Mateo 2
2
A Nupesi na Nirikena Haro
1E Isu ni poda o Betlehem na tabeke ne Iudea na tahuna a Hariki e Herod i matakari vonga. Muri e huriki a bakovi na lohokanga na nilahona hada to malaga na tabeke na nirike na haro, to valai o Ierusalem. 2#Gi 24:17To nana, “Avia a viri ni poda a hariki ne huriki a Iuda? Mete masia a hada vona na tabeke na nirike na haro, mete valai mete ge kavurikea.” 3Na tahuna a Hariki e Herod i longoa a ngava iea, i lege a lohona. E huriki o Ierusalem ranga, i lege a lohone ria. 4Lakea i gale palupu e huriki a prister dagi, a mari na vinara na lotu, i nana ria vona ni gi poda vai e Kristo. 5Ri ta maea ria, “Bara ni poda na tanga e Betlehem, na tabeke ne Iudea, a vuhuna e huriki a propet hosi ri here maea:
6 #
Mai 5:2; Ion 7:42 ‘Ra ioe o Betlehem na tabeke ne Iudea
i uka ma a tanga tavula o Iudea, a vuhuna
bara i pagitala vomu a matakari,
bara ia a matakari ne huriki a kabu nau, re huriki a Israel.’”
7Muri e Herod i gale kapiloho e huriki a mosi nga, i nana tou vona a parava to matai a hada vona. 8Muri i rudu tou, to go lakea o Betlehem, i ta maea, “Moto vano, moto matakana kamumua a koma iea. Na tahuna moto matavisia, moto taki iau. Iau tara a ngaru ni lokovonga, ga kavurikea.”
9To longo lobo a ngavana hariki, to vano. Lakea a hada to masia na nirikena haro, i muga ne tou, i vano i koro polomeli na tanga i made vona a koma. 10Na tahuna to masia a hada, to vivi hateka. 11#Sng 72:10-15; Ais 60:6Na tahuna to bele na ruma, to masia a koma turana e kinana e Maria, lakea to turume puru, to kavurikea e Isu. To bole tala na tava ne tou a mahala, to vakaparua na gol, a buluka mangisipa ni gale a insens tara, a mir tara. 12A Vure i ta pupukari ne tou na vurena, nahea to go hamule maia e Herod. Lakea to ramai a dala tara, to hamule lakea na robo ne tou.
E Iosep i Ha Lakea o Egipto
13To vano pali a bakovi dagi nga, lakea a agelo ne Bakovi Dagi i bele ne Iosep na vurena, i ta maea, “O pesi rike turana koma, e kinana, moto ha lakea o Egipto. Moto made vonga. Muri bara taki matou, moto hamule valai. E Herod i matakanea a koma iea, ta ge rabalakia.”
14Lakea i pesi rike na rodo, i vango a koma rua e kinana, to ha lakea o Egipto. 15#Hos 11:1To made vonga i harena na tahuna e Herod i mate. Lakea i bele muholi a ngava e Bakovi Dagi i taki hosi ne huriki a propet, i ta maea,
“A gale talea o Egipto e tugu a bakovi.”
E Herod i Rabalaki e Huriki a Koma Bakovi
16Na tahuna e huriki a mosi nga i uka ma ri hamule valai ne Herod, i madihi a hatena, a vuhuna i matakilaka vona ri tamia. I vakuku e huriki a nugumaheto ri gi rabalaki e huriki a koma bakovi o Betlehem, na tabeke tabukoi vonga, a pida ne ria i polotano na pida i rua. I lohoka vona a pida ne Isu bara i polotano na pida i rua, a vuhuna i longo a nitane huriki a bakovi na nirike na haro. 17Ngane a ngava i bele muholi, ra ngava e Bakovi Dagi i taki hosi ne Ieremaia a propet, i ta maea,
18 #
Vuh 35:19; Jer 31:15 “Ni longo na tanga e Rama
e huriki ri haloho.
E Resel i taringi e huriki e tuna.
Pali i koi ni gi luke,
a vuhuna e huriki e tuna
ri mate lobo pali.”
To Hamule
(Lukas 2:39)
19Muri e Herod i mate, lakea a agelo ne Bakovi Dagi i bele ne Iosep o Egipto na vurena, 20i ta maea, “E huriki ta ri gi rabalakia a koma ri mate pali. O pesi rike, o tuli a koma rua e kinana, moto hamule lakea na robo e Israel.”
21Lakea i pesi rike, i tuli rua to hamule lakea o Israel. 22Pali i mangenge ni lakea o Iudea, a vuhuna i longoa e Arkelaus i bole a murine tamana, e Herod, i matakari a tabeke ne Iudea. A agelo ne Bakovi Dagi i bele ne Iosep na vurena, i vakalongoa, i mavonga to lakea na tabeke ne Galili. 23#Ais 11:1; 53:2; Luk 2:39; Ion 1:45To vano to made o Nasaret. Ngane i bele muholi a ngava na propet i ta maea, “Bara ni gale ia a koma o Nasaret.”
Currently Selected:
Mateo 2: bnp
Highlight
Share
Copy
Want to have your highlights saved across all your devices? Sign up or sign in
© 2011 Wycliffe Bible Translators, Inc. All rights reserved.