Kə̀fàʼ 10

Pità ə zù kòʼ Kònilìyùs

1Wè lìy kə muə tsə̀ a Kàsalìyà, ghu twoŋə izəd i we nə̀ à də̀ Kònilìyùs, u də kədòŋ anə bwàm fə̀ təsǔgôʼ tə Lûm, ghu kə twoŋə tsə̂ nəniy dzəŋə kə təsǔgôʼ kə ghè kə̀ nə̀ à də̌ “Aghee ulàŋ a Italì”. 2Ù kə də̀ wù wə̀ ù kə zəŋə nəniy ayiə Kəzə̀ yìy. U niamə tsə̀ àghè Dzû nə̀ ufyiə wiy ghu kə də kwu way fyiə kəli kiy, anə fòŋə̀ we ìdzòŋə̀ yìy. U taw gwùŋə̀ tsə̀ fwùlə̀ tsə̀ sòʼò Kə̀zə̀ nə̀ àghû yə̀ àdzə̀m ghu kə muə nə̀ we a ndaw. 3Tsuk ùliy, nə̀ fwa tə iwùŋ ìti nyiə̀ kpe kwoʼo myà bə̀ ŋwò nə̀ ntsə̀ tìy, Zə̀kìy kə dè bə̀ we nə̀ ayiə yiy, u kòʼ yə̀ tsə̀ndii ə̀ Kə̀zə̀ tsìy nyi bə̂ nəniy a ndaw ŋgbaŋ, twoŋə tsə we anə izəd nə̀, “A Kònilìyùs!” 4Kònilìyùs ə lia we ghi nə̀ ù kwu itsəŋə anə fòŋ, u bəb yə̀ â tsə̀ndii yə a we nə, “À də̀ kiə̀ Mwe?” Tsə̀ndii yə bə̀lì kə a we nə̀. “Zə̀kìy mə zuw igwùŋì yiə̀ yìy, kòʼ sòʼò àyiə àdzoŋə̀ yə̀ wò zəŋə nəniy azoŋə̀ àghè la yiy. Ù mə byay na uwe wiy ani bə̀lì kə igwùŋì yiə̀. 5Twum zù aghê liy nyiə anə inàʼ i Dzopà ghu zû twoŋə nyiə̀ bə̂ wù wə̀ ghu twoŋə nəniy nə̀ à də̀ Simùn Pità. 6U mùə̀ fwumi a ndaw nə Simùn. Wù wə̀ ù zwùbə̀ ùfyiə wiy anə gùw tə tə nyàm. U mùə̀ akə̀lə̀ ìŋgwùŋə i dzwì ìnè yìy.” 7Anə yiə yə tsə̀ndii ə̀ Kə̀zə̀ yə̀ ŋwò yə̂ nəniy, Kònilìyùs ə dyaŋi twoŋə tsə aghê kəfàʼ ə we àbè, nìy gbaʼa tsə sǔgôʼ wə̀ ù zəŋə nəniy ayiə Kəzə̀ yìy fàʼà təŋə tsə̀ nə̀ we. 8U nìy kə ayiə yə a kə fyi nəniy àdzə̀m dzày yə̀ â ghu, twum zù ghu a Dzopà. 9Tswu tswu wə̀, yiə ghu zè myâ nəniy a Dzopà, Pità ə kwoʼ kə anə tuw kə ndaw#10.9 Ghu kə biə nia tsə̀ ndaw tə ghu anə yiə yə wù də ani kwoʼ dòʼò tsə awote. Ghu kə kwe tsə̀ dzə̀ wày aka yiy anə ndaw tə ghu. nə̀ fòŋə̀ ntsə̀ tìy ani zù gwùŋì. 