Matéus 27

Bíg kɛla Yésus á yóg Piláto

(Mlk 15.1-2; Lúk 22.66; 23.1; Yhn 18.28)

1Ɛnɛ́ kítí ya kánda, ɓakanʼyɛ ɓatíi-nsúlé bísɛ la ɓacɛ́ŋ bí lílōmɛ bú tɔ́ɔ̄ á émɔga á lí ɛ́n nɛ́ láá ɓá nyɛɛ́ lí kuhʼanɛ lí Yésus ekɔ́ghɛ yé nyɛmb. 2Ámbúh náŋ, bú kág nyɛ la ɓɔ́ bú kɛ́la nyɛ́ á yóg gɔ́mna licɛ́ŋ Piláto.

Nyɛmb nyí Yúdas

3Ɛnɛ́ Yúdas, nyɔ́ a nuŋléé Yésus, a ɛ́n nɛ ɓá kɔ́ghɛ́ nyɛ nɛ́ ag nyɛɛ li wú, ɔ tám tɔláá, la nyɛ́ ɔ sɔ́la míŋ muúmíŋháa mí bípah bí kápa, ɔ tímānɛ̄ mɔ ɓakanʼyɛ ɓatíi-nsúlé la ɓacɛ́ŋ bí lílōmɛ, 4aá la ɓɔ́ nɛ́: «Ma ɓɔ̄ŋ áɓē li ólhánɛ lí mut a ŋgíla njɔm.» Ndí, bú pélē nyɛ nɛ́: «Bih byɛ́ɛ́ ɓé ɓɛ́hɛ jam múŋ, náŋ ag légɓe ja wā-ntámɛ́!» 5Váŋ nɛ̄ a wáŋgɛ̄ míŋ mɔní jé lí ndugá-púán ɔ ɓógó vāŋ, la nyɛ́ ɔ kɛ̄ lí nítɓan. 6Ɓakanʼyɛ ɓatíi-nsúlé bú kɔt míŋ mɔní la ɓɔ́ bú yó nɛ: «Bih byɛ́ɛ́ ɓé ɓɛ́hɛ kundɛ li vá lí mí mɔní á ŋkɔɓé nyú á ndáá-ēcɛ́ŋ-Ɔlolómɛ̄, átɔm nɛ mɔní mí mícii míŋ.» 7Ɛnɛ́ ɓá ámblan, bú sóm ǹdíí á mut-a-limɛ la míŋ mɔní ányúū lí je lí ɓácɛn bí ɓot átē. 8Jɔ́ nɛ́ nyúŋ ǹdíí á ŋga yáŋlɛ tɛɛla lɛn nɛ́: «Ǹdíí á mícii». 9La náŋ, yé Yelémia m̀pɔ́tle-a-Ɔlolómɛ̄ a lagléé yá yál. A lagléé nɛ́: «Bí nyɔŋɔ́ɔ́ muúmíŋháa mí bípah bí kápa. Byɔ́ nɛ́ bí lɛ́ ndam ɓá tɛ́ɛ́ ányúū yɛ́ɛ̄. Ndam nyí ɓɔɔ́n bí Íslāɛl ɓá tɛ́ɛ́ á lí nuŋu lí nyɛ. 10La ɓɔ́ bú ɓɔŋlé míŋ mɔní á lí sóm lí ǹdíí á mut-a-limɛ. Náŋ nɛ́ Nyɔ́ŋ-Ɛsáŋɛ́ a kanʼyɛ́ɛ ma nɛ́ mi lágá ɓɔ́.»

Yésus ɔ́sū ví Piláto

(Mlk 15.2-15; Lúk 23.2-5, 13-25; Yhn 18.28–19.16)

