Nchipo na Solomoni 8
8
1Ha! Wakhanlleke wonanko murokoraka,
awaamwana nipelle nimodda!
Kuuphwanyilleke vaatte, keerewuukhupaarella,
oohikhallavottho mmodda ookivevulla.
2Keerewuukusella mpa mwa amoowaaka,
naari muchipindani ya ayo yakiyanre.
Keerewuuvaha vinyo awunkhella wi omuwirye,
ni maaddi a ezipaso ddamakangaza.
3Nnatta naye noonyottho niri vatthi va murwaaka,
nnattanatta naye ninnakikhupaarella.
4Nyu anamwalli a o Yerusalemu, ddawoona, kinimuuvekani.
Kinallupella mu nnddina na mphoyo ni epaalla ddamuhakani
wi echikondi muhiyitikheke apaalle oyivenyiha
ophiyera epaallille mwaneeniiwa.
Nchipo naneetthanu ni nimodda
Anamwalli
5Ethiyo olla ttaani anavenyera muutthakoni,
amuhameelle ookondiwaaye?
Namwalli
Kahuuvenyiha vatthi va muteekho wa mapulosi.
Vaavo sika amaayo yiithuwelliiwa vawuuyarani.
6Okiwanddeellelle enthawi ddittheddene,
wonanko ebangili m'muwononi mwawo.
Vawi echikondi tti yamasiva wonanko okhwa,
ehache tti yawoopiha wonanko mahame.
Echikondi ennasherima wonanko munllo,
ennaviha wunchichi wonanko munllo wawoopiha.
7Naari maaddi manchichi khewora othiimiha echikondi,
naari maaddi a echigumula khewora oyikwekweresa.
Naari muthu apaalla waakakhaniha echikondi
ni eyuumaaye ettheene,
aniivevullelle nivuddove.
Arokoriye a namwalli
8Nookhallana murokorihu mung'onong'ono,
khanna naari mapelle.
Ethiyo nimweerelle tini murokorihu
va nllapo na okoheriwa waye?
9Akhanlleke wonanko esiri,
neeromumakella nttattha na siliva.
Akhanlleke wonanko nchiwi,
neeromwaapheelliha matabwa a mukunguza.
Namwalli
10Miyaano kiri wonanko esiri,
mapellaaka tti wonanko mattattha.
Wa musombwe ookondiwaaka
kiri wonanko oowiiha murendelle.
Musombwe
11Solomoni aakhallana emata yampesa o Baala Hamoni
eyo aayipolleyihalleeye wa oollima.
Arive oollima avelleelle makobiri a siliva,
makobiri 1,000 ekaamba ya ezipasonnddo.
12Koma emataaka yampesa tti yaakayaaka!
We Solomoni, halla ni makobiraawo 1,000,
oollimaawo ehalle ni makobiriiwa 200.
13We ookhalla m'matani,
akhwaaka aareya maaru
wi yiiwe mawaawo,
kaakhullelle wi kiiwena.
14Akuva ookondiwaaka musombwewe,
okhalle wonanko mphoyo
apaalle mwanapaalla anathamakella m'mwaangoni,
mmo munamella ddawunkhelliha yoocha.
Currently Selected:
Nchipo na Solomoni 8: MW2019
Highlight
Share
Copy
Want to have your highlights saved across all your devices? Sign up or sign in
The Bible in Elhomwe © The Bible Society of Malawi, 2019.
