Roman 9
9
Ba mbənə Nwiye choʼo
1Ayə ghayn asiʼ numugə amə akə ibumi nə Kristo. Cha amə figə aŋu unó. Azugə zənə amə ungɨŋ inyi fiŋ si ghəy a kyay kwi cha amə figə aŋu unó. 2Akinine ingəʼ nu cha inwi si sugi ungɨŋ inyi fiŋ. 3Mə kaŋa kab kwi nji Nwiye zi indon igun iniŋ, ighaba aŋu akə ibumi zənə mba mə awu ni Kristo da atəw umbəŋ unya anom mbənə mba duw unebey feyn. 4Úŋwən mə ba Izre. Nwiye si num úŋwən akə buŋ ma, anigə ghəy u zən uzayn zayn. Yə səŋ usó nə úŋwən, inaʼ unoʼo abú úŋwən ighəy uni wumine uŋwən nibi kaʼ unó nanaʼ abú úŋwən. 5Úŋwən mə buŋ akə u mbaʼ imbey inebey Izre. Uŋunə Nwiye zoʼo du ungɨŋ unebey wu. Uŋwən amə Nwiye ŋunə umə tumə ughəy ujum. Mba yere uŋwən koŋ. Amə nigə.
6Akə ghayn aŋu kwi inayn Nwiye chigə ibuw. Mbən kyay kwi, akə ma ba Izre ujum nu amə ba Nwiye, 7kə buŋ ujum akə aghaŋ Abraham nu amə buŋ Nwiye. Nwiye ghayn abú Abraham kwi, “Amə anjim Azik nu ngwə mi mə nə buŋ mbənə mə kaʼa inigə.” 8Zəŋ tey kwi, akə ma buŋ akə aghaŋ Abraham nu amə buŋ Nwiye. Amə buŋ mbənə Nwiye kaʼa anó abú úŋwən nu amə buŋ akə aghaŋ Abraham. 9Anó zənə Nwiye kaʼa amə kwi, “Amaʼ yi bə koʼo, ayi wene izaʼa anigə Sera yi ibə́ ŋwə̂ anom.”
10Akə ma jum zigə. Rebeka mə mi buŋ anom ubigə nu aba mbaʼ feyn yə ibə́ úŋwən. Mbaʼ wu mə, Azik ungwa mbaʼ imbey. 11Asɨmə ki Rebeka sə ŋu ibə́ úŋwən, kə buŋ wu sə ŋu ghəy anó chuŋ kə anó iboŋ, anigə amə da anó zənə Nwiye choʼ ba ma ŋu imbey, 12akə ma da anó moʼ nu mbə ghəy, amə da mugə Nwiye tiya úŋwən. Nwiye ghayn abú úŋwən kwi, “Wa imbey yi sə faʼa abú uyə anjim.” 13Ayə ungɨŋ Aŋwaʼanayn Nwiye kwi, “Mə wuʼe Yakob ton Esawu.”
14Anigə mba ghayn kwi ingiya? Kwi Nwiye yə ghəy unó nu cha ukoʼoro? Akə ma nigə! 15Yə ghayn abú Mose kwi,
“A yi diri wa ŋunə a wuʼi idiri
Nibi kənə akə wa ŋunə a wuʼi ikənə akə uŋwən.”
16Anigə amə kwi, cha Nwiye mi diri ma ba anji zənə ba inyoŋ atəw kaba, kə da anó moʼ zənə u ghəy. Nwiye yi idiri ba anji zənə u wuʼi. 17Ayə ungɨŋ Aŋwaʼanayn Nwiye kwi, Nwiye ghayn abú ufon Fero kwi, “Mə zi ayə akə ufon da inum ayə itey inyi ikay. Ayi ghəy kwi ba ghayn anó da aŋu ungɨŋ isəg ijum.” 18Anigə Nwiye yi diri wa ŋunə ukaba kwi idiri. Uŋwən yi nibi itu fiŋ wa ŋunə u kaba kwi fiŋ ma tu.