11Bú kɛ́lā Yésus ɔ́sū ví gɔ́mna licɛ́ŋ Piláto. Gɔ́mna licɛ́ŋ ɔ ɓōtlé nyɛ li bihi, aá la nyɛ́ nɛ́: «Ɓaá wa nɛ́ ɔ lɛ káísa nyí Elōg-Yúda é?» Yésus ɔ pélē nyɛ nɛ́: «Wa nɛ́ wa pɔ́t jɔ!» 12Ndí, tɔ eceg ɓákanʼyɛ ɓatíi-nsúlé la ɓacɛ́ŋ bí lílōmɛ ɓá sɔ́mánɛ̄ nyɛ, āh pele ɓé tɔ jam. 13Váŋ nɛ̄ Piláto a lāgá nyɛ̄ nɛ́: «Ɔ ŋgɔ́ ámble ɓé yí mbóŋ ɛ́sɛ ɓot bí ŋga tɛ́lɓéne wa é?» 14Yésus ɔ pún nyɛ li pele nɛ́ ɓam ɓam, náŋ ɔ nyágɛ́ gɔ́mna licɛ́ŋ tɔláá. 15Á ŋgand Páska nyí Elōg-Yúda sig, gɔ́mna licɛ́ŋ a ɓɛ́ɛ́la elɛ́m lí pámɛ lí ɓɔ mut wa á m̀ɓog, nyɔ́ lilómɛ lí ŋgí ɓāt nyɛ́. 16Mut wa nyɔ́ a ŋgí yílɛ la ɓot ŋgandag a ɓɛ́ɛ́ múŋ á m̀ɓog, nyɔ́ bí ŋgí yáŋa Yésus Balábas#27.16 Ŋgandag kálati kwaŋ yá ɓógtɛ jóō lí Yésus vá á ŋgwáāg Balábas á lí pún nɛ́ m̀búúhānɛ́ ah ɓɛ́ɛ́ ɓé á póla ɓá ɓot bíɓáa. . 17Piláto ɔ bíhī hɔ́ límut lí ɓɛ́ɛ́ lí kómānɛ váŋ nɛ̄: «Ɓaá, nzáá miní ŋga somo nɛ́ mi pámɛ́ ɓɛ́nɛ á m̀ɓog, Yésus Balábas tɔ nɛ́ Yésus bí ŋga yáŋa nɛ́ Nyɔ́-a-Pɔ́hlɛ é?» 18Átɔm nɛ́ nyɛ́ Piláto a ŋgí yí nɛ́, nzoŋ yaɓá nɛ̄ ya yíglé nɛ bí sɔ́la nyɛ́ Yésus. 19Kasig Piláto a ɓɛ́ɛ́ a ŋgí tɔ́ɔ̄ á étɔɓé bíkááhɛ́nɛ́ ag kááhɛ, ŋ̀gáá wɛ́ɛ̄ ɔ óm mut li laga lí nyɛ nɛ́: «Ɔh níŋglág ɓé á ŋkwɛl á nyɔ́ mut a tɛ́ɛ́ sim, átɔm nɛ́ ma táka ŋgándag lɛn á élɛɛ́lɛm ányúū yɛ́ɛ̄.» 20Ɓakanʼyɛ ɓatíi-nsúlé la ɓacɛ́ŋ bí lílōmɛ bú yéɓyánɛ́ límut nɛ́ bí mwahlé ɓɔ́ Balábas, la nɛ́ bí ólhánɛ Yésus. 21Ɛnɛ́ gɔ́mna licɛ́ŋ a nyɔ̄ŋ sīg-pɛ mpɔ́t, ɔ bíhī ɓɔ nɛ́: «Laglán ma, nzáá á ɓá ɓot bíɓáa, miní ŋga somo nɛ́ mi pámɛ́ ɓɛ́nɛ é?» Bú pélē nyɛ nɛ́: «Balábas.» 22Piláto ɔ ɓāt ɓɔ nɛ́: «Yéé mí ɓɔ̄ŋ hɔ́ la Yésus nyɔ́ bí ŋga yáŋa nɛ́ Nyɔ́-a-Pɔ́hlɛ é?» Ɓɔ́ bísɛ bú pélē nɛ: «A tómlɛ́ á mbásá!» 23Piláto ɔ bíhī ɓɔ nɛ́: «Wɔɔ́wɔ́ɔ aɓé hɔ́ a ɓɔ̄ŋ é?» Ndí ɓɔ́ bú kōndyé ja lí lón nɛ́: «A tómlɛ́ á mbásá!» 24Ɛnɛ́ Piláto a ɛ́nɛ́ɛ́ nɛ́ a ŋgí la ɓé lí ɓɔŋ lí nyaa etám, la ki nɛ́ eduŋgú ɛ́ ŋgí ɓét bí lí ɓét, ɔ nyɔ̄ŋ míndīm, ɔ so mɔ mɛ́ɛ́ ɔ́sū ví límut, ɔ lāgá nɛ: «Mih byɛ́ɛ́ ɓé ma jam tɔ já la micii mí nyɔ́ mut. Náŋ ag légɓe ɓɛ́nɛ-mɛ̄n!» 25Lilóm lísɛ lú pélē nyɛ̄ nɛ́: «Micii mɛ́ɛ́ mí kómɓán á lóō jáhá la á lóō lí ɓɔ́ɔ̄n ɓáhá!» 26Váŋ nɛ́ Piláto a pámɛ́ ɓɔ Balábas. Ámbúh li lɔ́ghánɛ lí Yésus la aso, ɔ tí ɓɔ nyɛ́ nɛ́ bí tōmó nyɛ́ á mbásá.