10Dzoŋ ə zab bə̀ we, u liə nə̀ ghe mə nyi yə̂ kə̀fyiə, a də̀ ghi nə̀ ghu namə kwè ŋwò. Yəə ù sì də lyimə ùfànyiə, Zə̀kìy dè bè we nə̀ àyiə yiy, 11u kòʼ Vələ kiy fwiy tsə nəniy, mbàʼà k-a-fyiə kə̀liy kiy fyi tswi bə̂ awote yiə a də̀ ukwe undzwu. A də̀ yiə aghê kyàʼì kwiy kəli ŋwô anə təbwè, tswi zìy dòʼò tsə a mbvə̀dintsə. 12Lelê tə tə nyàm tìy ə də̌ ate anə ukwe u ndzwu ughà wə̀. Nyâm tə ifwe ikyàʼì nə̀ nyàm tə̀ tə bwîy nəniy nə̀ nìə̀ mìy ə də̌ ate nə̀ ŋwùni. 13Pità ə zuw dzə̀ ìlìy yìy dzîy nəniy a we nə, “A Pità ŋwǒ kə idoŋ, wò kwi wiy fwu nyâm tə̀.” 14Pità ə kwuni dzày tsə nə, “A Mwe ə̀ mbyi, mə way ani zəŋi dzə̀ ndzòʼò àyiə yiy, mə kamə kə̀ nyi kôʼ dzə̂ fyiə kə̀ dzəə kə̀liy kiy anə yiə yə lâŋ kə Dzû kìy dzîy.” 15Dzə̀ ìghè yə̀ ə kwuni dzày fwuli yə̀ â Pità a we nə, “Kə̀ dzày dzə̀ nə̀ fyiə kə̀ nyiə̀ kə̀li liy kiy dzəə ŋwò, abu Zə̀kìy kwuni dzày na nə̀ kə zwe ŋwò. 16Zə̀kìy dzày fwuli bə̀ ayiə ghè yə̀ â we ani zəŋi yə̀ nsòŋə inti. Ukwe u ndzwu ughè wə̀ ə ŋwò kwoʼ dzwoŋi kə an-a-byiwuŋ. 17Yəə Pità mòʼò nə̀ ayiə yə̀ ba myìŋə̀ nə̀ indiə? Aghû yə̀ Kònilìyùs kə twum yə̂ nəniy, ghu zù kwùm tsə akə̀lə̀ ndàw Simùn, ghu təmi dòʼò yə̀ akə̀lə̀ ufə̀b u mbà. 18Ghu bəb nyi yə̂ nə̀ wù lìy də̀ ŋwò fə ghu twoŋə nəniy nə̀ à də̀ Simùn Pità ə̀?” 19Yəə Pità namə tsəŋə̀ mòʼò kə nə̀ ayiə yə̀ myìŋə̀ nə̀ indiə? Zwàykə̀zwekiy dzày tsə a we nə, “Zwuli! Aghê àti mə bù fə, ghu khu wò. 20Ŋwòə kə idoŋ a Pità wò byay tsə uwe, wò ŋwô tswi kway yə̂ ghu, wò zû fwumi nə̀ ghu. Kə̀ fə̂d dzə̀ ikwe yiy, aŋwòə à twum bə̀ mìə̀ ghu.” 21Pità ə fyi tswi yə̀ dzày tsə aghu nə̀, “Wù wə̀ gha khu nəniy à də̀ miə. Ghà fə bù kìə̀?” 22Ghu ə bə̀lì kə a we nə, “À ghə̀d fə twum bə̀ dòŋ kə təsǔgôʼ kə̀ ghu twoŋə nəniy nə à də̌ Kònilìyùs. Ù də̌ wù wə̀ ù zəŋə nəniy ayiə yə a də nəniy tsitsi, fwùlə̀ sòʼò Kə̀zə̀. Aghê Dzû yìy ŋge nyiə̀ sòʼò we nə̀ ŋkwiʼi miy. Tsə̀ndii Kə̀zə̀ mə dzày sòʼò a we nə, u nàm tsə wô a ndàw we tə̀ ù mboŋ zuw sòʼò àyiə yə wò kwu nəniy ani dzày.” 23Pità dzày yə̀ nə̀ ghu bû bwuni tsə nə̀ ìghe awote a tsuk fə ghè fə̀. Tswutswu wə, Pità ə ŋwò yə̀ nə̀ àghù yə̀ Kònilìyùs kə twum nəniy ghu. Ghu kə zù dzəŋi nə̀ àghè liy yiy ghu kə bɛmə nəniy Zə̀kìy ghu kə ŋwô bə̂ nəniy a Dzopà. 