Nwiye yə isɨy itəm nibi idiri ba
19Mbən yi biri iniŋ kwi, “Abə mə ney Nwiye si mə zi usaʼa atəw ba da ingiya? Amə ngwa amə ghəy u ton anó zənə Nwiye kaba?” 20Ungwə wa inyoŋ atəw mə ngwa ibiri iywiri inayn abú Nwiye? Cha ikyɨŋ zənə u buŋi mə ibiri ma abú wa ŋunə u buŋi iŋwən kwi, “Ngwə buŋi aŋu ney da ingiya? 21Cha ikyɨŋ isəg mə ma nə ikay igun wa ŋunə u buŋi iŋwən. Wa wu kyay umugə inum abimi sey feyn ibúŋ akyɨŋ abigə awu. Ifeyn uni bira amaʼa anó kyay, ifeyn uni bira uney ujum.”
22Nwiye yə kaba itey isɨy itəm nibi ghəy kwi ba kyay ikay ma. Asɨmə yə́ kaŋa yimə fiŋ da ba mbənə mbə ghəy kwi usɨy itəm. Ba mbənə mbə́ ghəy kwi usɨy itəm amə u mbənə umi iku. 23Yə nibi kaba itey imbon zənə inaʼa chigə nu cha imi noʼo mey nu amə imbon zənə yə́ tey igun ba mbənə yə́ diri. 24Mba mə ba mbənə yə́ tiya ngwa. Cha yə di tiya ngwa aba akaʼa ba Jû, yə nibi tiya akaʼa ba mbənə akə ma ba Jû. 25Yə si ghayn ungɨŋ aŋwaʼanayn zənə wa ukən Nwiye Hosiya ŋwaʼanayn kwi,
“Ba mbənə akə ma umbəŋ, ayi tiya akə umbəŋ ba
Ba mbənə cha mə di wuʼe,
Ayi tiya akə ba mbənə a wuʼi kwaʼa azəd,
26Ungɨŋ usin mbənə mbə́ ghayn abú úŋwən kwi, ‘cha mbən mə ngwən umbəŋ ba,’
Umbi tiya úŋwən awu kwi buŋ Nwiye ŋunə umə ni ikay.”
27Azaya ighayn da ba Izre kwi, “Kanə di mə kwi ba Izre umbə naʼa nə asɨkwaʼ zənə amə ungɨŋ iba, abə ma kere umi du angəʼ, 28Damugə Asɨyisəg yi yabi sob usaʼa ba igun isəg ighari feyn.” 29Azaya nibi ghayn kwi,
“Adi mə kwi cha Asɨyisəg ŋunə umə nə ikay jum di siy ma buŋ moʼ ina,
Nji yə mi iniy ngwa anji zənə yə niy sodom nə Gomora.”
Pol chaʼara Nwiye igun ba Izre
30Mba mə ghayn kwi ingiya? Mba yə ghayn kwi ba mbənə akə ma ba Jû nu cha mbə kaba anó ni itəm ikoʼoro si təm ikoʼoro anjim ibeni. 31Cha ba Izre mbənə mbə́ mə́ kaba kwi mbə təm ikoʼoro anjim unoʼo təm ikoʼoro damugə cha mbə siy uma unoʼo wu. 32Aton mə da ingiya? Amə damugə cha mbə kaba anó ni təm ikoʼoro anjim ibeni. Mbə ghayn kwi anó ni təm ikoʼoro amə anjim unó mbənə umə ghəy. Anigə mbə tamana igun “itey zənə ba mə tamana igun.” 33Ayə ungɨŋ Aŋwaʼanayn Nwiye kwi,
“Zən mə si sey itey a Zayon nu imi ghəy kwi ba tamana,
Ukob nu umi ghəy kwi u gow,
Cha Nwiye mi naʼa ma indere atəw abú wa ŋunə u zi fiŋ inyo ma.”
Currently Selected:
Roman 9: NGI
Highlight
Copy
Compare
Share
Want to have your highlights saved across all your devices? Sign up or sign in
© 2023 CABTAL