Bíg keeyɛ Yésus

(Mlk 15.16-20; Lúk 23.11; Yhn 19.2-3)

27Ámbúh náŋ, sónja yí gɔ́mna licɛ́ŋ yú kɛ́la Yésus á ndáá yɛ́ɛ̄ nyɛ́ gɔ́mna licɛ́ŋ, elōg sónja ɛ́sɛ yú díí nyɛ. 28Yú pámɛ nyɛ́ mbɔ́tí yɛ́ɛ́, la yɔ́ yú jáhɛ nyɛ evɛɛ́vɛ́ɛ ɛ́ mbɔ́tí étām. 29Yú óŋ ɔ́tot ví ŋkɔɔ á bílɔ la yɔ́ yú jáhɛ́ nyɛ́ vɔ́ á m̀mú; yú byeehɛ́ ki nyɛ́ líkāā á wɔ á m̀ɓɛ́nlómɛ. Sónja yú úm hɔ́ míɓɔ̄ŋ ɔ́sū vɛ́ɛ́ la yɔ́ yú ɓōtlé nyɛ li ɔl bíg keeyɛ nyɛ́ nɛ́: «Ɓaá tamá wa á káísa nyí Elōg-Yúda!» 30Ámbúh náŋ yú túlé nyɛ mitɛ́ɛ́, la yɔ́ yú nyɔ̄ŋ jéŋ likáá, yú lɔ́g nyɛ jɔ́ á m̀mú. 31Ɛnɛ́ yá manɛ́ nyɛ li keeyɛ, yú ɓógtɛ́ nyɛ yéŋ evɛɛ́vɛ́ɛ ɛ́ mbɔ́tí, yú tímānɛ̄ nyɛ mbɔ́tí yɛ́ɛ́, la yɔ́ yú kɛ nyɛ li tomo á mbásá.

Yésus ag tomlɛ á mbásá

(Mlk 15.21-32; Lúk 23.26-43; Yhn 19.16-24)

32Eceg sónja ɛ́ ŋgí pámɛ Yésus á tísɔn, yú kɔ́p mut a Siléna wa nɛ́ Símɔn, yú kágyɛ́ nyɛ li ɓɛgɛ lí mbásá nyí Yésus. 33Ɛnɛ́ bí pámáá á voóm a ŋga yáŋlɛ nɛ́ Golgóta, náŋ ag mínɛ nɛ́ «voóm a Evóghó m̀mú», 34bú tí nyɛ milɔg ɓá puú la binyúnyú bí ŋga lōl nɛ́ a nyū, ndí, ɛnɛ́ Yésus a cégē puh, ɔ ɓēn lí nyú. 35Eceg bí manhɛ́ɛ nyɛ́ lí tomo á mbásá, bú lɛ̄ŋgɛ́ mbam á lí kaan lí mbɔ́tí yɛ́ɛ́, 36la ɓɔ́ bú tɔ́ɔ̄ váŋ á lí légɓe lí nyɛ. 37Bú cií njɔm ekɔ́ghɛ yɛ́ɛ́ ɛ́ nyɛmb á lóō jɛ́ɛ́ lí m̀mú nɛ́: «Nyɔ́ nɛ́ a lɛ Yésus, Káísa nyí Elōg-Yúda.» 38Bí tōmléé ki mítɔnɓa míɓáa elɔŋ la nyɛ́, wá á m̀ɓɛ́nlómɛ, nyúŋú ki á m̀ɓɛ́ŋgáa. 39Ɓaloo-nzen bí ŋgí óŋo Yésus, bíg mɛg mimú 40la li laga nɛ́: «Wa hɔ́, nyɔ́ ɔ ŋgɔ búg ndáá-ēcɛ́ŋ-Ɔlolómɛ̄, ndí ɔ nyɔ̄ŋ alɔ́ áŋháa á lí óŋ lí yɔ, sūŋ hɔ́ wā-mɛ̄n, kíyáɓɛ́nɛ ɔ lɛ Mɔ́ɔ̄n Ɔ́lolómɛ̄, sūh á mbásá!» 41Ɓayí-mbéndá, ɓacɛ́ŋ bí lílōmɛ la ɓakanʼyɛ ɓatíi-nsúlé, ɓɔ́g bí ŋgí ɔl nyɛ́ 42nɛ́: «A sūŋ ɓot ɓatám, ndí a ŋgá la ɓé li suŋ lí nyɛ́-mɛ̄n! Nyɛ́ káísa nyí Íslāɛl, a súh hɔ́ vɔ́ŋɔ́ɔ á mbásá, váŋ biíg kɛ li yéɓe la nyɛ́! 43A vá lípitá jɛ́ɛ́ la Ɔlolómɛ̄, Ɔlolómɛ̄ a sūŋ hɔ́ nyɛ vɔ́ŋɔ́ɔ, kíyáɓɛ́nɛ ag diŋ nyɛ́, átɔm nɛ́ a lāgá nɛ: ‹Mi lɛ Mɔ́ɔ̄n Ɔ́lolómɛ̄!›» 44La mitɔnɓa ki mí tōmlɛ́ɛ á mbásá kaa nyɛ́ mɔ́g mí ŋgí óŋo nyɛ́ nlemlem.