24Tswutswu wə, ghu zù kwùm tsə a Kàsalìyà anə lòʼò kə Kònilìyùs kə lyimə nəniy ghu ate nə̀ tɛ̀mə̀ tə we tiy nə̀ àfələ we yiy ù kə nâm bə̀. 25Yəə Pita bù kwùm tsə nəniy, Kònilìyùs ə kway yə̀ we, u nyaʼa tswi tsə a təŋə Pità kaʼ ani fwùlì we. 26Pità ə kwuni dzày yə̀ a we nə, “Təmi kə idoŋ, mə də sòʼo wù yəə à də̀ wô.” 27Yəə Pità namə dzəŋə̀ yə̂ nə̀ Kònilìyùs, u tsìy nyi yə̀ a ndaw, kòʼ yə̀ ndə̀mə̀ àghù ghu də nəniy awote a ndaw. 28U dzày yə̀ a ghu nə̀, “Gha ndzə̀m kwu dzwàb ŋwǒ nə̀ biə kəli kiy twe ŋwò nə̀ wè Dzû kə zû dzə̀ a ndàw wù wə̀ ù də wày dzə wè Dzû. Moo ani zəŋi iyiə ìliy yiy nə̀ wù wə̀ ù də wày wè Dzû. Zə̀kìy mə kwuni zəŋi nə̀ mə kə̀ kòʼ dzə̀ wè lìy nə̀ ù dzəə ŋwò anə sə k-a-zə̀, moo ù kə̀ kpe dzə̂ anə sə k-a-zə̀ ani təm fwumi nə̀ ghə̀d. 29À yù də̀ ighe yəə wò kə twoŋə nəniy miə, mə tàʼà kə̀ twe nəway ani bù. Wò mìə̀ twoŋə anə iyîkìə̀?” 30Kònilìyùs ə bə̀lì kə a we nə, “À nyiə̀ də̌ ntsukə ìn kyàʼì, yə mə gwùŋə̀ nəniy a ndaw yam anə fwa tə iwùŋ ìti, mə fə̀mì kə wù lìy ù təmi doʼò nəniy anə sə kam nə̀ ndzwu tə̀ mwaa tiy anə uwè 31U dzày bə̀ â mìə̀ nə̀, ‘A Kònilìyùs, Zə̀kìy mə zuw igwùŋì yiə̀ yìy, kòʼ sòʼò àyiə àdzoŋə̀ yə̀ wò zəŋə nəniy nə̀ àghè la yiy. 32Twum yə̀ aghê lìy a Dzopà, ghu zù twoŋə bə̀ wù wə̀ izəd yiy də nə̀ à də̌ Simùn Pità. Ù bwìy zù nəniy a ndàw Simùn, wù wə̀ ù zwùbə̀ ùfyiə wiy anə gùw tə tə nyàm, ù muə nəniy akə̀lə̀ dzwì ìnè yìy.’ 33Ayu də̀ ighe mə dyaŋi twum tsə nəniy aghê nə̀ ghu twoŋə nyiə̀ tsə wô â mìə̀. I dzwâbə̀ ŋwò yəə wò bù nəniy fə. Ŋgà də nyiə fəə nə̀ Zə̀kìy, ani zuw àyiə yə àdzə̀m Mwe ə̀ mbyi dzây nəniy nə̀ wò dzày â ghə̀d.”

