Péna a Apotereri 24

Pôl a mbɛl a mbây tûlkaw Felíkse

1Nâm ndíɓí a falké, gáŋnjuku nzáʼaká̧na Ananínya, gí ka̧ Sezaré kuu gáŋnjuku pû a há̧narí̧, rá̧ njuku nyátûl a há̧na mbêw, ka rɛŋɛ́ ɓá Tɛrtúlús. Kú gí kalmany a Pôl hí̧ mbây tûlkaw Felíkse. 2Kú ɓá Pôl gí mbɛl a kuriri, dáy Tɛrtúlús tí deɓay ka̧n nzáʼa Pôl a sa: «Gáŋnjuku, ɓay tûl a wǎy, rú e a ɓil káwa a vónáké rá̧ ka ŋgboro a tu niŋ péna a wǎy, pé i mɔny béla káwa hí̧ njukuri ka tísiri nɛ́. 3Rú zibɔʼɔ pénáké too, lá gélri too, ka zi awá hí̧ wǎy a law mbêw. 4Dáy, mi zi ɓay a mi saɓay ɓá ŋgɛ̧́náké a dɔʼɔlɔ wǎy nyá, ɓaykénɔ́, pé mi vú hí̧ wǎy, ɓá i láɓay, ka rú e sa hí̧ wǎy. 5Rú ziŋ njuku nɛ́ ɓá ɓéké njuku, ké ɓá wála ka̧n bazeŋ a Juyífri too lá tísiri nɛ́. Ké kaw ɓá njuku mbêw a bazeŋ a mbây a mára̧ a Nazarɛyɛri̧. 6Ké ɛ́ ŋgboro ɓay ɓá hɛ̧ a belyáké gí ri vûn a Gáŋvbôn, pé rú ŋgbá nɛ́, [ɓay a rú walɓay kɔ̧ tûlé sé ŋgboro a sáŋna a ɓurú, 7dáy, gáŋnjuku a ŋgawbéreri Lisiyás gí ka̧, pé a ŋgbá nɛ́ ka ŋgɛ́rɛ, pé a naʼa nɛ́ a ɓil ndɔ̂ʼɔ ɓurú. 8Dáy a sa hí̧ njukuri ka deɓay ka̧n nzáʼa Pôl, ɓá kú gí gel a wǎy.] I vbí nɛ́, wǎy a tûl a wǎy, i e tu hɛ̧ri̧ too ka rú deɓay ka̧n nzɛ́ʼɛ.» 9Juyífri too zibɔʼɔ ɓay ka Tɛrtúlús sáy, a kú sa ɓá gbátɓay.

Pôl saɓay a mbɛl a mbây tûlkaw Felíkse

10Mbây tûlkaw Felíkse niŋ ndɔ̂ʼɔ hí̧ Pôl ɓá ké saɓay, dáy Pôl mbí ɓay, a sa: «Mi tu ɓá, niŋ mbimbɔ̂m ŋgɛ̧́ dá, ka mɔ kaw niŋ péna a ndáráké ka tísiri nɛ́. Nǎŋnɔ́ táŋ wɔ́w, pé mi e saɓay a mǐ, ka mbɔ́lɔ́y. 11Ɓá báŋké ka mɔ ma ɓay a ɛ́ ɓil ɓayké ka mûn nɔ́, niŋ nâm bôo a sére ka sénɛ́, ka mi ka̧ Zerúzalɛ̂m ɓay a hí̧ ɗéla hí̧ Gáŋvbôn. 12Njuku a há̧na ka ziŋ mí a ɓil vú a Gáŋvbôn, kaw many há̧na kuu njuku a há̧na zi tí yá malé kaw uru njukuri a ɓil vûn gɔ́ŋ Gáŋvbôn, malé ka gel a há̧na a ɓil pû zi tí yá. 13Ɓay nɛ́rí̧ too, ka njuku nɛ́rí̧ gí sa sé tûl ní, kú zi ma tɔ́ʼɔ hɛ̧ ka mi niŋ, a kú deɓay ka̧n nzáʼa ní a ŋgɛŋnɛ́ nyá. 14Mi sa a mbɔ́lɔ́ hɛ̧ mbêw ka mi tuy: Mi mbí mûn ní tɔ́ŋ ŋgboro a ŋgɛŋké, a kú kɛrɛ ɓá ŋgboroké zi tí ɓá béláké yáy. Dáy mi tɔ́ŋ Gáŋvbôn a zîi manárí̧, a láɓulaw sé tûl hɛ̧ too, a kú ɗé ka̧n ɓil mbété a sáŋna a Mɔyíze rá̧ ɓil mbété a porofɛ́tri. 15Mi e ka mbílaw sé ŋgboro a Gáŋvbôn, mbílawké kuriri kɔ́ kú erú, ɓá Gáŋvbôn e toma hûlri: Njukuri ka ɓá njuku a ndáráké rá̧ ɓéké njukuri too. 16Ɓaykénɔ́, pé mi rú mûn ní, ɓay a kaw ka law a táŋáké dát, a mbɛl a Gáŋvbôn rá̧ a mbɛl a njukuri.»