Nyɛmb nyí Yésus

(Mlk 15.33-39; Lúk 23.44-48; Yhn 19.28-30)

45Li ɓotle á kɔsi li pám á ŋgɛ́ŋ ɛ́ŋháa ɛ́ ŋgōgó, livito lú bútyɛ́ ŋkɔŋ-á-sí ásɛ. 46Mam mí ŋgɛ́ŋ ɛ́ŋháa ɛ́ ŋgōgó, Yésus ɔ tɛ́ɛ́ nlón la ŋguu nɛ́: «Éli, Éli, lema sabágtani!» Náŋ ag kɔplɛ nɛ́: «Á Ɔ́lolómɛ̄ wama, á Ɔ́lolómɛ̄ wama, ányúū yéé wa cóó ma é?» 47Jogo lí ɓot á ɓá bí ɓɛ́ɛ́ váŋ, ɛnɛ́ ɓá ámblé nyúŋ nlón bú lāgá nɛ: «Nyɛ́ hɔ́ nyɔ́, a ɓōtlé lí yáŋa lí Elías m̀pɔ́tle-a-Ɔlolómɛ̄!» 48Á ékūyá-kúyá, mut wa á élɔŋ yáɓá ɔ ɓógó m̀bíí, ɔ kɛ̄ lí nyɔŋ lí jom lí mbɔɔkɛ jé a dúu á eɓámhá-wáany, ɔ págyɛ̄ jɔ á lísūg lí líkāā, ɔ lɛ́g nyɛ̄ nɛ́ a nyū. 49Ɓáŋá bí ŋgí laga nɛ́: «Laaŋké, bi léɓyág kíyáɓɛ́nɛ Elías ag sɔ́ nyɛ́ li suŋ.» 50Ndí Yésus, ɔ tɛ́ɛ́ sīg-pɛ nlón la ŋguu, la nyɛ́ ɔ páte. 51Váŋ nɛ̄ ntumb á líɓato á ɓɛ́ɛ́ a ŋgí céŋ ndugá-púán wá wáhé bípah bíɓáa li ɓotle á lóō nɛ́-tɛ́ɛ la á sí. Sí yu póghan, miáá mí ŋgɔg mú ɓóo, 52sɔŋ yú léglan, ŋgandag ɓápūán bí wúēē yú pāhye. 53Bí pámáá á sɔŋ, ámbúh lipahye lí Yésus, bú níŋgí á tísɔn púán ápah ɔbul ví ɓot bí ɛ́nɛ́ɛ́ ɓɔ́. 54Ɛnɛ́ ŋ̀kanʼyɛ a nlɔŋ á éɓōgo sónja la ɓatát Yésus bí ógtáán kaa sí ya póghan, bú ɛ́n ki kaa mam mí ŋgí loo, bú nát la woŋ la ɓɔ́ bú pɔ́t nɛ: «La mbálɛ, nyɔ́ mut a mɓɛ́ kɔɔ Mɔɔ́n Ɔ́lolómɛ̄!»

