Roman 15

Mbən aghəy anó zənə fiŋ ba chini mi mə boŋo akə ma aba itən

1Umba mbənə ita ibeni fiŋ si ka, mba yimə fiŋ nə u mbənə cha ibeni fiŋ ma di si ka. Ka mba mə aghəy ngwa aba unó mbənə umi aghəy kwi ita fiŋ boŋo. 2Wa feyn feyn akaʼa inja aghəy kwi fiŋ unya ma boŋo da ú chomo anji chuŋ. U bə aghəy nigə, ibeni ma yi kara. 3Cha Kristo di ghəy ma kwi aba fiŋ ma boŋo. Ayə ungɨŋ Aŋwaʼanayn Nwiye kwi, “Ijimi tənə ba mə jimə ngwən tə fwayn igun iniŋ.” 4Unó ujum mbənə mbə́ ŋwaʼanayn ungɨŋ Aŋwaʼanayn Nwiye, amə da itaʼa ngwa, da anjim yimə fiŋ, foro anjim ikay zənə Aŋwaʼanayn Nwiye naʼa ina, mba yi siy ikono ni nəmə u aghəy mbənə Nwiye kaʼa ina.

5Nwiye ŋunə umə aghəy kwi mba mə nə iyimi fiŋ, foro nə ikay fiŋ aghəy kwi mba chomo akə anó feyn nə umba unya numugə mba beni aboʼo Yeso Kristo, 6da umbən ujum, mbən mi foro igeg iyere Nwiye foro Mbaʼ ungwa Asɨyisəg Yeso Kristo.

Ukən chuŋ yə nibə abú mbənə akə ma ba Jû

7Mbən num wa feyn feyn anji zənə Kristo si num ngwən. Mbən aghəy nigə da inaʼa iwumini abú Nwiye. 8Ayə ghayn inen kwi Kristo beŋe akə wa faʼa abú ba Jû da itey kwi Nwiye yə ighəy unó mbənə u ghayn, foro kwi uyi aghəy unó mbənə yə kaʼa abú umbaʼ imbey uma. 9Yə́ aghəy nigə da ba mbənə akə ma ba Jû u nibi wumini Nwiye da inji zənə yə diri úŋwən. Ayə ungɨŋ aŋwaʼanayn kwi,

“Ayi yere ayə akaʼa ba mbənə akə ma ba Jû

Nibi kyugway ikiy iyere ayə.”

10Ayə nibə ungɨŋ Aŋwaʼanayn Nwiye kwi,

“Umbən mbənə akə ma ba Jû mbə ki wuʼe ngwən nə ba Nwiye.”

11Mbə́ nibi ŋwaʼanayn kwi,

“U mbən ba ujum mbənə akə ma ba Jû yere Asɨyisəg

Nibi aghəy kwi ba ujum yere uŋwən.”

12Wa ukən Nwiye Azaya nibi ghayn kwi,

“Ŋwə̂ yi du akə aghaŋ unebey Jese,

Nu umi tumə ba mbənə akə ma ba Jû

Anigə umbi zi ikono uma igun ma.”

13Nwiye ŋənə umə aghəy kwi mbən mə nə u aghəy ujum mbənə umə kono, u aghəy kwi iwuʼi sugi ungɨŋ itən fiŋ, nibi aghəy kwi mbən chomo akə aborobod numugə mbən beni uŋwən, da ikay zənə Azugə zayn zayn mə aghəy kwi itən ikono ŋuw imbey ni kwey akə unó mbənə Nwiye kaʼa.

