ, ghu bù fwiy màʼà tsə kəbâʼ kòʼ tsə Pità, adzwə ŋge zwum ghu ate. 17Pità ə dzày tsə nə̀ ghu doʼò moŋ nə̀ ù fwòʼ kwoʼ kə wà kəwo anə idzwə i we. U tyi dzày yə̀ ayiə yə â ghu yə tsə̀ndii ə̀ Mwe ə̀ mbyi nîy ŋwò fyi bə̂ nəniy we ate a ndàw ntsaʼ. U mee a ghu nə, “Ghà nîy kə ayiə yə ghà zû dzây yə̂ â Dzɛ̂m nə̀ aghee Kəzə̀ àliy yə.” Ŋwò zù i we yiy anə lòʼo kə̀ ŋwô kìy.

18Nə̀ bələ̀bə̀lə̀ tìy, aghû yə̀ ghu kə kyiŋə̀ nəniy ndàw ntsaʼ yə ghu kə fê na nəniy Pità ate, Fôŋ tìy fyimi ghu. Ghu ba mòʼò kè ìyiə yə i kə fyi nəniy nə̀ Pità. 19Helòd ə tsày tsə kəlâŋ â sǔgôʼ tə we tiy nə̀ ghu kaw bû nə̀ Pità. Ghu kaw, kə̀ kwuni kôʼ nəway we. U nìy bə̀ aghè kyiŋə yə, bəb ghu nə̀ àyiə yiy, tsày tsə kəlâŋ a ghu nə̀ ghu wiy màʼà ghu.

Helòd ə ŋwò fyi yə̀ inyi ghè yə̀ a mbwòʼ ə̀ Dzùdiyà zù dzə̀ dòʼò koŋə yə̀ ntsukə a Kàsalìyà.

Helòd ə pfə

20Fòŋ kə ŋge ŋə̀mə̀ Helòd azoŋə̀ aghě Taylè nə̀ àghě Sidòn yìy, Aghee Taylè nə̀ àghě Sidòn yìy kə zù ani zù kòʼ Helòd. Ghu zəŋi tsə Blàstùs, wè kə̀fàʼ ə Helòd nə̀ ù twàm bə̀ ghu ani fày kə ghu tə̀ ghu tsìy nyi bwoʼ tsə Helòd nə̀ wo kiy tə̀ ù dòʼò tsə anə ibvay nə̀ inaʼ i ghu yiy, aŋwòə mfànyiə mə̀ ghu miy kə bè tsə̀ anə inaʼ i Helòd.

21Ghu byay na tsə tsuk fə ghu kî kàmə̀ kpe nəniy ate. Yəə tsuk fə ghè fə̀ kpe tsə nəniy, Helòd ə dzə̀ŋì tsə sàŋə̀ kə̀dòŋ ə̀ we, dòʼò tswi tsə anə kwe k-a-dòŋ kə we, dzày tsə ayiə. 22Aghû yə̀ bwoʼ fyi kə məmbòŋ idoŋ nə̀, “Wò wə̀ ù dzə̀ŋə̀ nəniy ù də̀ fəzə̌, ù wày dzə wù.” 23Tsə̀ndii ə Mwe ə̀ mbyi dyaŋi tswàb Helòd, u bvə̀ bə̀ ambvə̀dintsə, aŋwòə ù kə nyiə̀ dzə̀ wày ŋkwiʼi miy â Zə̀kìy. Ùghàŋəghaŋ wiy kwam kə ndzǔ tə we ghii u pfə tsə.

24Loʼo tə aghû yə̀ ghu kə bɛmə â Zə̀kìy, ghu tsəŋə̀ niʼà yə̀ kə ntwùm ə̀ Kə̀zə̀ anə lòʼo tə ghu kə zê ate. Ndə̀mə̀ àghù ə zuw ntwùm ə̀ Kə̀zə̀, bɛmə sòʼò awò Zə̀kìy.

25Abù Bànabàs nə̀ Sôl fàʼ mà tsə nəniy ayiə yə ghu kə kwu nəniy ani fàʼ, ghu nìy kə Dzwan izəd i we ìliy yiy kə də nə̀ à də̀ Mâk dzwoŋi bù nə̀ ghu a Yèlusalèm.

Currently Selected:

Kə̀fàʼ 12: isu

Highlight

Compare

Copy