Pità ə nàʼà ntwùm ìdzòŋə̀ yìy â Kònilìyùs

34Pità ə dzày tsə nə̀, “Mə mə ndzə̀m kəli nyiə nə̀ Zə̀kìy koʼò ŋgwòʼò dzə̀ way wù lìy kwuni kòʼò kè wù lìy. 35Fòŋə̀ Kə̀zə̀ dzwàbə̀ ŋwò nə̀ àghù yə̀ àdzə̀m anə nàʼà tə̀dzə̀m ghu tsəŋə nəniy we, zəŋə sòʼò àyiə yə a də nəniy tsitsi. 36Ntwùmə̀ ìdzòŋə̀ yə̀ Zə̀kìy kə nyiə̀ awò àghè Islàel yìy də̀ nə̀ aghee dzə̀mə̀ də ŋwô ani kəli ibvay abidzɛ̀mə̀ Yesù wə̀ ù də nəniy Mwe anə ufyiə udzə̀m. 37Ghà kwu ŋwô àyiə yə a kə fyi nəniy a mbwòʼ ə̀ Dzùdiyà idzə̀m nə̀ a kaʼ bə̀ a Galìlî anə yiə yə Dzwan kə naʼa mâ tsə nəniy twùmə̀ i nîy mwi m-à-zə̀ mìy. 38Ghà kwu ŋwô àyiə kwùmə̀ yə̀ nə̀ Yesù wə̀ ù fyi nəniy a Nazalèt. Kwu sòʼo yəə Zə̀kìy kə nyiə̂ nəniy we nə̀ Zwàykə̀zwekiy nə̀ daʼa kiy. Ù bwìy tsìy yə̀ anə lòʼo tədzə̀m, zəŋə àyiə dzoŋə̀ yìy. U zəŋi taw kə aghû yə̀ àmbvə̂ntsə kə kwu daʼa kiy azoŋə̀ ghu. Ù kə àyiə yə̀ ghî zəŋi aŋwòə Zə̀kìy kə də̌ nə̀ we. 39Ghəd adzə̀m maa kòʼ ayiə yə Yesù kə zəŋi nəniy anə mbwòʼ ə̀ Dzùdiyà nə̀ anə inaʼ Yèlusalèm. Ghu wiy màʼà we nə̀ ghu ba anə kàʼ fə təzəd. 40Zə̀kìy kwuni zɛ̀m dzwoŋi bə̀ we anə ipfə anə ibàm i ntsukə inti, u zəŋi tsə nə̀ aghê kôʼ we. 41Aghê dzə̀m kə kə̀ kôʼ fyi yə̂ dzə̂ nəway we. À kə we kôʼ fyi yə̀ kə ghəd yə Zə̀kìy kə sây kə nəniy. Ghəd yə ghè kə nyi fwumi nəniy ufànyiə wiy nə̀ we, mu fwumi sòʼò mə̀nlwù nə̀ we nə̀ ù mə zɛ̀mə̀ dzwəŋə bə̂ anə ipfə. 42Zə̀kìy mə dzày â ghə̀d nə̀ ghè naʼà yə̂ ntwùm ə̀ ìdzòŋə̀ yə̀ â àghè dzə̀m, ghè ki dziy yə soʼò a ghu nə̀ Yesù də̌ wù wə̀ Zə̀kìy sây na nəniy nə̀ ù saʼ aghû yə̀ ghu nam muə nə̀ àghù yə̀ ghu pfə dzə̂. 43Aghee ntwùm ə̀ Kə̀zə̀ yìy maa dzày nə̀ aghû yə̀ àdzə̀m ghu kwu nəniy ibɛmə yiy â Yesù, Zə̀kìy kî nìyzə̀ ŋwò ayiə ghu àbɛbə yiy anə izəd i Yesù.”

Zwàykə̀zwekiy zù azoŋə̀ aghû yə̀ ghu də wày aghee Dzû

44Anə yiə yə Pità namə dzîy nəniy ayiə yiy, Zwàykə̀zwekiy zù azòŋə àghù yə̀ ghu kə zwulə nəniy ntwùm ə̀ ighè yə̀. 45Aghê Dzû yə̀ ghu kə ŋwô bə̂ nəniy a Dzopà nə̀ Pità, nə̀ ghu mə bɛmə Zə̀kìy, adzwə ŋge zwum ghu anə yiə yə Zə̀kìy nyiə̀ nəniy aghû yə̀ ghu də wày aghee Dzû nə̀ Zwàykə̀zwekiy, 46aŋwòə ghu kə zuw aghû yə̀, ghu dzəŋə̀ nəniy anə dzə̀ŋì tə ŋwô tìy, nyiə̀ sòʼò ùkali awò Zə̀kìy. Pità ə dzày tsə anə dzə̂ ìtaw yìy, 47“Zwàykə̀zwekiy mə bù azoŋə̀ àghù yə̀ anə yiə yə kə kə bù soʼò nəniy ate azoŋə̀ ghə̀d. Wè lìy wày dzə ani twe nə̀ aghû yə̀ kə nîy dzə̀ ə mwi m-à-zə̀ mìy.” 48Pità ə dzày tsə nə̀ ghu nyiə̀ àghù yə̀ nə̀ mwi m-à-zə̀ mìy anə izəd i Yesù Kə̀litò. Ghu bwoʼ Pità nə̀ wo kiy nə̀ ù dzə̀ dòʼò koŋə yə̀ ntsukə nə̀ ghu.

Currently Selected:

Kə̀fàʼ 10: isu

Highlight

Compare

Copy