Aton zənə Pol ŋwaʼanayn aŋwaʼanayn zəŋ akə fiŋ kaka

14Umbəŋ unya, mə kaŋa kyay da ngwən kwi ichuŋ sugi ungɨŋ itən fiŋ, kwi mbən kyay unoʼ ujum foro kwi mbən kyay umugə imə taʼa umbən unya. 15Ungɨŋ aŋwaʼanayn zəŋ, mə ŋwaʼanayn unó moʼ inen ni fiŋ kaka da ibeʼere umbən utəw da ichuŋ zənə Nwiye naʼa iniŋ 16kwi amə wa faʼa Yeso Kristo da ba mbənə akə ma ba Jû. Ayə faʼa ni wa faʼa ambəŋ Nwiye imə ghayn ukən chuŋ da Nwiye boʼo ba mbənə akə ma ba Jû mə aghəy ifá zənə Nwiye beni, nu Azugə zayn zayn si aghəy kwi u zayn. 17Umugə amə akə anó feyn nə Yeso Kristo, ayə nə aton imə komo iguwə da afaʼa zənə amə faʼa abú Nwiye. 18Cha amə kaba ighayn aŋu anó chini, ayi ghayn aba zənə Kristo chigə anjim iniŋ ighəy. Yə aghəy kwi ba mbənə akə ma ba Jû wumini Nwiye anjim unó mbənə amə ghayn foro anjim unó mbənə amə ighəy. 19Anjim unwini unó, anjim uyere unó foro anjim unó ikay zənə Azugə Nwiye naʼa. Anigə mə si ghayn ukən chuŋ da Kristo ungɨŋ usin jum inoʼ a Yerusanem iŋu pey aba abey Ilirikum. 20Anó zənə amə kaba amə kwi aghayn ukən chuŋ ungɨŋ usin mbənə cha ba u di si zəw uma anó da Kristo awu, da ka amə chimə aŋu igun atiy aghəy wa chini. 21Ayə ungɨŋ Aŋwaʼanayn Nwiye kwi,

“Ba mbənə cha udi si noʼo ghayn da uŋwən abú úŋwən umbi zən uŋwən.

U mbənə cha u di si noʼo zəw da uŋwən umbi zəw utəw uma zayn.”

Pol tana kwi iyi ŋuw a Rom

22 # Rom 1.13 Mə si kaŋa kaba ighari nanaʼ izaʼa izən ngwən, asɨmə unó moʼ kən aŋu. 23Asɨmə, numugə asi mara afaʼa ungɨŋ aba abey zəŋ, cha afaʼa chini adi ni bere, numugə asi kaŋa kab ighari nanaʼ izaʼa zən ngwən, 24mə kaŋa kono ungɨŋ inyi fiŋ kwi, ayi zaʼa izən ngwən amaʼazənə amə chigə ŋuw a Spen. Abə zaʼa, ayi chomo nə umbən akə ŋwə̂ amaʼ moʼ da mbən wyere cha aŋu amaʼazənə amə ŋuw. 25#1Ko 16.1-4Akinine, ayə anji amə ŋuw Yerusanem. Ayə ŋu naʼa awere abú ba Nwiye mbənə umə awu. 26Ufere ba Kristo ŋunə umə Masedoniya foro uŋunə umə Akaya zən kwi yə boŋ kwi u chobo ukab inaʼ abú ba ukwaŋ mbənə umə akaʼa ba Nwiye mbənə umə Yerusanem. 27#1Ko 9.11Ikono zəŋ amə iyi uma. Amə asiʼ kwi yə koʼoro kwi úŋwən aghəy nigə abú úŋwən damugə numugə ba mbənə akə ma ba Jû si foro ni ba Jû ijəg aborobod zənə Nwiye mə naʼa, amə asin uma iwyere ba mbənə akə ma ba Jû nə u aghəy mbənə Nwiye neʼe úŋwən wu. 28Amaʼazənə asi mara afaʼa zəŋ i naʼa ukab ŋunə mbə chobo abú úŋwən, ayi noʼ iŋu a Spen. Amaʼazənə ami mə ŋuw, ayi chigə yi zən ngwən. 29Mə kyay kwi amaʼazənə ami zaʼa izən ngwən, aborobod zənə Kristo naʼa ayi sugi igun inen.

30Umbəŋ unya, ayə boʼo ubugə inen anjim Asɨyisəg Yeso Kristo foro anjim iwuʼi zənə azugə naʼa ina kwi mbən foro aboʼo inyi ni tana chaʼara Nwiye iniŋ. 31Mbən chaʼara Nwiye kwi u chiyə aŋu inya ubugə ba mbənə cha udi beni Kristo a Judeya. Nibi chaʼara kwi ba Nwiye mbənə umə Yerusanem num ukab ŋunə amə ŋu naʼ abú úŋwən. 32Mbən ghəy nigə da Nwiye bə beni, ayi zaʼa izən ngwən ni iwuʼi zənə imi ghəy kwi fiŋ zutə. 33Nwiye ŋunə umə naʼa aborobod chomo nə umbən ujum. Amə nigə.

Currently Selected:

Roman 15: NGI

Highlight

Copy

Compare