Mije mí Yésus

(Mlk 15.40-47; Lúk 23.49-56; Yhn 19.25, 38-42)

55Ɓondígá ŋgandag bí ɓɛ́ɛ́ bí tɛ́ɛ puh enɛŋɛ́ la váŋ bíg légɓe. Náŋ a ɓɛ́ɛ́ álɔ̄ ŋgandag nɛ́ bí ŋgí oŋ Yésus li ɓotle á Galiléa á lí ɛɛle lí nyɛ. 56Bí ɓɛ́ɛ́ múŋ á yéŋ elɔŋ; Malía nyɔ́ a Magdála, Malía nyaŋɛ́ á Yákop la Yósɛp elɔŋ la nyaŋɛ́ a ɓɔɔ́n bí Zebedéo. 57Ɛnɛ́ ŋgōgó ya vín, m̀byaŋ-á-mut wá nyú á Álimatéa bí ŋga yáŋa nɛ́ Yósɛp wú sɔ́, nyɛ́g a ɓɛ́ɛ́ ŋ̀yége a Yésus. 58Ɔ kɛ́ á mbóg Piláto á li ɓat lí nyɛ m̀bim á Yésus. Piláto ɔ kānʼyɛ́ hɔ́ nɛ bí tí nyɛ́ wɔ́. 59Váŋ nɛ́ Yósɛp a nyɔ̄ŋ m̀bim, ɔ vúlké wɔ́ á ŋkánág á taŋ mbɔ́ŋ, 60ɔ vá wɔ̄ á ŋkánág á sɔŋ a ɓogháánɛ á ŋgɔg ányúū yɛ́ɛ̄ nyɛ́-mɛ̄n Yósɛp. Ámbúh náŋ, ɔ sógɛ́ m̀ɓáláŋ á ŋgɔg ntám á lí leg lí mínīŋglé mí sɔŋ, la nyɛ́ ɔ kɛ̄. 61Múŋ á yéŋ eceg, Malía a Magdála la nyɔ́ŋɔ́ Mālía ntám bí ɓɛ́ɛ́ bí tɔ́ɔ́ váŋ ɔ́sū ví sɔŋ.

Litát lí sɔŋ

62Ámbúh ɔlɔ́ ví ŋgí oŋ víŋ, ɔlɔ́ ví ɓɛ́ɛ́ ví m̀ɓoŋhanɛ́ á ɔlɔ́ ví évɛɛɓan ví Élōg-Yúda, ɓakanʼyɛ ɓatíi-nsúlé la ɓot bí Élōg-Falísái bú kɛ̄ li ɛ́n lí Piláto. 63Bú lāgá nyɛ̄ nɛ́: «Ɛtáŋɛ, ɓaá ɔ́ŋɔ jam já nɛ̄, eceg nyɔ́ m̀ɓegminaŋga a ɓɛ́ɛ́ á éniŋ, a lagléé nɛ́: ‹Á ɔ́lɔ̄ vá yáhɛ́ áŋháa mag kɛ li pahye.› 64Tí hɔ́ kúndɛ nɛ́ bí tát sɔŋ yɛ́ɛ̄ li pám lí álɔ̄ áŋháa, á li pún nɛ́ ɓayége ɓɛ́ɛ́ bíh yííg ɓé m̀bim wɛ́ɛ́, la ɓɔ́ bí lāgá lilómɛ ámbúh eceg nɛ́: ‹A pāhye á nyɛmb›. La náŋ, míŋ minaa máɓá míg kɛ li loo lí mí mí ɔ́sū.» 65Piláto ɔ lāgá ɓɔ̄ nɛ́: «Ɓatát bí lɛ, kɛnán! Tátán sɔŋ ákaa nsom wáná.» 66Váŋ nɛ́ ɓá kɛ, bú téétɛ́ lí leg lí sɔŋ m̀ɓɛɛŋ la ŋgɔg ɛ ɓɛ́ɛ́ á mínīŋglé; la ɓɔ́ bú yíg tɛ́ɛ́ ɓatát váŋ.

Currently Selected:

Matéus 27: NTB

Highlight

Copy