17Mbimbɔ̂m ŋgɛ̧́ dá ka mi zi tí a Zerúzalɛ̂m nyáy, dáy a regí ɓay a hí̧ndɔ̂ʼɔ hí̧ njuku a mǐri̧, rá̧ ɓay a niŋ hɛ̧púna hí̧ Gáŋvbôn a mǐ. 18Nǎŋnɔ́, pé ɓá péna ka mi kaw niŋáké a ɓil vûn a Gáŋvbôn, a kú gé ziŋ mí: Mi kaw niŋ hɛ̧púna turu mûn, njuku a há̧na zi tí kuu mǐ nyá, malé ɓala a há̧na zi tí yá. 19Dáy Juyíf a há̧narí̧ ka gí a tísiri a Azí, erú a gelké, ɓá kuriri pé belɓá kú gí mbɔ́lɔ́, ɓay a gí deɓay ka̧n nzáʼa ní, a kú mí e ka ɓay a há̧na ziŋ mí. 20Malé, njukuri ka e ka geléy, kú sa, a kú ɓá mi sé ew mbɛl a gáŋnjuku walɓayri, kú gé ziŋ ɓéké hí̧, mi niŋ lé? 21Mi zi niŋ hɛ̧ a há̧na nyá, ɓá ɓay mbêw yáŋ, ka mi uru ka a sa, ɓá gbénáké a mbɛl a kuriri ɓá: «Ɓá ɓay hɛ̧ ka mi láɓulaw ɓá Gáŋvbôn e toma njukuri ka hûl, pé kú ɓá mí a sénɛ́ gí mbɛl walɓay a wǎyri nɛ́!»

22Mbây tûlkaw Felíkse, ka ɛ́ ɓil ɓayké ɓá táŋáké sé tûl mára̧ a njukuri ka tɔ́ŋ Kiris, resɔʼɔrɔ walɓayké sé nâm a féké, a sa hí̧ kuriri ɓá: «Sêe ka gáŋnjuku a ŋgawbére Lisiyás e gína rá̧, mi walɓay a wǎyri.» 23Dáy, a sa hí̧ mbây a ŋgawbéreri ɓá kú ɓá Pôl sé ka̧n vûn sɛl, a kú zi ná ŋgá̧ ŋgboro too hí̧ nɛ́, kú pɔŋ mbaŋa a mɛ̌ri̧, kú gí hí̧ndɔ̂ʼɔ hí̧ nɛ́.

Pôl a mbɛl mbây tûlkaw Felíkse rá̧ Durusíl

24Falké nâm kpay lé, mbây tûlkaw Felíkse gí kú wûny a mɛ̌ Durusíl, ka ɓá wûny Juyíf. Ké pé ɗí Pôl, a zi ɓay a ké lá nɛ́ sé tûl ɓay láɓulaw hí̧ Zezú Kiris. 25Dáy, gelka Pôl tí saɓay sé tûl káwa a ndáráké rá̧ ŋgbá mûn rá̧ walɓay a Gáŋvbôn ka e gínay, wɔ́w ŋgbá Felíkse, dáy ké sa hí̧ Pôl ɓá: «Ɓala sénɛ́ ma dá! Mǐ, mí ziŋ ŋgboro a sêe a féké, mi e pé ɗí mɔ́.» 26Mbây tûlkaw Felíkse kɛrɛ ɓá, Pôl e gí hí̧ nɛ́ lari, ɓaykénɔ́ pé ké kaw lé, ké pé ɗí Pôl, ɓay a gí fɔ́ŋ sa̧a kuu mɛ̌. 27Nǎŋnɔ́ mbimbɔ̂m sére tá, dáy Pɔrsiyús Fɛstús, gí nyá mbây a gelkáwa Felíkse. A ké zi ɓay a niŋ hɛ̧ ka e ri law a Juyífri, ké pɔŋ Pôl ka̧n vûn sɛl.

Currently Selected:

Péna a Apotereri 24: pnz

Highlight

Copy

Compare